زبیر بن بکار سے روایت ہے کہ عبداللہ بن عامر بن کریز بن ربیعہ بن حبیب بن عبد شمس بن عبدمناف (ان کا نسب ہے)، ان کی والدہ دجاجہ بنت اسماء بن صلت بن حبیب بن حارثہ بن ہلال بن حزام تھیں، سیدنا عثمان بن عفان رضی اللہ عنہ نے انہیں ابوموسیٰ اشعری کو معزول کر کے بصرہ کا گورنر مقرر کیا تھا، تو ابوموسیٰ رضی اللہ عنہ نے (ان کے بارے میں) فرمایا: ”تمہارے پاس قریش کا ایک ایسا نوجوان آیا ہے جس کی مائیں، پھوپھیاں اور خالائیں سب نہایت معزز ہیں، وہ تم میں مال کو اس اس طرح (بکثرت) تقسیم کرے گا۔“ وہ بہت سے مناقب کے حامل تھے، انہوں نے ہی خراسان فتح کیا، اور اللہ تعالیٰ کے شکرانے کے طور پر نیشاپور سے احرام باندھا، اور میدانِ عرفات میں پانی پلانے کے انتظامات (سبیلیں) کیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6841]

سیدنا عبداللہ بن عامر بن کریز اور سیدنا عبداللہ بن زبیر رضی اللہ عنہما سے روایت ہے کہ نبی کریم صلی اللہ علیہ وسلم نے فرمایا: ”جو اپنے مال کی حفاظت کرتے ہوئے قتل کر دیا جائے وہ شہید ہے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6842]