سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: تم نے سنا ہے کہ ایک شہر ایسا ہے، جس کا ایک کنارہ خشکی میں اور ایک کنارہ سمندر میں ہے؟ صحابہ کرام رضی اللہ عنہم نے کہا: جی ہاں یا رسول اللہ صلی اللہ علیہ وسلم ، آپ صلی اللہ علیہ وسلم نے فرمایا: قیامت سے پہلے ان لوگوں سے تم جہاد کرو گے، بنی اسحاق میں سے ستر ہزار کا ایک لشکر جرار آئے گا، جب یہ اس شہر کے قریب جا کر پڑاؤ ڈالیں گے تو یہ کوئی ہتھیار نہیں چلائیں گے، اور کوئی تیر نہیں برسائیں گے، وہ لوگ ” لا الہ الا اللہ “ پڑھیں گے، یہ پڑھتے ہی اس شہر کا ایک کنارہ گر پڑے گا، ثور کہتے ہیں: مجھے یہ پتا نہیں ہے کہ آپ صلی اللہ علیہ وسلم نے یہ بات اس کنارے کے بارے میں کہی تھی جو کنارہ خشکی کے ساتھ ملا ہوا ہے، وہ دوبارہ ” لا الہ الا اللہ “ پڑھیں گے، اس کی دوسری جانب بھی گر جائے گی، دو تیسری مرتبہ ” لا الہ الا اللہ “ پڑھیں گے، تو ان کے لئے شہر میں داخل ہونے کا راستہ بن جائے گا۔ پھر یہ لوگ شہر میں داخل ہوں گے، وہاں سے مال غنیمت جمع کریں گے، یہ لوگ مال غنیمت تقسیم کر رہے ہوں گے کہ کوئی چیخ چیخ کر کہہ رہا ہو گا ” دجال پیدا ہو گیا ہے “ یہ لوگ سب کچھ چھوڑ چھاڑ کر لوٹ جائیں گے۔ کہتے ہیں کہ یہ شہر قسطنطنیہ ہے۔ اس بارے میں صحیح روایات موجود ہیں کہ وہ قیامت قائم ہونے کے وقت فتح ہو گا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8678]