سیدنا علی بن المدینی فرماتے ہیں: رسول اللہ صلی اللہ علیہ وسلم کے ربیب (لے پالک) سیدنا سلمہ بن ابی سلمہ رضی اللہ عنہ تھے، اور جس مخزومیہ نے پناہ مانگی تھی، اس نے ان میں سے کسی ایک (سلمہ یا ابوسلمہ) کی چوری کی تھی۔ ٭٭ امام بخاری رحمۃ اللہ علیہ اور امام مسلم رحمۃ اللہ علیہ نے زہری سے، انہوں نے سیدنا عروہ کے حوالے سے ام المومنین سیدہ عائشہ رضی اللہ عنہا کا یہ ارشاد نقل کیا ہے کہ مخزومیہ خاتون نے سیدنا اسامہ بن زید رضی اللہ عنہما کی پناہ چاہی تھی، اور یہی صحیح ہے۔ [المستدرك على الصحيحين/كِتَابُ الْحُدُودِ/حدیث: 8345]

سیدنا مسعود رضی اللہ عنہ فرماتے ہیں: جب اس عورت نے رسول اللہ صلی اللہ علیہ وسلم کے گھر سے مخملی چادر چوری کی تو ہم نے اس معاملہ کو بہت سنگین جانا، وہ عورت قریشی تھی، ہم رسول اللہ صلی اللہ علیہ وسلم کی بارگاہ میں آئے اور عرض کی: یا رسول اللہ صلی اللہ علیہ وسلم ہم اس عورت کی طرف سے 40 اوقیہ ہرجانہ پیش کرتے ہیں۔ حضور صلی اللہ علیہ وسلم نے فرمایا: اس کو سزا ہونے دو، یہی اس کے حق میں بہتر ہے، جب ہم نے رسول اللہ صلی اللہ علیہ وسلم کی یہ بات سنی تو ہم سیدنا اسامہ بن زید رضی اللہ عنہما کی خدمت میں حاضر ہوئے، ہم نے کہا: آپ رسول اللہ صلی اللہ علیہ وسلم کی بارگاہ میں اس عورت کے سلسلے میں ہماری سفارش فرما دیں، اس کی جانب سے ہم 40 اوقیہ فدیہ پیش کر دیتے ہیں، جب رسول اللہ صلی اللہ علیہ وسلم نے اس معاملے میں صحابہ کرام کی گرمجوشیاں دیکھیں تو آپ نے خطبہ دیا اور فرمایا: اے لوگو! کیا وجہ ہے کہ تم اللہ کی ایک بندی پر لگنے والی حد کو روکنے کی بہت کوشش کر رہے ہو؟ آپ صلی اللہ علیہ وسلم نے فرمایا: اس ذات کی قسم! جس کے قبضہ قدرت میں میری جان ہے، اگر فاطمہ بنت محمد سے بھی اس عورت جیسا عمل سرزد ہوتا تو محمد اس کے بھی ہاتھ کاٹ دیتا، راوی فرماتے ہیں: حضور صلی اللہ علیہ وسلم کی اس گفتگو کے بعد صحابہ کرام رضی اللہ عنہم کی امیدیں ٹوٹ گئیں، حضور صلی اللہ علیہ وسلم نے اس کے ہاتھ کاٹنے کا حکم دے دیا۔ ٭٭ محمد بن اسحاق کہتے ہیں: مجھے عبداللہ بن ابی بکر نے بتایا ہے کہ اس کے بعد رسول اللہ صلی اللہ علیہ وسلم اس کا بہت خیال رکھا کرتے تھے اور اس کے ساتھ بہت حسن سلوک فرمایا کرتے تھے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو اس اسناد کے ہمراہ نقل نہیں کیا ہے۔ [المستدرك على الصحيحين/كِتَابُ الْحُدُودِ/حدیث: 8346]

سیدنا عبداللہ بن عباس رضی اللہ عنہما فرماتے ہیں: صفوان بن امیہ رضی اللہ عنہ نبی اکرم صلی اللہ علیہ وسلم کی بارگاہ میں ایک ایسے آدمی کو لائے جس نے ان کا جبہ چوری کر لیا تھا، پھر انہوں نے کہا: یا رسول اللہ صلی اللہ علیہ وسلم ، یہ میری طرف سے اس کو ہبہ کر دیجئے، رسول اللہ صلی اللہ علیہ وسلم نے فرمایا: تم نے یہی کام اس کو میرے پاس لانے سے پہلے کیوں نہیں کر لیا۔ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اور اس موضوع پر تفصیلی حدیث درج ذیل ہے۔ [المستدرك على الصحيحين/كِتَابُ الْحُدُودِ/حدیث: 8347]

سیدنا صفوان بن امیہ رضی اللہ عنہ فرماتے ہیں: میں مسجد میں سویا ہوا تھا، میں نے اپنے اوپر ایک چادر اوڑھ رکھی تھی، اس کی قیمت 30 درہم تھی، ایک آدمی آیا اور اس نے مجھ سے وہ چادر چھین لی، وہ آدمی پکڑا گیا، اور اس کو رسول اللہ صلی اللہ علیہ وسلم کی بارگاہ میں پیش کر دیا گیا، حضور صلی اللہ علیہ وسلم نے اس کے ہاتھ کاٹنے کا حکم دے دیا، (یہ حکم سن کر) میں رسول اللہ صلی اللہ علیہ وسلم کی بارگاہ میں حاضر ہوا اور میں نے عرض کی: یا رسول اللہ صلی اللہ علیہ وسلم کیا صرف 30 درہموں کے بدلے میں اس کے ہاتھ کاٹ دیئے جائیں گے؟ (مجھے یہ گوارا نہیں ہے) میں یہ چادر اس کو بیچتا ہوں اور اس کے ثمن اس کو معاف کرتا ہوں۔ حضور صلی اللہ علیہ وسلم نے فرمایا: یہی کام تم نے اس کو میرے پاس لانے سے پہلے کیوں نہیں کر لیا۔ [المستدرك على الصحيحين/كِتَابُ الْحُدُودِ/حدیث: 8348]