سیدنا جابر بن عبداللہ رضی اللہ عنہما سے روایت ہے، انہوں نے کہا: انصار کے ہاں ایک بچہ پیدا ہوا تو انہوں نے اس کا نام ”محمد“ رکھنے کا ارادہ کیا، وہ اسے لے کر رسول اللہ صلی اللہ علیہ وسلم کی خدمت میں حاضر ہوئے، آپ صلی اللہ علیہ وسلم نے فرمایا: ”انصار نے بہت اچھا کیا، میرے نام پر نام رکھو لیکن میری کنیت اختیار نہ کرو، کیونکہ میں «قَاسِمًا» ”تقسیم کرنے والا“ بنا کر بھیجا گیا ہوں تاکہ تمہارے درمیان تقسیم کروں۔“
یہ حدیث شیخین کی شرط پر صحیح ہے، اور ان دونوں نے اس میں جریر کی منصور سے روایت پر اتفاق کیا ہے لیکن اس سیاق کے ساتھ نہیں۔ [المستدرك على الصحيحين/كِتَابُ الْأَدَبِ/حدیث: 7928]

سیدنا جابر بن عبداللہ رضی اللہ عنہما نبی کریم صلی اللہ علیہ وسلم سے اسی کے مثل روایت کرتے ہیں۔ [المستدرك على الصحيحين/كِتَابُ الْأَدَبِ/حدیث: 7929]

محمد بن حنفیہ اپنے والد سیدنا علی رضی اللہ عنہ سے روایت کرتے ہیں، انہوں نے کہا: میں نے عرض کیا: اے اللہ کے رسول صلی اللہ علیہ وسلم ! آپ کے بعد اگر میرے ہاں کوئی بچہ پیدا ہو، تو کیا میں اس کا نام آپ کے نام پر اور اس کی کنیت آپ کی کنیت پر رکھ سکتا ہوں؟ آپ صلی اللہ علیہ وسلم نے فرمایا: ”ہاں۔“ سیدنا علی رضی اللہ عنہ فرماتے ہیں کہ یہ میرے لیے ایک خاص رخصت تھی۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا، اور شاید کسی کو یہ وہم ہو کہ شیخین نے فطر (راوی) سے روایت نہیں کی، حالانکہ ایسا نہیں ہے، ان دونوں نے ایک ہی سند میں اسے کسی دوسرے راوی کے ساتھ ملا کر ذکر کیا ہے۔ ائمہ نے یہاں ایک بڑا باب اس بارے میں ذکر کیا ہے کہ آدمی کا اپنی بیوی کو اس کے نام سے پکارنا جائز ہے (عام لوگوں کے اس خیال کے برعکس کہ یہ جائز نہیں)، اس سلسلے میں آپ صلی اللہ علیہ وسلم کا سیدہ عائشہ کو ”یا عائشہ“ اور ”یا عائش“ اور سیدہ ام سلمہ کو ”یا ام سلمہ“ کہنا ثابت ہے لیکن میں نے انہیں طوالت سے بچنے کے لیے چھوڑ دیا ہے کیونکہ شیخین نے ان میں سے اکثر پر اتفاق کیا ہے۔ [المستدرك على الصحيحين/كِتَابُ الْأَدَبِ/حدیث: 7930]