ام المومنین سیدہ عائشہ رضی اللہ عنہا فرماتی ہیں: ام سنبلہ نے رسول اللہ صلی اللہ علیہ وسلم کو دودھ ہدیہ دیا، (قصہ یوں ہے کہ) وہ دودھ لے کر میرے پاس آئیں، حضور صلی اللہ علیہ وسلم گھر میں موجود نہ تھے، میں نے ام سنبلہ سے کہا: رسول اللہ صلی اللہ علیہ وسلم نے ہمیں دیہاتیوں کے کھانے کھانے سے منع فرمایا ہے، (کچھ ہی دیر میں) رسول اللہ صلی اللہ علیہ وسلم اور سیدنا ابوبکر صدیق رضی اللہ عنہ تشریف لے آئے، حضور صلی اللہ علیہ وسلم نے فرمایا: اے ام سنبلہ! یہ تیرے پاس کیا ہے؟ اس نے کہا: یا رسول اللہ صلی اللہ علیہ وسلم یہ دودھ ہے، میں آپ کے لئے ہدیہ کے طور پر لائی ہوں، حضور صلی اللہ علیہ وسلم نے فرمایا: اے ام سنبلہ! اس کو انڈیل دو، یہ دودھ سیدنا ابوبکر رضی اللہ عنہ نے تھام لیا، حضور صلی اللہ علیہ وسلم نے پھر فرمایا: اے ام سنبلہ اس کو انڈیل دو، پھر حضور صلی اللہ علیہ وسلم نے وہ دودھ لیا اور پیا، ام سلمہ کہتی ہیں: میں نے کہا: دل ٹھنڈا ہو گیا۔ ام المومنین سیدہ عائشہ رضی اللہ عنہا نے کہا: یا رسول اللہ صلی اللہ علیہ وسلم آپ نے تو ہمیں دیہاتیوں کے کھانے کھانے سے منع کیا ہے، نبی اکرم صلی اللہ علیہ وسلم نے فرمایا: اے عائشہ! یہ لوگ دیہاتی نہیں ہیں، یہ ہمارے قرب و جوار کے لوگ ہیں اور ہم ان کے شہری ہیں۔ ان کو جب بھی بلایا جاتا ہے، یہ آتے ہیں، اس لئے یہ دیہاتی نہیں ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَطْعِمَةِ/حدیث: 7345]