حیہ بنت ابی حیہ بیان کرتی ہیں، دوپہر کے وقت ایک آدمی میرے پاس آیا، میں نے اس سے کہا: اے اللہ کے بندے! تجھے کیا کام ہے؟ اس نے کہا: میں اور میرا ساتھی، ہم اپنے اونٹ ڈھونڈنے نکلے ہیں، میں کچھ دیر سایہ میں بیٹھنے اور پانی پینے کے لئے آیا ہوں، میں نے دودھ کی بنی ہوئی کچی لسی اور لذیذ دودھ ان کو پلایا پھر میں نے پوچھا: اے اللہ کے بندے! تم کون ہو؟ اس نے کہا: تم نے جس رسول کے بارے میں سن رکھا ہے، میں اس کا ساتھی ابوبکر ہوں، آپ فرماتے: پھر میں نے زمانہ جاہلیت کی آپس کی جنگوں اور خاک و خون کے واقعات کا تذکرہ کیا، اور پھر اللہ تعالیٰ نے جو آپس میں محبت ڈال دی ہے اس کا ذکر کیا اور خیمے گاڑنے کے واقعات دہرائے، پھر انہوں نے اس طرح اپنے ایک ہاتھ کی انگلیاں دوسرے ہاتھ کی انگلیوں میں ڈالیں، سیدنا حیہ فرماتی ہیں: میں نے کہا: اے اللہ کے بندے! لوگ اس طرح کب رہیں گے؟ انہوں نے فرمایا: جب تک ائمہ میں استقامت رہے گی، آپ فرماتی ہیں: میں نے کہا: ائمہ سے کیا مراد ہے؟ انہوں نے فرمایا: تم گھاس پھوس کے ان مکانوں کو نہیں دیکھتے، ان میں ان کا سردار بھی ہوتا ہے اور جب تک ان کا امام قائم ہوتا ہے وہ اسی کی پیروی کرتے ہیں اور اسی کے پیچھے چلتے ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8599]

حسین بن خارجہ بیان کرتے ہیں کہ جب پہلا فتنہ ہوا تو مجھ پر بہت مشکل بنی، میں نے دعا مانگی ” یا اللہ! مجھے حق راستہ دکھا دے، تاکہ میں اس پر مضبوطی سے گامزن ہو جاؤں، آپ فرماتے ہیں: مجھے دنیا اور آخرت دکھائی گئی، ان دونوں کے درمیان ایک دیوار تھی، یہ دیوار کوئی زیادہ نہیں تھی، وہاں مجھے ایک سیڑھی دکھائی دی۔ میں نے سوچا: اگر میں اس سیڑھی کے ذریعے اوپر چڑھ جاؤں تو اشجع کے مقتولوں کے پاس پہنچ سکتا ہوں اور ان کے بارے میں کوئی خبر لی جا سکتی ہے، چنانچہ میں ایک درختوں والی زمین پر پہنچا، میں نے دیکھا کہ کچھ لوگ بیٹھے ہوئے ہیں، میں نے پوچھا: کیا تم شہداء ہو؟ انہوں نے کہا: نہیں، ہم فرشتے ہیں، میں نے پوچھا: تو شہداء کہاں ہیں؟ انہوں نے کہا: تم ان درجات کی طرف چلے جاؤ، جو محمد صلی اللہ علیہ وسلم کی طرف چڑھ رہے ہیں، میں ادھر چلا گیا، میں ایک درجے میں پہنچا، اس کے حسن اور اس کی وسعت کو اللہ تعالیٰ ہی بہتر جانتا ہے، وہاں پر سیدنا محمد صلی اللہ علیہ وسلم اور سیدنا ابراہیم علیہ السلام موجود تھے، محمد صلی اللہ علیہ وسلم ، سیدنا ابراہیم علیہ السلام سے کہہ رہے تھے: آپ میری امت کے لئے بخشش کی دعا فرما دیجئے، سیدنا ابراہیم علیہ السلام نے حضور صلی اللہ علیہ وسلم سے کہا: آپ کو معلوم نہیں، انہوں نے آپ کے بعد کون کون سے کارنامے کئے ہیں، انہوں نے خونریزیاں کیں، اپنے اماموں کو شہید کیا، انہوں نے میرے دوست سعد کی طرح کیوں نہیں کیا؟ (میری آنکھ کھل گئی) میں نے سوچا کہ مجھے حق دکھا دیا گیا ہے، اب میں سعد کے پاس جاؤں گا اور دیکھوں گا کہ وہ کون ہے، پھر اس کے ساتھ ہو جاؤں گا، پھر میں سعد کے پاس گیا، ان کو اپنا خواب سنایا، خواب سن کر وہ بہت خوش ہوئے، اور فرمایا: وہ شخص بدبخت ہے، ابراہیم علیہ السلام جس کے دوست نہیں ہیں، میں نے پوچھا: آپ کس جماعت سے تعلق رکھتے ہیں؟ انہوں نے فرمایا: میں کسی بھی جماعت میں سے نہیں ہوں، میں نے کہا: آپ مجھے کیا حکم دیتے ہیں؟ آپ نے فرمایا: تیرے پاس کوئی سواری ہے؟ میں نے کہا: نہیں۔ انہوں نے فرمایا: ایک سواری خرید لے، اس پر سوار ہو کر کہیں دور چلا جا، جب تک کہ یہ فتنہ ختم نہیں ہو جاتا (تب تک واپس نہ آنا)۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8600]