سیدنا عبداللہ بن حارث رضی اللہ عنہ سے روایت ہے کہ سیدنا ابن عباس رضی اللہ عنہما چاشت کی نماز نہیں پڑھتے تھے یہاں تک کہ ہم انہیں سیدہ ام ہانی رضی اللہ عنہا کے پاس لے گئے، میں نے ان سے عرض کیا: ابن عباس رضی اللہ عنہما کو وہ بات بتائیے جو آپ نے ہمیں بتائی تھی، تو سیدہ ام ہانی رضی اللہ عنہا نے فرمایا: رسول اللہ صلی اللہ علیہ وسلم میرے گھر تشریف لائے اور آپ صلی اللہ علیہ وسلم نے آٹھ رکعات چاشت کی نماز ادا فرمائی، تو سیدنا ابن عباس رضی اللہ عنہما یہ کہتے ہوئے نکلے: میں نے قرآن کے دونوں گتوں کے درمیان موجود سارا کلام پڑھ لیا تھا لیکن مجھے نمازِ اشراق کی پہچان اب ہوئی ہے (جبکہ قرآن میں ہے): ﴿يُسَبِّحْنَ بِالْعَشِيِّ وَالْإِشْرَاقِ﴾ ”وہ شام کو اور صبح (اشراق کے وقت) تسبیح کرتے ہیں۔“ [سورة ص: 18] پھر ابن عباس رضی اللہ عنہما نے فرمایا: یہی نمازِ اشراق ہے۔
عبداللہ بن عباس رضی اللہ عنہما نے ام ہانی سے ایک اور حدیث بھی روایت کی ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7047]

سیدنا عبداللہ بن عباس رضی اللہ عنہما سے روایت ہے کہ سیدہ ام ہانی بنت ابی طالب رضی اللہ عنہا نے انہیں بتایا کہ انہوں نے عرض کیا: یا رسول اللہ! میرے ماں جائے بھائی علی (رضی اللہ عنہ) کا گمان ہے کہ وہ اس شخص کو قتل کر دیں گے جسے میں نے پناہ دی ہے، تو رسول اللہ صلی اللہ علیہ وسلم نے فرمایا: ”جسے تم نے پناہ دی، اسے ہم نے بھی پناہ دے دی۔“
عبداللہ بن عباس رضی اللہ عنہما کی ام ہانی رضی اللہ عنہا سے تیسری حدیث۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7048]