سیدنا براء رضی اللہ عنہ سے روایت ہے کہ مہاجرین میں سے سب سے پہلے جو ہمارے پاس مدینہ آئے وہ سیدنا مصعب بن عمیر رضی اللہ عنہ تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6784]

سیدنا عروہ بن زبیر اپنے والد سے روایت کرتے ہیں، انہوں نے کہا کہ رسول اللہ صلی اللہ علیہ وسلم قباء میں چند لوگوں کے ساتھ تشریف فرما تھے کہ اسی اثنا میں سیدنا مصعب بن عمیر رضی اللہ عنہ سامنے آئے جنہوں نے ایک ایسی چادر اوڑھی ہوئی تھی جو ان کے پورے بدن کو بمشکل چھپا رہی تھی، تو لوگوں نے (ان کی تہی دستی دیکھ کر) سر جھکا لیے، انہوں نے آ کر سلام کیا تو لوگوں نے سلام کا جواب دیا، پھر نبی کریم صلی اللہ علیہ وسلم نے ان کے بارے میں کلماتِ خیر ارشاد فرمائے اور ان کی تعریف کی، پھر فرمایا: ”میں نے اسے مکہ میں اپنے والدین کے پاس دیکھا ہے جہاں وہ اسے بڑی عزت اور ناز و نعمت میں رکھتے تھے اور قریش کا کوئی جوان اس جیسا (خوبصورت و خوشحال) نہ تھا، پھر یہ سب کچھ چھوڑ کر صرف اللہ کی رضا اور اس کے رسول کی نصرت کے لیے نکل کھڑا ہوا، یاد رکھو! تم پر ایسا وقت آئے گا جب فارس اور روم فتح کر لیے جائیں گے، تم میں سے کوئی صبح کو ایک لباس پہنے گا تو شام کو دوسرا، اور صبح و شام تمہارے سامنے (لذیذ کھانوں کے) پیالے بھر بھر کر لائے جائیں گے۔“ صحابہ نے عرض کیا: اے اللہ کے رسول! کیا ہم اس دن بہتر ہوں گے یا آج؟ آپ صلی اللہ علیہ وسلم نے فرمایا: ”بلکہ تم آج کے دن ان (آنے والے) دنوں سے بہتر ہو، کیونکہ اگر تم دنیا کی وہ حقیقت جان لو جو میں جانتا ہوں، تو تمہارے نفس اس سے بیزار ہو جائیں۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6785]