سیدنا ابو سعید خدری رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو یہ فرماتے ہوئے سنا: ”یاجوج اور ماجوج کھول دیے جائیں گے اور وہ لوگوں پر اس طرح ٹوٹ پڑیں گے جیسے اللہ تعالیٰ نے فرمایا ہے: ﴿مِنْ كُلِّ حَدَبٍ يَنْسِلُونَ﴾ [سورة الأنبياء: 96] ”وہ ہر بلندی سے دوڑتے ہوئے نکل پڑیں گے۔“ پس وہ زمین میں فساد مچائیں گے اور مسلمان اپنے شہروں اور قلعوں میں پناہ گزین ہو جائیں گے اور اپنے مویشیوں کو بھی اپنے ساتھ (انہی قلعوں میں) جمع کر لیں گے، وہ زمین کا سارا پانی پی جائیں گے، یہاں تک کہ جب ان کا کوئی گروہ کسی نہر سے گزرے گا تو اس کا سارا پانی پی کر اسے بالکل خشک چھوڑ دیں گے، پھر ان کے بعد آنے والا گروہ وہاں سے گزرے گا تو کہے گا: یہاں کبھی پانی ہوا کرتا تھا، یہاں تک کہ جب قلعوں یا شہروں میں محصور لوگوں کے سوا (زمین پر) کوئی باقی نہ رہے گا تو ان کا کہنے والا کہے گا: یہ زمین والے تو ختم ہو گئے جن سے ہم فارغ ہو چکے، اب آسمان والے باقی ہیں، پھر ان میں سے کوئی اپنا نیزہ لہرائے گا اور اسے آسمان کی طرف پھینکے گا، تو وہ آزمائش اور فتنے کے طور پر خون آلود ہو کر واپس آئے گا، وہ اسی حالت میں ہوں گے کہ اللہ تعالیٰ ان کی گردنوں میں «النَّغَفِ» ”کیڑے“ پیدا کر دے گا جو ان کی گردنوں سے نکلیں گے، پس وہ اس حال میں صبح کریں گے کہ سب کے سب مردہ پڑے ہوں گے اور ان کی کوئی آہٹ سنائی نہ دے گی، تب مسلمان کہیں گے: کیا کوئی ایسا شخص ہے جو اپنی جان اللہ کے لیے وقف کر کے (نیچے اترے اور) دیکھے کہ اس دشمن کا کیا انجام ہوا؟ پھر ان میں سے ایک شخص اپنی جان کی پروا نہ کرتے ہوئے اور خود کو قتل کے لیے تیار کر کے نکلے گا، وہ نیچے اترے گا تو انہیں ایک دوسرے کے اوپر مردہ پڑا ہوا پائے گا، وہ پکار کر کہے گا: اے مسلمانو! تمہیں خوشخبری ہو، اللہ نے تمہارے دشمن کے مقابلے میں تمہاری کفایت فرمائی ہے، تب وہ اپنے شہروں اور قلعوں سے باہر نکل آئیں گے اور اپنے مویشی چرنے کے لیے چھوڑ دیں گے، تو ان مویشیوں کے لیے ان (یاجوج ماجوج) کے گوشت کے سوا کوئی چارہ نہ ہو گا، پس وہ اسے کھا کر اتنے موٹے ہو جائیں گے کہ کبھی کسی بہترین نباتات کو کھا کر بھی اتنے موٹے نہیں ہوئے ہوں گے۔“
یہ حدیث امام مسلم کی شرط پر صحیح ہے، لیکن شیخین نے اسے روایت نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8714]

سیدنا عبداللہ بن عمرو رضی اللہ عنہما سے روایت ہے، انہوں نے کہا: یاجوج اور ماجوج (کی کثرت کا یہ عالم ہوگا کہ) ان کا پہلا گروہ دجلہ جیسے بڑے دریا سے گزرے گا (اور اس کا سارا پانی پی جائے گا)، جب ان کا آخری گروہ وہاں سے گزرے گا تو کہے گا: ”کبھی اس دریا میں پانی ہوا کرتا تھا“، اور ان میں سے کوئی آدمی اس وقت تک نہیں مرتا جب تک وہ اپنی نسل سے ایک ہزار یا اس سے زائد افراد نہ چھوڑ جائے، اور ان کے بعد مزید تین امتیں ہوں گی: تادیس، تاویل اور تاسک یا متسک (راویِ حدیث شعبہ کو اس نام میں شک ہے)۔
یہ حدیث شیخین کی شرط پر صحیح ہے، لیکن انہوں نے اسے روایت نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8715]