سیدنا عبداللہ بن عباس رضی اللہ عنہما فرماتے ہیں کہ نبی اکرم صلی اللہ علیہ وسلم نے ارشاد فرمایا: جب سیدنا سلیمان علیہ السلام رمضان میں قیام کرتے، تو اپنے سامنے کوئی درخت اگتا ہوا دیکھتے، آپ اس سے پوچھتے کہ تیرا نام کیا ہے؟ وہ اپنا نام بتا دیتا، آپ پوچھتے کہ تمہارا فائدہ کیا ہے؟ وہ اپنے فوائد بتا دیتا، اگر وہ کسی دوائی کے کام آتا تو لکھ لیا جاتا، اگر وہ بونے کا ہوتا تو اسے بو دیا جاتا۔ ایک دفعہ کا ذکر ہے، آپ نماز پڑھ رہے تھے، آپ کے سامنے ایک درخت اگا، آپ نے اس کا نام پوچھا، اس نے بتایا کہ میرا نام ” خرنوب “ ہے، آپ نے پوچھا: تمہارا فائدہ کیا ہے؟ اس نے کہا: میں جس گھر میں اگتا ہوں، وہ گھر برباد ہو جاتا ہے، سیدنا سلیمان علیہ السلام نے دعا مانگی ” یا اللہ! جنات سے میری موت کو پوشیدہ رکھنا، تاکہ لوگوں کو پتہ چل جائے کہ جنات غیب نہیں جانتے۔ راوی کہتے ہیں: سیدنا سلیمان علیہ السلام نے اپنا عصا زمین پر گاڑا اور اس پر ٹیک لگا لی، اسی دوران آپ کی روح پرواز کر گئی اور پورا ایک سال آپ اسی کیفیت میں اس پر ٹیک لگا کر کھڑے رہے، اور جنات مسلسل کام کرتے رہے، جب زمین نے اس عصا کو کھا لیا، تو عصا گر گیا، (اس وجہ سے سیدنا سلیمان علیہ السلام بھی گر گئے) جب آپ گرے تو تمام انسانوں پر یہ بات واضح ہو گئی کہ جنات کو غیب کا علم نہیں ہے (کیونکہ اگر ان کو غیب کا علم ہوتا تو سیدنا سلیمان علیہ السلام کی وفات سے بے خبر نہ رہتے) راوی کہتے ہیں: جنات نے زمین کا شکریہ ادا کیا، اور شکرانے کے طور پر اس پر پانی لے کر آئے، سیدنا عبداللہ بن عباس رضی اللہ عنہما یہ حدیث اسی طرح روایت کیا کرتے تھے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الطِّبِّ/حدیث: 7616]