سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس نے مجھے خواب میں دیکھا تو بیشک اس نے مجھے ہی دیکھا، کیونکہ شیطان میری مشابہت اختیار نہیں کر سکتا۔“ راوی کہتے ہیں کہ میرے والد نے کہا: میں نے یہ حدیث ابن عباس رضی اللہ عنہما کو سنائی اور کہا کہ میں نے خواب میں آپ صلی اللہ علیہ وسلم کو دیکھا ہے، پھر میں نے سیدنا حسن بن علی رضی اللہ عنہما کا ذکر کیا اور آپ صلی اللہ علیہ وسلم کو ان کے مشابہ قرار دیا، تو ابن عباس رضی اللہ عنہما نے فرمایا: بیشک وہ (سیدنا حسن) آپ صلی اللہ علیہ وسلم کے مشابہ تھے۔
یہ حدیث صحیح الاسناد ہے لیکن شیخین نے اسے اس سیاق کے ساتھ روایت نہیں کیا۔ [المستدرك على الصحيحين/كِتَابُ تَعْبِيرِ الرُّؤْيَا/حدیث: 8386]

سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم سے ورقہ بن نوفل کے متعلق سوال کیا گیا، اور سیدہ خدیجہ رضی اللہ عنہا نے آپ صلی اللہ علیہ وسلم سے عرض کی: انہوں نے آپ کی تصدیق کی تھی لیکن آپ کے (باقاعدہ) ظہورِ نبوت سے پہلے ہی وہ وفات پا گئے تھے، تو رسول اللہ صلی اللہ علیہ وسلم نے فرمایا: ”میں نے انہیں خواب میں دیکھا ہے کہ وہ سفید لباس پہنے ہوئے ہیں، اور اگر وہ دوزخی ہوتے تو ان پر اس کے علاوہ کوئی اور لباس ہوتا۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ تَعْبِيرِ الرُّؤْيَا/حدیث: 8387]