مسلم ابن ابی حرہ بیان کرتے ہیں: جب ابن زبیر کا محاصرہ ہو گیا، اور شامیوں نے مسجد کے دروازوں کو اپنے لئے قلعے بنا لیا تھا، آپ نے اپنے پیچھے دو غلاموں کو باتیں کرتے ہوئے سنا، آپ ان کی جانب متوجہ ہوئے اور بولے: کتابوں کا جس قدر میں نے تتبع کیا ہے، اور کسی نے نہیں کیا، میں نے کتابیں بھی پڑھی ہیں، اور احادیث بھی سنی ہیں، میں نے کتاب اللہ کے علاوہ سب کتابیں باطل پائی ہیں۔ پھر آپ نکلے، رکن کا استلام کیا، پھر اپنی والدہ سیدہ اسماء کی خدمت میں حاضر ہوئے، ان کا بوسہ لیا، ان کے سر کا بوسہ لیا، آپ کی والدہ نے پوچھا: میں یہ کیا آواز سن رہی ہوں؟ آپ نے فرمایا: شامی لوگوں کی آوازیں ہیں۔ آپ کی والدہ نے پوچھا: سب لوگ مسلمان ہیں؟ آپ کو بتایا گیا کہ جی ہاں سب خود کو مسلمان ہی سمجھتے ہیں، آپ فرماتی ہیں: میں نے اسلام کو دیکھا ہے، اگر یہ سب ایک بکری پر جمع ہو جائیں تو اس کو نہیں کھا سکتے۔ پھر فرمایا: اے میرے پیارے بیٹے، عزت کی موت مرنا، اور (باطل کے آگے) سر نہیں جھکانا، سیدنا عبداللہ نے کہا: مصر والے کہاں ہیں؟ لوگوں نے بتایا کہ دروازے پر۔ بنی جمع کے دروازے پر۔ اکثر دروازوں پر لوگ موجود تھے، انہوں نے ان پر حملہ کر دیا، لوگ بازار تک پیچھے ہٹ گئے، سیدنا خبیب پیچھے سے تلوار کے ساتھ ان کو مار رہے تھے، اور فرما رہے تھے، حملہ کرو، اور ان پر کوئی بھی داخل نہیں ہو رہا تھا، آپ نے پھر حملہ کیا تو لوگ پھر منتشر ہو گئے، جب لوگوں نے یہ معاملہ دیکھا تو اسود کو داخل کیا، جب انہوں نے اس کو دیکھا تو اس کو دھوکہ دینے کے لئے پھر گئے، پھر اسود داخل ہوا، وہ کعبہ کے پردوں کے پیچھے تھا، جب وہ کعبہ کے قریب آیا تو ابن زبیر نے اس پر حملہ کر دیا اور اس کے دونوں پاؤں کاٹ ڈالے، وہ اٹھنے کی کوشش کرتا لیکن گر جاتا، آپ اس کی جانب متوجہ نہ ہوئے، حتی کہ ایک پتھر آ کر ان کے کان کے قریب لگا جس کی وجہ سے آپ شہید ہو گئے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8814]

ابوالصدیق بیان کرتے ہیں کہ جب حجاج نے ابن زبیر پر چڑھائی کر لی اور ان کو شہید کر کے ان کا مثلہ کر دیا، پھر وہ ام عبداللہ سیدہ اسماء بنت ابی بکر کے پاس آیا، آپ نے فرمایا: تو میرے بیٹے کو قتل کر کے، میرے پاس کیوں آیا ہے؟ اس نے کہا: تیرے بیٹے نے اللہ تعالیٰ کے حرم میں بددینی کی ہے، میں نے اس کو بددین اور گنہگار (ہونے کی وجہ سے) قتل کیا ہے، اور اللہ تعالیٰ نے اسے دردناک عذاب دیا ہے، اور اس کا بہت برا حشر کیا ہے۔ سیدہ اسماء نے فرمایا: اے اللہ کے اور مسلمانوں کے دشمن، تو جھوٹ بول رہا ہے، اللہ کی قسم! تو نے اس کو قتل کیا، وہ روزہ دار، شب زندہ دار، اور ماں باپ کا فرمانبردار تھا، اس دین کا محافظ تھا، تو نے اس کی صرف دنیا تباہ کی ہے، لیکن تو نے اپنی آخرت برباد کر لی ہے اور رسول اللہ صلی اللہ علیہ وسلم نے ہمیں فرمایا تھا کہ قبیلہ ثقیف سے دو کذاب ظاہر ہوں گے، ان میں سے دوسرا پہلے سے زیادہ برا ہو گا، اور وہ ” مبیر “ (یعنی ہلاک کرنے والا) ہو گا۔ اے حجاج، وہ تو ہی ہے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8815]

