سیدنا شداد بن الہاد رضی اللہ عنہ فرماتے ہیں: ایک دن رسول اللہ صلی اللہ علیہ وسلم دن کی نمازوں ظہر یا عصر میں سے کسی ایک نماز میں تشریف لائے، آپ نے سیدنا حسن یا (شاید) سیدنا حسین کو اٹھایا ہوا تھا، آپ آگے تشریف لے گئے، اور اپنی دائیں جانب ان کو کھڑا کر لیا، اس نماز میں رسول اللہ صلی اللہ علیہ وسلم نے جب سجدہ کیا تو بہت لمبا کر دیا، میں نے سجدے سے سر اٹھا کر دیکھا تو رسول اللہ صلی اللہ علیہ وسلم سجدے میں تھے اور وہ بچہ حضور صلی اللہ علیہ وسلم کی پشت پر سوار تھا، میں کچھ دیر بیٹھا رہا، پھر سجدے میں چلا گیا، جب رسول اللہ صلی اللہ علیہ وسلم نماز سے فارغ ہوئے تو لوگوں نے پوچھا: یا رسول اللہ صلی اللہ علیہ وسلم آپ نے آج اس نماز میں اتنا طویل سجدہ کیا ہے کہ اس سے پہلے آپ نے کبھی اتنا لمبا سجدہ نہیں کیا، آپ کو کوئی خاص حکم دیا گیا ہے؟ یا آپ پر کوئی وحی نازل ہو رہی تھی؟ آپ صلی اللہ علیہ وسلم نے فرمایا: نہیں نہیں۔ میرا یہ بیٹا مجھ پر سوار ہو گیا تھا، مجھے اچھا نہیں لگا کہ اس کی مرضی کے بغیر اس کو نیچے اتار دوں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6776]

ابوعبیدہ فرماتے ہیں: حارث بن برصاء، یہی حارث بن مالک ہیں، ان کا نسب یوں ہے ” حارث بن مالک بن قیس بن عویذ بن عبداللہ بن جابر بن عبد مناف بن اشجع بن عامر بن لیث “ ان کی والدہ ” برصاء بنت عبداللہ بن ربیعہ ہلالیہ “ ہیں۔ آپ مکہ میں رہے، پھر کوفہ میں رہائش پذیر ہو گئے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6777]