عبداللہ بن مطیع بن الاسود اپنے والد کا یہ بیان نقل کرتے ہیں کہ میں نے فتح مکہ کے موقع پر رسول اللہ صلی اللہ علیہ وسلم کو یہ فرماتے ہوئے سنا ہے کہ ” آج کے بعد قیامت تک کسی قریشی کو قتل کے لیے بند نہیں کیا جائے گا “ آپ فرماتے ہیں: منکرین قریش میں سے میرے باپ کے سوا کسی نے اسلام نہیں پایا۔ ان کا نام ” العاص “ تھا۔ رسول اللہ صلی اللہ علیہ وسلم نے ان کا نام ” مطیع “ رکھ دیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَدَبِ/حدیث: 7919]

ریطہ بنت مسلم اپنے والد کا یہ بیان نقل کرتی ہیں: وہ رسول اللہ صلی اللہ علیہ وسلم کے ہمراہ جنگ حنین میں شریک تھے، حضور صلی اللہ علیہ وسلم نے ان سے ان کا نام پوچھا انہوں نے کہا: میرا نام ” غراب “ ہے۔ آپ صلی اللہ علیہ وسلم نے فرمایا: تیرا نام ” مسلم “ ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَدَبِ/حدیث: 7920]

سیدنا خیثمہ فرماتے ہیں: ان کے والد نے ان کا نام ” عزیز “ رکھا تھا، رسول اللہ صلی اللہ علیہ وسلم کو ان کا نام بتایا گیا تو آپ صلی اللہ علیہ وسلم نے ان کا نام ” عبدالرحمن “ رکھ دیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَدَبِ/حدیث: 7921]

سیدنا اسامہ بن اخدری رضی اللہ عنہ فرماتے ہیں: بنی شقرہ کا ایک آدمی جس کا نام ” اصرم “ تھا، وہ ان لوگوں میں شامل تھا جو نبی اکرم صلی اللہ علیہ وسلم کی بارگاہ میں آئے، اس نے حضور صلی اللہ علیہ وسلم کی خدمت میں اپنا ایک غلام پیش کیا جو اس نے اس علاقے سے خریدا تھا، اس نے بتایا: یا رسول اللہ صلی اللہ علیہ وسلم میں نے یہ خریدا ہے، میں چاہتا ہوں کہ آپ اس کا نام بھی رکھیں اور اس کے لیے برکت کی دعا بھی فرمائیں، حضور صلی اللہ علیہ وسلم نے اس سے پوچھا: تیرا نام کیا ہے؟ انہوں نے بتایا: اصرم۔ حضور صلی اللہ علیہ وسلم نے فرمایا: تم ” زرعہ “ ہو، تمہارا کیا ارادہ ہے؟ انہوں نے کہا: اس بچے کا نام۔ حضور صلی اللہ علیہ وسلم نے فرمایا: وہ ” عاصم “ ہے، اور حضور صلی اللہ علیہ وسلم نے اس کا ہاتھ بھی پکڑا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَدَبِ/حدیث: 7922]

سیدنا ابوحدرد رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: ہمارے یہ اونٹ کون چرائے گا؟ ایک آدمی نے کہا: میں چراؤں گا۔ آپ صلی اللہ علیہ وسلم نے پوچھا: تیرا نام کیا ہے؟ اس نے اپنا نام بتایا، حضور صلی اللہ علیہ وسلم نے اس سے فرمایا: تم بیٹھ جاؤ، پھر ایک اور آدمی اٹھا، اس نے کہا: میں چراؤں گا، حضور صلی اللہ علیہ وسلم نے اس کا نام پوچھا، اس نے اپنا نام بتایا، حضور صلی اللہ علیہ وسلم نے اس کو بھی بٹھا دیا، پھر ایک اور آدمی اٹھ کھڑا ہوا اور اس نے خود کو پیش کیا، آپ صلی اللہ علیہ وسلم نے اس کا نام پوچھا، اس نے اپنا نام ” ناجیہ “ بتایا۔ حضور صلی اللہ علیہ وسلم نے اونٹ چرانے کی ذمہ داری اس کے سپرد فرما دی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَدَبِ/حدیث: 7923]

سیدنا عبدالرحمن بن عوف رضی اللہ عنہ فرماتے ہیں: جاہلیت میں میرا نام ” عبد عمرو “ تھا۔ رسول اللہ صلی اللہ علیہ وسلم نے میرا نام ” عبدالرحمن “ رکھ دیا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْأَدَبِ/حدیث: 7924]

ام المومنین سیدہ عائشہ رضی اللہ عنہا فرماتی ہیں کہ نبی اکرم صلی اللہ علیہ وسلم نے ایک آدمی سے اس کا نام پوچھا، اس نے اپنا نام ” شہاب “ بتایا، حضور صلی اللہ علیہ وسلم نے فرمایا: (تم شہاب نہیں بلکہ) تم ہشام ہو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ جس آدمی سے حضور صلی اللہ علیہ وسلم نے نام پوچھا تھا وہ ” ہشام بن عامر انصاری رضی اللہ عنہ “ ہیں۔ [المستدرك على الصحيحين/كِتَابُ الْأَدَبِ/حدیث: 7925]

ہشام بن عامر رضی اللہ عنہ فرماتے ہیں کہ میں نبی اکرم صلی اللہ علیہ وسلم کی بارگاہ میں حاضر ہوا، حضور صلی اللہ علیہ وسلم نے میرا نام پوچھا، میں نے اپنا نام ” شہاب “ بتایا حضور صلی اللہ علیہ وسلم نے فرمایا: (تم شہاب نہیں ہو) بلکہ تم ہشام ہو۔ [المستدرك على الصحيحين/كِتَابُ الْأَدَبِ/حدیث: 7926]