سیدنا سلیمان بن حبیب المحاربی سے مروی ہے کہ سیدنا ابوامامہ باہلی فرماتے ہیں کہ جب نبی اکرم صلی اللہ علیہ وسلم نے اعلان نبوت فرمایا تو شیطان کے پاس اس کے چیلے آئے اور کہنے لگے: اللہ کے نبی نے اعلان نبوت کر دیا ہے اور ان کی امت بھی پیدا ہو گئی ہے، شیطان نے کہا: کیا وہ لوگ دنیا سے محبت کرتے ہیں؟ شیطان کے شاگردوں نے کہا: جی ہاں۔ شیطان نے کہا: اگر واقعی وہ دنیا سے محبت کرتے ہیں تو مجھے کوئی پرواہ نہیں ہے، کہ بتوں کی عبادت نہیں کریں گے، یہ لوگ مجھ سے بچ نہیں سکتے۔ میں ان پر تین چیزوں کے ساتھ صبح اور شام کروں گا۔ یہ ناحق مال لیں گے، اس کو ناحق راہ میں خرچ کریں گے، اور اس کو حق کے راستے سے روک کر رکھیں گے۔ تمام برائیاں انہی تین چیزوں کے تابع ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8116]

سیدنا ابوہریرہ رضی اللہ عنہ فرماتے ہیں کہ نبی اکرم صلی اللہ علیہ وسلم سے پوچھا گیا کہ وہ کونسی چیز ہے جس کی بناء پر زیادہ لوگ جنت میں جائیں گے؟ آپ صلی اللہ علیہ وسلم نے فرمایا: تقویٰ اور حسن اخلاق۔ اور آپ صلی اللہ علیہ وسلم سے اس چیز کے بارے میں بھی پوچھا گیا جس کی بناء پر زیادہ لوگ دوزخ میں جائیں گے اپ صلی اللہ علیہ وسلم نے فرمایا: منہ اور شرمگاہ۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8117]