مجاہد نے ایمن سے روایت کیا ہے (اور ایمن ایسا آدمی ہے جس کے بارے میں محدثین اچھی رائے رکھتے ہیں) آپ فرماتے ہیں: ایک ڈھال کی قیمت سے کم کی چوری میں بھی چور کے ہاتھ کاٹے جائیں گے، ان دنوں ایک ڈھال کی قیمت ایک دینار تھی۔ ام ایمن کے بیٹے جو ایمن ہیں، یہ صحابی رسول ہیں، سیدنا اسامہ کے ماں شریکی بھائی ہیں، آپ اسامہ سے عمر میں بھی بڑے ہیں اور شرافت و نجابت میں بھی بڑے ہیں، ان کو جہالت کی طرف منسوب کرنا مناسب نہیں ہے۔ ان کے بارے میں کہا جاتا ہے کہ یہ ایسا آدمی ہے جس کے بارے میں اچھی گفتگو ہوتی ہے، اور اس طرح کے الفاظ ایسے مجہول کے لئے بولے جاتے ہیں جو صحت کے ساتھ معروف نہ ہو، علاوہ ازیں جریر نے اس حدیث کو ایمن پر موقوف کیا ہے اور اس کو مسند نہیں کیا۔ [المستدرك على الصحيحين/كِتَابُ الْحُدُودِ/حدیث: 8343]

سیدنا جابر رضی اللہ عنہ فرماتے ہیں کہ نبی اکرم صلی اللہ علیہ وسلم کی بارگاہ میں ایک عورت لائی گئی، اس نے چوری کی تھی، اس نے رسول اللہ صلی اللہ علیہ وسلم کے پروردہ (سیدنا سلمہ بن ابی سلمہ رضی اللہ عنہ) کی پناہ مانگی، نبی اکرم صلی اللہ علیہ وسلم نے فرمایا: اگر فاطمہ بنت محمد بھی چوری کرتی تو میں اس کے بھی ہاتھ کاٹ دیتا۔ پھر اس کے ہاتھ کٹوا دیئے۔ [المستدرك على الصحيحين/كِتَابُ الْحُدُودِ/حدیث: 8344]