ام سد بنت سعد بن ربیع فرماتی ہیں: وہ سیدنا ابوبکر صدیق رضی اللہ عنہ کے پاس گئیں، آپ نے اپنا کپڑا ان پر ڈال دیا، میں ان کے پاس بیٹھ گئی، پھر ان کے پاس سیدنا عمر بن خطاب رضی اللہ عنہ آ گئے، انہوں نے میرے بارے میں پوچھا: اے خلیفۃ المسلمین! یہ کون ہے؟ انہوں نے فرمایا: یہ اس شخص کی بیٹی ہے جو مجھ سے بھی بہتر ہے اور تجھ سے بھی بہتر ہے، انہوں نے کہا: رسول اللہ صلی اللہ علیہ وسلم کے علاوہ اور کون ہو سکتا ہے جو تجھ سے بھی بہتر ہو اور مجھ سے بھی بہتر ہو۔ سیدنا ابوبکر رضی اللہ عنہ نے فرمایا: ایک ایسا آدمی جو رسول اللہ صلی اللہ علیہ وسلم کے زمانہ اقدس میں وفات پا گیا، وہ تو اپنا ٹھکانا جنت میں بنا چکا، جبکہ تو اور میں ابھی اس دنیا میں موجود ہیں۔ (تو بہتر وہی ہوا، جو جنت میں جا چکا ہے) ٭٭ یہ حدیث صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6698]

رسول اللہ صلی اللہ علیہ وسلم کے موذن، عبدالرحمن بن عمار بن سعد القرظ اپنے والد کے حوالے سے ان کے دادا سے روایت کرتے ہیں کہ رسول اللہ صلی اللہ علیہ وسلم نے سیدنا بلال رضی اللہ عنہ کو حکم دیا کہ اذان دیتے ہوئے اپنی انگلیاں اپنے کانوں میں ڈال لیا کریں کیونکہ اس سے آواز زیادہ بلند ہوتی ہے۔ سیدنا بلال کی اذان میں تمام جملے دو دو مرتبہ ہوتے تھے اور اقامت کے الفاظ ایک ایک فقرہ ہوتا تھا، قد قامت الصلاۃ ایک ایک مرتبہ کہتے تھے، آپ رسول اللہ صلی اللہ علیہ وسلم کے زمانے میں جمعہ کی اذان اس وقت کہتے تھے جب سایہ ایک تسمے کے برابر ہو جاتا تھا۔ اور رسول اللہ صلی اللہ علیہ وسلم جب عیدین کے لئے نکلتے تو سیدنا سعد بن ابی وقاص کے گھر کی طرف سے ہوتے ہوئے خیمہ والوں کے پاس سے گزر کر عید گاہ میں تشریف لے جاتے، وہاں خطبہ سے پہلے نماز پڑھاتے، پھر پہلی رکعت میں قراءت سے پہلے سات تکبیریں کہتے اور دوسری رکعت میں قراءت سے پہلے 5 تکبیریں کہتے، پھر خطبہ دیتے، (خطبہ کے بعد دعا وغیرہ سے فارغ ہو کر جب واپس نکلتے تو بنی زریق کا راستہ اختیار کرتے، پھر صحرا کی جانب اپنے ہاتھ سے قربانی کرتے، پھر سیدنا عمار بن یاسر رضی اللہ عنہ کے گھر کی جانب سے ہوتے ہوئے ہموار زمین میں سیدنا ابوہریرہ رضی اللہ عنہ کے گھر کی طرف سے آتے، آپ عیدین میں پیدل ہی عید گاہ کی جانب تشریف لے جاتے اور پیدل ہی واپس تشریف لاتے، آپ دونوں خطبوں کے درمیان اللہ اکبر کہتے، اور خطبہ کے دوران کثرت سے تکبیر کہتے، آپ عصا مبارک ہاتھ میں لئے خطبہ دیا کرتے تھے۔ اور سیدنا بلال جب اذان دیتے تو چہرہ قبلہ کی جانب کرتے، پھر اللہ اکبر اللہ اکبر دو مرتبہ کہتے، اشھد ان لا الہ الا اللہ دو مرتبہ کہتے، اشھد ان محمدا رسول اللہ دو مرتبہ کہتے، یہ کہتے ہوئے آپ کا رخ قبلہ کی جانب ہی ہوتا، پھر قبلہ سے منہ پھیر کر (اپنا چہرہ دائیں جانب کرتے اور) دو مرتبہ حی علی الصلوٰۃ کہتے، پھر اپنے بائیں جانب گھوم جاتے اور دو مرتبہ حی علی الفلاح کہتے، پھر چہرہ قبلہ کی جانب کر لیتے اور اللہ اکبر اللہ اکبر اور لا الہ الا اللہ کہتے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6699]