سیدنا عبداللہ بن عباس رضی اللہ عنہما سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”لوگوں میں سب سے ہلکا عذاب ابوطالب کو ہوگا، ان کے پیروں میں آگ کے دو جوتے ہوں گے جن کی تپش سے ان کا دماغ کھول رہا ہوگا۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا! ان دونوں (امام بخاری اور امام مسلم) کا اتفاق تو محض عبدالملک بن عمیر کی اس حدیث پر ہے جو انہوں نے عبداللہ بن حارث سے، انہوں نے سیدنا عباس رضی اللہ عنہ سے روایت کی، انہوں نے کہا: میں نے عرض کی: اے اللہ کے رسول! یقیناً ابوطالب آپ کی حفاظت کرتے تھے، آپ کا دفاع کرتے تھے اور آپ کی خاطر غصہ ہوتے تھے، تو کیا آپ نے انہیں کوئی فائدہ پہنچایا؟ آپ صلی اللہ علیہ وسلم نے فرمایا: ”میں نے انہیں آگ کی گہرائیوں میں پایا تو انہیں نکال کر آگ کے کم گہرے حصے میں کر دیا۔“ اور یزید بن ہاد کی حدیث جو عبداللہ بن حباب کے واسطے سے سیدنا ابوسعید خدری رضی اللہ عنہ سے مروی ہے کہ انہوں نے رسول اللہ صلی اللہ علیہ وسلم کو سنا، جبکہ آپ صلی اللہ علیہ وسلم کے پاس آپ کے چچا ابوطالب کا ذکر کیا گیا، تو آپ صلی اللہ علیہ وسلم نے فرمایا: ”شاید قیامت کے دن میری شفاعت انہیں نفع دے اور انہیں جہنم کے ایک کم گہرے حصے میں رکھ دیا جائے جو ان کے ٹخنوں تک پہنچے اور اس کی تپش سے ان کا دماغ کھول رہا ہو۔“ [المستدرك على الصحيحين/كِتَابُ: الْأَهْوَالِ/حدیث: 8950]