ام المومنین سیدہ عائشہ رضی اللہ عنہا فرماتی ہیں کہ رسول اللہ صلی اللہ علیہ وسلم نے ارشاد فرمایا: رجسٹر تین طرح کے ہوں گے۔ * ایک رجسٹر ایسا ہو گا جس میں سے کچھ بھی اللہ تعالیٰ معاف نہیں فرمائے گا۔ * ایک رجسٹر ایسا ہو گا جس سے اللہ تعالیٰ کچھ بھی پرواہ نہیں کرے گا۔ * ایک رجسٹر ایسا ہو گا جس میں سے اللہ تعالیٰ کچھ بھی نہیں چھوڑے گا۔ جس رجسٹر میں سے کچھ بھی معاف نہیں کرے گا، وہ شرک ہے۔ اللہ تعالیٰ ارشاد فرماتا ہے {إِنَّ اللَّهَ لَا يَغْفِرُ أَنْ يُشْرَكَ بِهِ وَيَغْفِرُ مَا دُونَ ذَلِكَ لِمَنْ يَشَاءُ} [النساء: 48] ”بے شک اللہ اسے نہیں بخشتا کہ اس کے ساتھ کفر کیا جائے اور کفر سے نیچے جو کچھ ہے، جسے چاہے معاف فرما دیتا ہے “ اور وہ رجسٹر جس کی اللہ تعالیٰ کچھ بھی پرواہ نہیں کرتا، یہ بندے کا اپنی ذات پر کیا ہوا وہ ظلم ہے جو صرف اس کے اور اس کے رب کے درمیان ہے۔ اور وہ رجسٹر جس میں سے کچھ بھی اللہ تعالیٰ نہیں چھوڑے گا، وہ بندوں کے ایک دوسرے پر کئے ہوئے ظلم ہیں، ان کا قصاص لازمی ہو گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 8932]

سیدنا انس بن مالک رضی اللہ عنہ فرماتے ہیں: ایک دفعہ کا ذکر ہے کہ رسول اللہ صلی اللہ علیہ وسلم بیٹھے ہوئے تھے، ہم نے آپ صلی اللہ علیہ وسلم کو دیکھا آپ ہنس رہے تھے، حتی کہ آپ کے دانت مبارک ظاہر ہوئے، سیدنا عمر رضی اللہ عنہ نے عرض کی: یا رسول اللہ صلی اللہ علیہ وسلم میرے ماں باپ آپ پر قربان ہو جائیں، آپ کے ہنسنے کی وجہ کیا ہے؟ آپ صلی اللہ علیہ وسلم نے فرمایا: میری امت کے دو آدمی ہیں جو کہ اپنے رب کے سامنے پاؤں کی انگلیوں کے بل کھڑے ہوں گے، ان میں سے ایک کہے گا: اے میرے رب! میرے بھائی سے میرے ظلم کا بدلہ لے، اللہ تبارک و تعالیٰ اس طالب سے فرمائے گا: تو اپنے بھائی کے ساتھ اب کیا کرنا چاہتا ہے، جبکہ اس کی تو اب کوئی نیکی باقی نہیں بچی ہے، وہ کہے گا: اے میرے رب! میرے گناہ اس کے اوپر ڈال دیئے جائیں، یہ فرما کر حضور صلی اللہ علیہ وسلم رو پڑے اور آپ کی آنکھوں سے آنسو بہہ نکلے، پھر فرمایا: وہ دن بہت عظیم ہے، اس دن لوگ اس بات کے محتاج ہوں گے کہ ان کے بوجھ ان سے ہلکے کئے جائیں، اللہ تعالیٰ طالب سے فرمائے گا: اپنی نگاہ اٹھاؤ اور جنت میں دیکھو، وہ آدمی اپنا سر اٹھائے گا اور دیکھ کر بولے گا: یا اللہ میں سونے کے شہر اور سونے کے بنے ہوئے محلات دیکھ رہا ہوں، وہ محلات کس نبی کے ہیں؟ یا یہ کس صدیق کے ہیں؟ یا یہ کسی شہید کے ہیں؟ اللہ تعالیٰ فرمائے گا: یہ اس کے لئے ہے جس نے ثمن خرچ کیا، وہ کہے گا: یا اللہ اس کا کون مالک ہے؟ اللہ تعالیٰ فرمائے گا: تم بھی اس کے مالک بن سکتے ہو، وہ پوچھے گا: یا اللہ وہ کیسے؟ اللہ تعالیٰ فرمائے گا: اپنے بھائی کو معاف کر کے، وہ کہے گا: یا اللہ میں نے اس کو معاف کر دیا، اللہ تعالیٰ فرمائے گا: اپنے بھائی کے ہاتھ کو پکڑ کر اس کو جنت میں لے جاؤ، اس موقع پر رسول اللہ صلی اللہ علیہ وسلم نے فرمایا: اللہ تعالیٰ سے ڈرتے رہو اور اپنے درمیان صلح رکھو، کیونکہ اللہ تعالیٰ مسلمانوں کے درمیان صلح چاہتا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 8933]

سیدنا عبداللہ بن عمر رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: جو کوئی قیامت کا منظر نامہ اپنی نگاہوں کے سامنے دیکھنا چاہتا ہو، وہ سورت اذا الشمس کورت اور سورت اذا السماء انفطرت اور سورت اذا السماء انشقت پڑھ لیا کرے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 8934]