مذکور اسانید کے ہمراہ تمام نے سیدنا عبداللہ بن طاؤس کے حوالے سے ان کے والد سے روایت کیا ہے کہ سیدنا عبداللہ بن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: مال اولاً اصحاب فرائض کو دو، جو مال ان سے بچ جائے وہ اس مرد کو دو جو میت کا سب سے قریبی رشتہ دار ہے۔ [المستدرك على الصحيحين/كِتَابُ الْفَرَائِضِ/حدیث: 8176]

سیدنا قبیصہ بن ذویب فرماتے ہیں: رسول اللہ صلی اللہ علیہ وسلم کی وفات ظاہری کے بعد کا واقعہ ہے کہ ایک دادی سیدنا ابوبکر صدیق رضی اللہ عنہ کے پاس آئی اور کہنے لگی: میرا حق ہے، میرا پوتا یا (شاید کہا کہ میرا) نواسا فوت ہوا ہے۔ آپ اس کی وراثت مجھے عطا کیجیے، سیدنا ابوبکر صدیق رضی اللہ عنہ نے فرمایا: مجھے کتاب اللہ میں تیرا حق کہیں نہیں ملا اور نہ میں نے اس سلسلے میں نبی اکرم صلی اللہ علیہ وسلم کا کوئی ارشاد سنا ہے۔ تاہم میں صحابہ کرام رضی اللہ عنہم سے مشورہ کروں گا، پھر انہوں نے صحابہ کرام سے اس بارے میں مشاورت کی، سیدنا مغیرہ بن شعبہ رضی اللہ عنہ نے کہا: رسول اللہ صلی اللہ علیہ وسلم نے دادی کو چھٹا حصہ عطا فرمایا۔ سیدنا ابوبکر رضی اللہ عنہ نے فرمایا: تیرے ساتھ اور کس کس نے یہ بات سنی ہے؟ تو محمد بن مسلمہ نے بھی اسی بات کی گواہی دی، چنانچہ سیدنا ابوبکر رضی اللہ عنہ نے اس خاتون کو چھٹا عطا فرمایا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْفَرَائِضِ/حدیث: 8177]