سیدنا ابورزین عقیلی رضی اللہ عنہ کے بارے میں مروی ہے، انہوں نے عرض کی: یا رسول اللہ صلی اللہ علیہ وسلم کیا ہم سب قیامت کے دن اپنے رب کو دیکھیں گے؟ اور اللہ تعالیٰ کی تخلیق میں اس کی نشانی کیا ہے؟ رسول اللہ صلی اللہ علیہ وسلم نے ارشاد فرمایا: کیا تم سب لوگ اکیلے اکیلے چاند کو نہیں دیکھتے ہو؟ سب نے کہا: جی ہاں۔ آپ صلی اللہ علیہ وسلم نے فرمایا: اللہ تعالیٰ سب سے بڑا ہے، ابورزین کہتے ہیں: میں نے عرض کی: یا رسول اللہ صلی اللہ علیہ وسلم اللہ تعالیٰ مردوں کو زندہ کیسے کرے گا؟ اور اللہ تعالیٰ کی تخلیق میں اس کی نشانی کیا ہے؟ آپ صلی اللہ علیہ وسلم نے فرمایا: کیا تم اپنے کسی رشتہ دار کی خشک زمین سے کبھی گزرے ہو؟ پھر کبھی گزرتے ہوئے اس زمین کو سرسبز و شاداب دیکھا ہے؟ انہوں نے کہا: جی ہاں۔ آپ صلی اللہ علیہ وسلم نے فرمایا: اس کی مخلوق میں یہی اس کی نشانی ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 8896]