مذکورہ سند کے ہمراہ بھی سابقہ حدیث مروی ہے، اس میں یہ الفاظ زائد ہیں ” حجاج نے کہا: رسول اللہ صلی اللہ علیہ وسلم نے بالکل سچ فرمایا ہے اور آپ بھی سچ فرما رہی ہیں، میں مبیر (ہلاک کرنے والا) ہوں۔ میں واقعی مبیر (ہلاک کرنے والا) ہوں۔ میں منافقوں کو ہلاک کرتا ہوں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8816]

سیدنا قیس بن عبادہ فرماتے ہیں: میں مدینہ میں آیا، نماز فجر کی جماعت کھڑی ہوئی، سیدنا عمر رضی اللہ عنہ کچھ لوگوں کی ہمراہی میں تشریف لائے، ان میں ایک آدمی لوگوں کو دیکھ رہا تھا، اس نے سب کو پہچان لیا لیکن مجھے نہیں پہچانا، اس نے مجھے روک دیا اور خود میری جگہ پر کھڑا ہو گیا، میں نے نماز پڑھی، لیکن اس نماز کی مجھے کوئی ہوش نہ تھی۔ جب اس نے نماز پڑھ لی تو اس نے کہا: اے پیارے بیٹے، اللہ تعالیٰ تجھے تکلیف نہ دے، میں نے تیرے ساتھ جو کچھ کیا ہے، وہ لاعلمی میں نہیں کیا، بلکہ رسول اللہ صلی اللہ علیہ وسلم نے فرمایا ہے کہ تم اس صف میں کھڑے ہوا کرو جو صف میرے ساتھ متصل ہے، میں نے لوگوں پر ایک نظر ماری، میں نے تیرے سوا سب کو پہچان لیا، پھر وہ بیٹھ گیا، میں نے لوگوں کو دیکھا کہ وہ ان ہی کی جانب متوجہ تھے، اور وہ اپنی گردنیں کسی اور جانب پھیر ہی نہیں رہے تھے، وہ تو سیدنا ابی بن کعب رضی اللہ عنہ تھے۔ آپ صلی اللہ علیہ وسلم نے یہ بھی فرمایا تھا کہ رب کعبہ کی قسم اہل عقد ہلاک ہو گئے، رب کعبہ کی قسم! اہل عقد ہلاک ہو گئے، رب کعبہ کی قسم! اہل عقد ہلاک ہو گئے، اللہ کی قسم، مجھے ان پر افسوس نہیں ہو رہا، مجھے افسوس ان لوگوں پر ہے جنہوں نے مسلمانوں کو ہلاک کر دیا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8817]

سیدنا ابوہریرہ رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: میری امت کی ہلاکت قریش کے ایک چھوکرے کے ہاتھ سے ہو گی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ کیونکہ اس میں شعبہ کا اور سفیان ثوری کا اختلاف ہے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8818]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: میری امت کا فساد قریش کے ایک ناسمجھ لڑکے کے ہاتھ سے ہو گا۔ ٭٭ اس حدیث کی سند میں سماک نے عبداللہ بن ظالم کا نام ذکر کیا ہے جبکہ عمرو بن علی کا بیان ہے کہ صحیح نام ” مالک بن ظالم “ ہے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8819]