سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے اپنی ازواج سے فرمایا: ”تم میں سے سب سے پہلے مجھ سے وہ ملے گی جس کا ہاتھ سب سے لمبا ہو گا۔“ سیدہ عائشہ رضی اللہ عنہا فرماتی ہیں کہ رسول اللہ صلی اللہ علیہ وسلم کی وفات کے بعد جب ہم کسی کے گھر جمع ہوتیں تو دیوار پر اپنے ہاتھ رکھ کر ایک دوسرے سے تقابلی لمبائی ناپتیں، ہم ایسا ہی کرتی رہیں یہاں تک کہ سیدہ زینب بنت جحش رضی اللہ عنہا کی وفات ہو گئی، وہ پستہ قد خاتون تھیں اور ہم میں سب سے طویل القامت نہ تھیں، تب ہمیں سمجھ آئی کہ نبی کریم صلی اللہ علیہ وسلم کی مراد ہاتھ کی لمبائی سے صدقہ و خیرات تھی، سیدہ عائشہ فرماتی ہیں: ”سیدہ زینب رضی اللہ عنہا اپنے ہاتھوں سے کام کرنے کا ہنر جانتی تھیں، وہ چمڑا رنگتیں اور سیتی تھیں اور اسے اللہ کی راہ میں صدقہ کر دیتی تھیں۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6939]

سیدنا عامر سے روایت ہے کہ سیدہ زینب بنت جحش رضی اللہ عنہا نبی کریم صلی اللہ علیہ وسلم سے عرض کیا کرتی تھیں: ”میرا آپ پر تمام ازواج سے بڑا حق ہے، میرا نکاح سب سے بہتر ہوا، میرا قاصد سب سے معزز تھا اور میں رشتہ داری میں آپ کے سب سے قریب ہوں“، پھر وہ کہتی تھیں: ”میرا نکاح رحمن عزوجل نے اپنے عرش کے اوپر سے آپ سے کیا اور جبرائیل علیہ السلام اس کے قاصد تھے، اور میں آپ کی پھوپھی کی بیٹی ہوں، آپ کی ازواج میں سے میرے سوا کوئی آپ کی اتنی قریبی رشتہ دار نہیں۔“ (جیسا کہ میں نے ذکر کیا کہ ان کی والدہ امیمہ بنت عبدالمطلب نبی کریم صلی اللہ علیہ وسلم کی پھوپھی تھیں)۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6940]