سیدنا ابوہریرہ رضی اللہ عنہ فرماتے ہیں کہ جب تم اپنے کسی مسلمان بھائی کے پاس جاؤ، وہ تمہیں کھانے کو کچھ پیش کرے تو کھا لو اور اس سے کوئی تحقیق نہ کرو، اور تمہیں پینے کے لئے کچھ پیش کریں تو پی لو اور کوئی سوال مت کرو۔ [المستدرك على الصحيحين/كِتَابُ الْأَطْعِمَةِ/حدیث: 7338]

سیدنا عبدالرحمن بن سمرہ فرماتے ہیں کہ نبی اکرم صلی اللہ علیہ وسلم نے ارشاد فرمایا: میرے بعد آنے والے امراء سے اللہ تعالیٰ تجھے بچائے، سیدنا عبدالرحمن رضی اللہ عنہ نے عرض کی: یا رسول اللہ صلی اللہ علیہ وسلم وہ کون ہیں؟ آپ صلی اللہ علیہ وسلم نے ارشاد فرمایا: جو شخص ان کے پاس جا کر ان کی تصدیق کرے، اور ظلم پر ان کی مدد کرے، وہ میرے طریقے پر نہیں ہے اور نہ ہی وہ میرے حوض کوثر پر آ سکے گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ سیدنا جابر رضی اللہ عنہ سے مروی (درج ذیل) حدیث اس حدیث کی شاہد ہے۔ [المستدرك على الصحيحين/كِتَابُ الْأَطْعِمَةِ/حدیث: 7339]

سیدنا جابر بن عبداللہ رضی اللہ عنہما فرماتے ہیں کہ نبی اکرم صلی اللہ علیہ وسلم نے ارشاد فرمایا: اے کعب بن عجرہ اللہ تعالیٰ تجھے بے وقوفوں کی امارت سے بچائے۔ انہوں نے پوچھا: بے وقوفوں کی امارت کیا ہے؟ فرمایا: میرے بعد کچھ امراء ہوں گے، میری ہدایت کو نہیں اپنائیں گے، نہ میری سنت پر عمل کریں گے، جس نے ان کے جھوٹ کو سچ کہا، اور ظلم پر ان کی مدد کی، وہ مجھ سے نہیں، میں ان سے نہیں، نہ ہی وہ لوگ میرے حوض کوثر پر آئیں گے۔ اور جس نے ان کے جھوٹ کو سچ نہ کہا، ظلم پر ان کی معاونت نہ کی، وہ مجھ سے ہیں اور میں ان سے ہوں، وہ میرے حوض کوثر پر آئیں گے۔ اے کعب بن عجرہ وہ گوشت جنت میں نہیں جا سکتا، جس کی پرورش حرام سے ہوئی ہو، اس کو تو آگ ہی مناسب ہے، اے کعب بن عجرہ روزہ ڈھال ہے، اور صدقہ گناہوں کو مٹا دیتا ہے، اور نماز قربان ہے یا (شاید فرمایا) برہان ہے۔ نبی اکرم صلی اللہ علیہ وسلم کے یہ الفاظ ” لحم نبت من سحت “ سیدنا ابوبکر صدیق رضی اللہ عنہ اور سیدنا عمر رضی اللہ عنہ سے بھی مروی ہیں۔ سیدنا ابوبکر صدیق رضی اللہ عنہ سے مروی حدیث (درج ذیل ہے) [المستدرك على الصحيحين/كِتَابُ الْأَطْعِمَةِ/حدیث: 7340]

سیدنا ابوبکر رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: جس کا گوشت حرام سے پلا ہو گا، وہ دوزخ کے زیادہ لائق ہے۔ سیدنا عمر رضی اللہ عنہ سے مروی حدیث درج ذیل ہے [المستدرك على الصحيحين/كِتَابُ الْأَطْعِمَةِ/حدیث: 7341]

سیدنا عمر بن خطاب رضی اللہ عنہ فرماتے ہیں: جس کا گوشت حرام سے پلا، وہ دوزخ کا مستحق ہے۔ [المستدرك على الصحيحين/كِتَابُ الْأَطْعِمَةِ/حدیث: 7342]

بنی فہم کے بھائی مستورد بن شداد فرماتے ہیں کہ رسول اللہ صلی اللہ علیہ وسلم نے ارشاد فرمایا: جس نے کسی مسلمان کی بدخواہی کر کے ایک لقمہ بھی کھایا، اللہ تعالیٰ قیامت کے دن اس کے برابر دوزخ کی آگ (کے کھانوں میں) سے کھلائے گا۔ اور جس نے کسی کو ریاکاری اور دکھلاوے کے مقام پر کھڑا کیا، قیامت کے دن اللہ تعالیٰ بھی اس کو ریاء اور دکھلاوے کے مقام پر کھڑا کرے گا۔ (یعنی جس نے کسی مالدار کی اس لئے تعریف کی کہ یہ خوش ہو کر مجھے نوازے گا۔ تو اس نے اس مال دار کو ریاکاری کی جگہ کھڑا کر دیا۔) اور جس نے کسی مسلمان کو تکلیف دے کر کپڑا پہنا، اللہ تعالیٰ قیامت کے دن اس کی مثل اس کو دوزخ کی آگ کا لباس پہنائے گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَطْعِمَةِ/حدیث: 7343]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم منبر پر فرمایا کرتے تھے: میں دو کمزروں (یتیم اور عورت) کے مال کی ذمہ داری کو بہت اہم سمجھتا ہوں۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْأَطْعِمَةِ/حدیث: 7344]