سیدنا خزیمہ بن ثابت رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: کسی جرم کی پاداش میں بندے پر جب حد نافذ کر دی جاتی ہے تو وہ حد اس کے گناہ کے لئے کفارہ بن جاتی ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْحُدُودِ/حدیث: 8366]

سیدنا عبداللہ بن عباس رضی اللہ عنہما فرماتے ہیں: سیدنا عمر بن خطاب رضی اللہ عنہ کے پاس ایک زانیہ عورت کو پیش کیا گیا۔ سیدنا عمر رضی اللہ عنہ نے اس کے رجم کرنے کا حکم دیا، وہاں سے سیدنا علی ابن ابی طالب رضی اللہ عنہ کا گزر ہوا، وہاں پر اس عورت کے چھوٹے چھوٹے بچے رو رہے تھے؟ سیدنا علی رضی اللہ عنہ نے پوچھا: کیا معاملہ ہے؟ لوگوں نے بتایا کہ سیدنا عمر رضی اللہ عنہ نے اس کے رجم کا حکم دیا ہے، سیدنا علی نے اس عورت کو واپس کیا، اور اس کے ہمراہ خود سیدنا عمر رضی اللہ عنہ کے پاس تشریف لے گئے، اور فرمایا: کیا آپ جانتے نہیں کہ مجنون سے قلم اٹھا لیا گیا ہے جب تک کہ اس کی عقل ٹھیک نہ ہو جائے پاگل سے بھی قلم اٹھا لیا گیا ہے حتی کہ اس کو افاقہ ہو جائے (اور اس کی عقل ٹھیک ہو جائے) اور سوئے ہوئے سے بھی قلم اٹھا لیا گیا ہے حتی کہ وہ بیدار ہو جائے، اور بچے سے بھی قلم اٹھا لیا گیا ہے یہاں تک کہ وہ بالغ ہو جائے۔ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ اسی حدیث کو شعبہ نے اعمش سے روایت کیا ہے اور ان کی روایت میں کچھ الفاظ زائد ہیں۔ [المستدرك على الصحيحين/كِتَابُ الْحُدُودِ/حدیث: 8367]

سیدنا عبداللہ بن عباس رضی اللہ عنہما فرماتے ہیں: سیدنا عمر رضی اللہ عنہ کے پاس ایک مجنونہ عورت کو زنا کے کیس میں پیش کیا گیا، سیدنا عمر رضی اللہ عنہ نے اس کو رجم کرنے کا ارادہ رکھتے تھے، سیدنا علی رضی اللہ عنہ نے فرمایا: کیا تم یہ نہیں جانتے کہ تین قسم کے لوگوں سے قلم اٹھا لیا گیا ہے: مجنون سے، جب تک کہ اس کی عقل درست نہ ہو جائے۔ بچے سے، جب تک کہ وہ بالغ نہ ہو جائے۔ سوئے ہوئے سے، جب تک کہ وہ بیدار نہ ہو جائے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْحُدُودِ/حدیث: 8368]

سیدنا علی رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: تین لوگوں سے قلم اٹھا لیا گیا ہے۔ سوئے ہوئے سے، جب تک کہ وہ بیدار نہ ہو جائے۔ پاگل سے، جب تک کہ اس کی عقل ٹھیک نہ ہو جائے۔ بچے سے، جب تک کہ وہ بالغ نہ ہو جائے۔ [المستدرك على الصحيحين/كِتَابُ الْحُدُودِ/حدیث: 8369]

سیدنا ابوقتادہ رضی اللہ عنہ کے بارے میں مروی ہے کہ وہ ایک سفر میں رسول اللہ صلی اللہ علیہ وسلم کے ہمراہ تھے یہ لوگ ساری رات سفر کرتے رہے، قافلے کے لوگ ادھر ادھر بکھر گئے، نبی اکرم صلی اللہ علیہ وسلم نے فرمایا: تین لوگوں سے قلم اٹھا لیا گیا ہے۔ سوئے ہوئے سے، جب تک اٹھ نہ جائے۔ فاتر العقل سے، جب تک تندرست نہ ہو جائے۔ بچے سے، جب تک بالغ نہ ہو جائے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْحُدُودِ/حدیث: 8370]

عطیہ کہتے ہیں: بنی قریظہ کے ایک آدمی نے بیان کیا ہے کہ صحابہ کرام نے قریظہ کے دن مجھے ننگا کر دیا، انہوں نے دیکھا کہ میری بغلوں کے بالوں پر ابھی استرا نہیں لگا تھا (یعنی میں ابھی نابالغ تھا تو انہوں نے مجھے چھوڑ دیا۔ ٭٭ یہ حدیث غریب صحیح ہے لیکن شیخین نے اس کو نقل نہیں کیا۔ اور یہ حدیث عبدالملک بن عمیر کے واسطے سے عطیہ قرظی کی سند سے مشہور ہے۔ [المستدرك على الصحيحين/كِتَابُ الْحُدُودِ/حدیث: 8371]