سیدنا عبداللہ بن جعفر بن ابی طالب رضی اللہ عنہما سے روایت ہے، انہوں نے کہا کہ میں نے سیدہ ام ہانی فاختہ بنت ابی طالب رضی اللہ عنہا کو فرماتے ہوئے سنا: ”میں نے رسول اللہ صلی اللہ علیہ وسلم کو فتح مکہ والے سال ایک ہی کپڑے میں لپٹے ہوئے آٹھ رکعات نماز پڑھتے دیکھا۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7044]

محمد بن عمر سے مروی ہے کہ اس بات کا تذکرہ کیا گیا ہے کہ رسول اللہ صلی اللہ علیہ وسلم نے وحی کے آغاز سے پہلے اپنے چچا ابوطالب سے ام ہانی کے نکاح کا پیغام دیا تھا، ان کے ساتھ ہی ہبیرہ بن ابی وہب نے بھی پیغام نکاح دیا، تو ابوطالب نے ان کا نکاح ہبیرہ سے کر دیا۔ نبی کریم صلی اللہ علیہ وسلم نے ان سے فرمایا: ”اے چچا! آپ نے ہبیرہ سے نکاح کر دیا اور مجھے چھوڑ دیا؟“ انہوں نے جواب دیا: اے بھتیجے! میں نے ان کے ہاں سسرالی رشتہ کیا ہے اور شریف انسان شریف کا ہی بدلہ (لحاظ) کرتا ہے۔ پھر وہ (ام ہانی) اسلام لے آئیں تو اسلام نے ان کے اور ہبیرہ کے درمیان جدائی کر دی، پھر رسول اللہ صلی اللہ علیہ وسلم نے انہیں خود نکاح کا پیغام دیا تو انہوں نے عرض کیا: اللہ کی قسم! میں جاہلیت کے دور میں بھی آپ سے محبت (و عقیدت) رکھتی تھی، تو اب اسلام کے دور میں میرا کیا حال ہوگا! (یعنی اب تو محبت بدرجہ اولیٰ زیادہ ہے)۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7045]

سیدہ ام ہانی رضی اللہ عنہا سے روایت ہے کہ رسول اللہ صلی اللہ علیہ وسلم نے مجھے نکاح کا پیغام دیا تو میں نے معذرت کر لی اور آپ صلی اللہ علیہ وسلم نے میری معذرت قبول فرما لی، پھر اللہ عزوجل نے یہ آیت نازل فرمائی: ﴿يَاأَيُّهَا النَّبِيُّ إِنَّا أَحْلَلْنَا لَكَ أَزْوَاجَكَ اللَّاتِي آتَيْتَ أُجُورَهُنَّ﴾ سے لے کر ﴿اللَّاتِي هَاجَرْنَ مَعَكَ﴾ ”اے نبی! ہم نے آپ کے لیے آپ کی وہ بیویاں حلال کر دی ہیں جن کے مہر آپ نے ادا کر دیے ہیں... اور وہ عورتیں جنہوں نے آپ کے ساتھ ہجرت کی۔“ [سورة الأحزاب: 50] تک۔ سیدہ ام ہانی رضی اللہ عنہا نے فرمایا: میں آپ صلی اللہ علیہ وسلم کے لیے حلال نہیں تھی کیونکہ میں نے آپ صلی اللہ علیہ وسلم کے ساتھ ہجرت نہیں کی تھی بلکہ میں ”طلقاء“ (فتح مکہ کے موقع پر آزاد کردہ لوگوں) میں سے تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7046]