عبدالرحمن بن عمار بن سعد القرظ (جو رسول اللہ صلی اللہ علیہ وسلم کے مؤذن تھے) اپنے والد اور وہ اپنے دادا سے روایت کرتے ہیں کہ: رسول اللہ صلی اللہ علیہ وسلم نے سیدنا بلال رضی اللہ عنہ کو حکم دیا کہ وہ (اذان دیتے وقت) اپنی انگلیاں اپنے کانوں میں ڈالیں اور فرمایا: ”یہ تمہاری آواز کو زیادہ بلند کرنے کا باعث ہے“، اور بے شک سیدنا بلال رضی اللہ عنہ کی اذان کے کلمات دو دو مرتبہ تھے اور اقامت کے کلمات ایک ایک مرتبہ، جبکہ «قَدْ قَامَتِ الصَّلَاةُ» کے الفاظ ایک ہی مرتبہ کہے جاتے تھے۔ اور یہ کہ وہ جمعہ کے دن رسول اللہ صلی اللہ علیہ وسلم کے سامنے اس وقت اذان دیتے تھے جب سایہ جوتے کے تسمے کے برابر (یعنی زوال کے فوراً بعد) ہوتا تھا۔ اور یہ کہ رسول اللہ صلی اللہ علیہ وسلم جب عیدین کے لیے نکلتے تو سیدنا سعد بن ابی وقاص رضی اللہ عنہ کے گھر کے راستے سے گزرتے، پھر خیمہ والوں کے پاس سے گزرتے، پھر خطبہ سے پہلے نماز شروع فرماتے، پھر پہلی رکعت میں قرأت سے پہلے سات مرتبہ تکبیر کہتے اور دوسری رکعت میں قرأت سے پہلے پانچ مرتبہ، پھر لوگوں کو خطبہ دیتے، پھر دوسرے راستے یعنی بنو زریق کے راستے سے واپس تشریف لاتے اور گلی کے کنارے پر اپنے ہاتھ سے چھری کے ساتھ اپنی قربانی ذبح کرتے، پھر مقامِ بلاط میں سیدنا عمار بن یاسر اور سیدنا ابوہریرہ رضی اللہ عنہما کے گھروں کی طرف تشریف لے جاتے، اور آپ صلی اللہ علیہ وسلم عیدین کے لیے پیدل تشریف لے جاتے اور پیدل ہی واپس آتے، اور خطبہ کے دوران وقفوں میں تکبیر کہتے اور عیدین کے خطبہ میں کثرت سے تکبیریں کہا کرتے تھے، اور جب جنگ کے موقع پر خطبہ دیتے تو کمان پر ٹیک لگا کر دیتے اور جب جمعہ کا خطبہ دیتے تو لاٹھی (عصا) پر ٹیک لگا کر دیتے۔ اور بے شک سیدنا بلال رضی اللہ عنہ جب اذان میں تکبیر کہتے تو قبلہ رخ ہوتے، پھر دو مرتبہ «الله اكبر الله اكبر»، دو مرتبہ «اشهد ان لا اله الا الله»، دو مرتبہ «اشهد ان محمد رسول الله» کہتے ہوئے قبلہ رخ رہتے، پھر قبلہ سے دائیں جانب مڑ کر دو مرتبہ «حي على الصلاة» کہتے، پھر قبلہ سے بائیں جانب مڑ کر دو مرتبہ «حي على الفلاح» کہتے، پھر قبلہ رخ ہو کر کہتے: «الله اكبر الله اكبر، لا اله الا الله» ۔ [المستدرك على الصحيحين/كتاب معرفة الصحابة رضي الله تعالى عنهم/حدیث: 6699]