علی بن خالد بیان کرتے ہیں: سیدنا ابوامامہ باہلی رضی اللہ عنہ کا گزر سیدنا خالد بن یزید بن معاویہ کے پاس سے ہوا، خالد نے ابوامامہ سے پوچھا: تم نے رسول اللہ صلی اللہ علیہ وسلم سے سب سے آسان کلمہ کون سا سنا ہے؟ انہوں نے فرمایا: میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ ” تم سب لوگ جنت میں جاؤ گے سوائے اس شخص کے جو اپنے اللہ کی اس طرح نافرمانی کرتا ہے جیسے کوئی اونٹ اپنے مالک کی نافرمانی کرتا ہے “۔ [المستدرك على الصحيحين/كِتَابُ التَّوْبَةِ وَالْإِنَابَةِ/حدیث: 7819]

سیدنا سلمان فارسی رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا ہے کہ اللہ تعالیٰ نے جب زمین اور آسمان پیدا کیے اس وقت سو رحمتیں بھی پیدا کیں، ہر رحمت زمین و آسمان سے بڑی ہے، ان سو میں سے ایک رحمت اللہ تعالیٰ نے اپنی مخلوقات میں تقسیم فرما دی، اسی رحمت کے باعث ماں اپنی اولاد پر رحم کرتی ہے، اسی کے باعث وحشی جانور اور پرندے پانی پیتے ہیں، اسی کے باعث مخلوقات ایک دوسرے پر رحم کرتی ہے۔ قیامت کے دن یہ ساری رحمت صرف متقی لوگوں کے لیے خاص کر دی جائے گی، اور رحمت کے باقی 99 حصے بھی ان کو دے دیئے جائیں گے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ تاہم انہوں نے سلیمان تیمی کے واسطے سے، ابوعثمان کے حوالے سے سیدنا سلیمان رضی اللہ عنہ کی مختصراً روایت نقل کی ہے۔ اور وہ روایت بالکل اسی جیسی ہے جو زہری نے سعید کے واسطے سے سیدنا ابوہریرہ سے روایت کی ہے۔ [المستدرك على الصحيحين/كِتَابُ التَّوْبَةِ وَالْإِنَابَةِ/حدیث: 7820]

محمد بن سیرین روایت کرتے ہیں، سیدنا ابوہریرہ رضی اللہ عنہ مروی ہے کہ رسول اللہ صلی اللہ علیہ وسلم نے ارشاد فرمایا: اللہ تعالیٰ کی 100 رحمتیں ہیں، ان میں سے ایک رحمت اس نے دنیا والوں میں تقسیم کر دی ہے، وہ رحمت ان کی وفات تک ان کو شامل ہے۔ اور 99 رحمتیں اللہ تعالیٰ نے اپنے دوستوں کے لیے سنبھال کر رکھی ہیں۔ اور جو رحمت اللہ تعالیٰ نے دنیا والوں میں تقسیم کی ہوئی ہے، اس کو بھی وہ واپس لے لے گا اور قیامت کے دن اپنے دوستوں کو پوری 100 رحمتیں عطا کرے گا۔ ٭٭ یہ حدیث امام بخاری رحمۃ اللہ علیہ امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ التَّوْبَةِ وَالْإِنَابَةِ/حدیث: 7821]