سیدنا عمران بن حصین رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: میری امت میں ہمیشہ ایک ایسا گروہ رہے گا جو حق پر جہاد کرتا رہے گا اور اپنے دشمنوں پر غالب رہے گا، حتی کہ اس گروہ کی آخری جماعت دجال سے لڑے گی۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8596]

سیدنا عمر بن خطاب رضی اللہ عنہ نے خطبہ میں ارشاد فرمایا: میں اپنے بعد سب سے زیادہ جس چیز کی فکر کرتا ہوں، وہ یہ ہے کہ کسی بے قصور شخص کو پکڑ لیا جائے گا اور اس کو اونٹ کی طرح ذبح کیا جائے گا۔ اور اونٹ کی طرح اس کا گوشت پکایا جائے گا اس کو مجرم قرار دیا جائے گا حالانکہ وہ مجرم نہیں ہو گا۔ سیدنا علی رضی اللہ عنہ خطبہ سن رہے تھے، آپ نے فرمایا: اے امیرالمومنین! یہ حالات کب ہوں گے؟ اور آزمائشیں سخت کیوں ہوں گی؟ غیرت غالب کیوں ہو گی؟ اور بچوں کو قیدی کیوں بنایا جائے گا؟ اور فتنے ان کو یوں پیسں کر رکھ دیں گے جیسے چکی اپنے نچلے پاٹ کو کچل دیتی ہے۔ اور جیسے آگ لکڑیوں کو بھسم کر دیتی ہے۔ امیرالمومنین نے کہا: اے علی! یہ واقعات کب ہوں گے؟ سیدنا علی رضی اللہ عنہ نے فرمایا: جب علمائے دین کے تحصیل علم کا مقصد دین نہیں ہو گا، اور طالب علم کے تحصیل علم کا مقصد عمل نہیں ہو گا، اور آخرت والے عمل کے ذریعے دنیا کمائی جائے گی۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8597]

ابوموسیٰ اشعری رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: مجھے تم پر ہرج کا فکر ہے۔ صحابہ کرام رضی اللہ عنہم نے عرض کی: یا رسول اللہ صلی اللہ علیہ وسلم ہرج کیا ہے؟ آپ صلی اللہ علیہ وسلم نے فرمایا: قتل۔ صحابہ کرام رضی اللہ عنہم نے عرض کی: یا رسول اللہ صلی اللہ علیہ وسلم آج ہم اتنے اتنے مشرکوں کو روزانہ قتل کرتے ہیں، کیا اس وقت اس سے بھی زیادہ قتل ہو گا، نبی اکرم صلی اللہ علیہ وسلم نے فرمایا: میں مشرکین کے قتل کی بات نہیں کر رہا، تم خود ایک دوسرے کو قتل کرو گے۔ صحابہ کرام رضی اللہ عنہم نے عرض کی: یا رسول اللہ صلی اللہ علیہ وسلم ہمارے درمیان کتاب اللہ موجود ہے، (پھر ہم ایک دوسرے کو قتل کیوں کریں گے؟) نبی اکرم صلی اللہ علیہ وسلم نے فرمایا: بے شک تم میں کتاب اللہ موجود ہے، صحابہ کرام رضی اللہ عنہم نے کہا: اور ہمارے اندر عقل بھی ہے، آپ صلی اللہ علیہ وسلم نے فرمایا۔ اس زمانے میں عام لوگوں کی عقلیں سلب کر لی جائیں گی، اور ناسمجھ لوگ باقی رہ جائیں گے، وہ اپنے آپ کو بہت کچھ سمجھیں گے لیکن حقیقت میں وہ کچھ بھی نہیں ہوں گے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8598]