ابراہیم بن اسحاق حربی سے روایت ہے کہ ابو العاص بن ربیع رسول اللہ صلی اللہ علیہ وسلم کی صاحبزادی سیدہ زینب رضی اللہ عنہا کے شوہر اور ان کے خالہ زاد تھے، ان کی والدہ ہالہ بنت خویلد سیدہ خدیجہ رضی اللہ عنہا کی بہن تھیں، اور ابوالعاص کا (اصل) نام مہشم تھا، انہیں ”جرو البطحاء“ کا لقب دیا گیا تھا، سیدہ زینب رضی اللہ عنہا سے ابو العاص کے دو بچے علی اور امامہ پیدا ہوئے، ابوالعاص کی وفات سنہ 11 ہجری میں حضرت ابوبکر رضی اللہ عنہ کی خلافت کے دوران ہوئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6838]

سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے سیدہ زینب رضی اللہ عنہا کو ابو العاص کے پاس پہلے نکاح ہی پر لوٹا دیا تھا اور ان کے درمیان کسی نئے نکاح کا اضافہ نہیں کیا تھا۔
یہ اسناد امام مسلم کی شرط پر صحیح ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6839]

سیدنا عبداللہ بن عمرو بن عاص رضی اللہ عنہما سے روایت ہے، انہوں نے کہا کہ سیدہ زینب رضی اللہ عنہا اپنے شوہر ابوالعاص سے ایک سال پہلے ایمان لائی تھیں، پھر جب ابوالعاص ایمان لائے تو نبی کریم صلی اللہ علیہ وسلم نے انہیں (زینب کو) نئے نکاح کے ساتھ ان کے پاس لوٹایا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6840]