سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جو اللہ تعالیٰ کو اپنے دل میں یاد کرتا ہے، اللہ تعالیٰ بھی اس کو (اپنی شایان شان) اپنے دل میں یاد کرتا ہے اور جو شخص اللہ تعالیٰ کو محفل میں یاد کرتا ہے، اللہ تعالیٰ اس کو اس سے زیادہ اچھی اور پاکیزہ محفل میں یاد کرتا ہے، اور جو ایک بالشت اللہ تعالیٰ کے قریب جاتا ہے، اللہ تعالیٰ ایک ہاتھ اس کے قریب آتا ہے، اور جو ایک ہاتھ اللہ تعالیٰ کے قریب جاتا ہے، اللہ تعالیٰ ایک باع (دونوں بازؤوں کے پھیلانے کی مقدار جو کہ تقریباً 6 فٹ ہوتی ہے) اس کے قریب آتا ہے۔ جو اللہ تعالیٰ کی جانب چل کر جاتا ہے اللہ تعالیٰ اس کی جانب دوڑ کر آتا ہے اور جو اللہ تعالیٰ کی طرف دوڑ کر جاتا ہے، اللہ تعالیٰ اس کی جانب اس سے بھی زیادہ تیز دوڑ کر آتا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو اس اسناد کے ہمراہ نقل نہیں کیا۔ اور اس کی سند میں جو ابوعبدالرحمن ہیں، یہ عبداللہ بن حبیب سلمی ہیں۔ [المستدرك على الصحيحين/كِتَابُ التَّوْبَةِ وَالْإِنَابَةِ/حدیث: 7817]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: میری تمام امت جنت میں جائے گی سوائے اس شخص کے جس نے انکار کیا اور بدکے ہوئے اونٹ کی مانند اپنے اللہ سے بدک گیا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ تاہم امام بخاری نے سیدنا ابوہریرہ رضی اللہ عنہ کے حوالے سے رسول اللہ صلی اللہ علیہ وسلم کا یہ ارشاد نقل کیا ہے کہ ” میرا ہر امتی جنت میں جائے گا سوائے اس کے جس نے انکار کیا۔ آپ صلی اللہ علیہ وسلم سے پوچھا گیا: یا رسول اللہ صلی اللہ علیہ وسلم انکار کس نے کیا؟ آپ صلی اللہ علیہ وسلم نے فرمایا: جس نے میری نافرمانی کی، اس نے میرا انکار کیا۔ اور سابقہ متن سیدنا ابوامامہ باہلی رضی اللہ عنہ سے بھی مروی ہے۔ [المستدرك على الصحيحين/كِتَابُ التَّوْبَةِ وَالْإِنَابَةِ/حدیث: 7818]