سیدنا عبداللہ بن عمرو رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: وہ شخص کامیاب ہے جو مسلمان ہوا، اس کو گزارے لائق رزق ملا، اور اللہ تعالیٰ نے اس کو جو کچھ عطا کیا اس پر اس کو قناعت کرنے کی توفیق دی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كِتَابُ الْأَطْعِمَةِ/حدیث: 7326]

ابوواقد لیثی فرماتے ہیں: اسلام سے پہلے، زمانہ جاہلیت میں لوگ اونٹوں کی کوہانیں کاٹ لیتے تھے، اور بکریوں کی رانوں کا گوشت کاٹ کر کھا لیتے تھے اور ان کی چربی سنبھال لیتے تھے، جب نبی اکرم صلی اللہ علیہ وسلم تشریف لائے تو انہوں نے آپ صلی اللہ علیہ وسلم سے اس بارے میں پوچھا: آپ صلی اللہ علیہ وسلم نے فرمایا: جو گوشت زندہ جانور سے کاٹ لیا گیا ہو وہ گوشت مردار ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اس حدیث کی سند زید بن اسلم کے بعد عطاء بن یسار کے واسطے سے بھی ابوسعید خدری رضی اللہ عنہ تک پہنچتی ہے۔ (جیسا کہ درج ذیل ہے) [المستدرك على الصحيحين/كِتَابُ الْأَطْعِمَةِ/حدیث: 7327]

سیدنا ابوسعید خدری رضی اللہ عنہ فرماتے ہیں: رسول اللہ صلی اللہ علیہ وسلم سے اونٹوں کی کوہانیں اور بکریوں کی رانیں کاٹنے کے بارے میں پوچھا گیا تو حضور صلی اللہ علیہ وسلم نے فرمایا: زندہ جانور سے جو حصہ کاٹ لیا جاتا ہے وہ مردار ہے۔ ٭٭ عبدالرحمن بن مہدی نے اس حدیث کو سلیمان بن بلال کے واسطے سے زید بن اسلم سے مرسلاً روایت کیا ہے۔ اور یہ بھی کہا گیا ہے کہ زید بن اسلم نے اس حدیث کو سیدنا عبداللہ بن عمر رضی اللہ عنہما سے روایت کیا ہے۔ (جیسا کہ درج ذیل ہے)۔ [المستدرك على الصحيحين/كِتَابُ الْأَطْعِمَةِ/حدیث: 7328]