سیدنا عبداللہ بن عباس رضی اللہ عنہما فرماتے ہیں: یاجوج و ماجوج ایک، دو یا تین بالشت کے ہوں گے اور یہ سب سیدنا آدم علیہ السلام کی اولاد ہیں۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8820]

سیدنا ابوبکر صدیق رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: دجال مشرقی علاقے خراسان سے نکلے گا، کچھ لوگ اس کی پیروی کریں گے، ان کے چہرے ڈھال کی طرح ہوں گے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اس حدیث کو عبداللہ بن شوذب نے ابوالتیاح کے واسطے سے مغیرہ بن سبیع سے، انہوں نے عمرو بن حریث سے یوں روایت کی ہے کہ سیدنا ابوبکر صدیق رضی اللہ عنہ بیمار ہوئے، جب کچھ افاقہ ہوا تو آپ نے نماز پڑھائی، اللہ تعالیٰ کی حمد و ثناء کے بعد فرمایا: میں تمہیں نصیحت کرتا ہوں، میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ دجال مشرقی علاقے کی سرزمین خراسان سے نکلے گا، کچھ لوگ اس کی پیروی کریں گے، ان کے چہرے ڈھال کی طرح ہوں گے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8821]

8822 - حضرت عمرو بن حریث (رضی اللہ عنہ) بیان کرتے ہیں کہ: حضرت ابو بکر صدیق (رضی اللہ عنہ) بیمار ہوئے، پھر جب ان کی طبیعت کچھ سنبھلی تو انہوں نے لوگوں کو نماز پڑھائی، اللہ کی حمد و ثنا بیان کی اور پھر فرمایا: "میں تمہارا خیر خواہ ہوں، میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ: دجال مشرق کی جانب سے ایک ایسی زمین سے نکلے گا جسے 'خراسان' کہا جاتا ہے، اس کے ساتھ ایسے لوگ ہوں گے جن کے چہرے (چوڑی اور تہہ بہ تہہ ڈھالوں کی طرح) گوشت بھرے اور چوڑے ہوں گے"۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8822]