سیدہ امیمہ بنت رقیقہ تمیمیہ رضی اللہ عنہا سے روایت ہے کہ میں نے مسلمان خواتین کے ہمراہ رسول اللہ صلی اللہ علیہ وسلم کی بیعت کی، ہم نے عرض کیا: یا رسول اللہ! ہم آپ صلی اللہ علیہ وسلم کے پاس اس بات پر بیعت کرنے آئی ہیں کہ ہم اللہ کے ساتھ کسی کو شریک نہیں ٹھہرائیں گی، چوری نہیں کریں گی، بدکاری نہیں کریں گی، اپنی اولاد کو قتل نہیں کریں گی، اپنے ہاتھوں اور پاؤں کے درمیان کوئی بہتان گھڑ کر نہیں لائیں گی اور کسی نیک کام میں آپ صلی اللہ علیہ وسلم کی نافرمانی نہیں کریں گی، تو رسول اللہ صلی اللہ علیہ وسلم نے فرمایا: ”ان کاموں میں جن کی تم میں طاقت اور استطاعت ہو“، ہم نے عرض کیا کہ اللہ اور اس کے رسول ہم پر ہماری اپنی جانوں سے بھی زیادہ مہربان ہیں، پھر ہم نے کہا: یا رسول اللہ! ہم سے بیعت لیجیے، آپ صلی اللہ علیہ وسلم نے فرمایا: ”جاؤ، میں نے تم سے بیعت لے لی ہے، میرا ایک عورت سے کلام کرنا ویسا ہی ہے جیسا سو عورتوں سے کلام کرنا“، اور رسول اللہ صلی اللہ علیہ وسلم نے ہم میں سے کسی خاتون سے مصافحہ نہیں فرمایا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7123]