سیدہ جویریہ بنت حارث رضی اللہ عنہا سے روایت ہے، انہوں نے فرمایا: ”نبی کریم صلی اللہ علیہ وسلم کی تشریف آوری سے تین رات پہلے میں نے خواب دیکھا کہ گویا چاند یثرب سے چل کر آیا اور میری گود میں آ گرا، میں نے یہ بات کسی کو بتانا پسند نہ کیا یہاں تک کہ رسول اللہ صلی اللہ علیہ وسلم تشریف لے آئے، جب ہم قید ہوئے تو مجھے اپنے خواب کی تعبیر کی امید ہوئی، پھر جب آپ صلی اللہ علیہ وسلم نے مجھے آزاد کر کے مجھ سے نکاح فرما لیا تو اللہ کی قسم! میں نے اپنی قوم کے بارے میں آپ صلی اللہ علیہ وسلم سے کوئی بات نہ کی یہاں تک کہ مسلمانوں نے خود ہی انہیں رہا کر دیا، مجھے تو اس وقت پتا چلا جب میری ایک چچا زاد لڑکی نے آ کر مجھے یہ خبر دی، جس پر میں نے اللہ عزوجل کا شکر ادا کیا۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6948]

محمد بن اسحاق سے مروی ہے کہ سیدہ جویریہ بنت حارث کا نام پہلے ”برہ“ تھا، وہ حارث بن ابی ضرار کی صاحبزادی تھیں اور قبیلہ خزاعہ کی شاخ بنو مصطلق سے تعلق رکھتی تھیں، وہ اپنے چچا زاد مسافع بن صفوان بن ذی الشفرین کے نکاح میں تھیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6949]

سیدہ جویریہ بنت حارث رضی اللہ عنہا سے روایت ہے کہ ان کا نام پہلے ”برہ“ تھا، تو رسول اللہ صلی اللہ علیہ وسلم نے اسے تبدیل کر کے ان کا نام ”جویریہ“ رکھ دیا کیونکہ آپ صلی اللہ علیہ وسلم کو یہ بات ناپسند تھی کہ یہ کہا جائے: ”وہ برہ (نیکی) کے پاس سے نکل کر آئے ہیں۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6950]

سیدنا عمر رضی اللہ عنہ سے روایت ہے کہ رسول اللہ صلی اللہ علیہ وسلم نے سیدہ جویریہ رضی اللہ عنہا کے لیے پردے کا حکم دیا اور ان کے لیے بھی ویسا ہی وقت تقسیم فرماتے تھے جیسا کہ اپنی دیگر ازواج کے لیے فرماتے تھے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6951]

ام المؤمنین سیدہ جویریہ بنت حارث رضی اللہ عنہا سے روایت ہے کہ رسول اللہ صلی اللہ علیہ وسلم ان کے پاس تشریف لائے اور دریافت فرمایا: ”کیا کھانے کے لیے کچھ ہے؟“ انہوں نے عرض کی: اللہ کی قسم! یا رسول اللہ، ہمارے پاس کھانے کو کچھ نہیں سوائے بکری کی ایک ہڈی کے جو میری لونڈی کو صدقے میں دی گئی تھی، تو آپ صلی اللہ علیہ وسلم نے فرمایا: ”اسے قریب لے آؤ، کیونکہ یہ اب اپنے حلال ٹھکانے تک پہنچ گئی ہے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6952]