ام المومنین سیدہ عائشہ رضی اللہ عنہا فرماتی ہیں: ایک دفعہ کا ذکر ہے کہ رسول اللہ صلی اللہ علیہ وسلم میرے پاس سے گزرے، میں اس وقت ہاتھ اٹھائے یہ دعا مانگ رہی تھی ” اے اللہ میرا حساب آسان لینا “۔ رسول اللہ صلی اللہ علیہ وسلم نے فرمایا: کیا تمہیں پتا ہے کہ آسان حساب کیا ہوتا ہے؟ میں نے کہا: اللہ تعالیٰ نے قرآن کریم میں آسان حساب کا ذکر کیا ہے۔ فَسَوْفَ يُحَاسَبُ حِسَابًا يَسِيرًا [الانشقاق: 8] ” اس سے عنقریب سہل حساب لیا جائے گا “ حضور صلی اللہ علیہ وسلم نے فرمایا: اے عائشہ جس شخص کا (سخت) حساب لیا جائے گا، اس کو اللہ تعالیٰ کی بارگاہ میں پیش کر دیا جائے گا۔ [المستدرك على الصحيحين/كِتَابُ: الْأَهْوَالِ/حدیث: 8943]

سیدنا ابوہریرہ رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: قیامت کے دن جس کو سب سے ہلکا عذاب دیا جائے گا، اس کو آگ کے جوتے پہنا دیے جائیں گے، جس کی تپش کی وجہ سے اس کا دماغ کھول رہا ہو گا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ اس حدیث کی کچھ شواہد احادیث بھی موجود ہیں، جو کہ سیدنا عبداللہ بن عباس، سیدنا نعمان بن بشیر اور سیدنا ابوسعید خدری رضی اللہ عنہم کے واسطے سے رسول اللہ صلی اللہ علیہ وسلم سے مروی ہیں، ان کے الفاظ میں کچھ فرق ہے۔ سیدنا نعمان بن بشیر رضی اللہ عنہ کی روایت کردہ حدیث درج ذیل ہے۔ [المستدرك على الصحيحين/كِتَابُ: الْأَهْوَالِ/حدیث: 8944]

سیدنا نعمان بن بشیر رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: دوزخیوں میں سب سے کم عذاب جس کو دیا جائے گا، وہ ایسا شخص ہو گا جس کو آگ کے جوتے اور آگ کے تسمے پہنائے جائیں گے، اس کی وجہ سے اس کا دماغ ہنڈیا کی طرح ابل رہا ہو گا، اور وہ خود اپنے بارے میں یہ سمجھ رہا ہو گا کہ سب سے زیادہ سخت عذاب اسی کو ہو رہا ہے، حالانکہ اس کا عذاب سب سے ہلکا ہو گا۔ [المستدرك على الصحيحين/كِتَابُ: الْأَهْوَالِ/حدیث: 8945]

خیثمہ نے سیدنا نعمان بن بشیر رضی اللہ عنہ کے حوالے سے یہ حدیث نقل کی ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 8946]

سیدنا نعمان بن بشیر رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: قیامت کے دن سب سے ہلکے عذاب والا وہ ہو گا، جس کے قدموں کے تلووں پر انگارہ رکھ دیا جائے گا، جس کی تپش کی وجہ سے اس کا دماغ ہنڈیا کی مانند کھول رہا ہو گا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 8947]

سیدنا نعمان بن بشیر رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: قیامت کے دن سب سے ہلکا عذاب اس شخص کا ہو گا جس کے پاؤں کے تلوں میں انگارے رکھ دیئے جائیں گے ان کی وجہ سے اس کا دماغ یوں ابلے گا جیسے ہنڈیا یا تانبے کے برتن میں پانی ابلتا ہے۔ سیدنا ابوسعید خدری رضی اللہ عنہ سے مروی حدیث درج ذیل ہے۔ [المستدرك على الصحيحين/كِتَابُ: الْأَهْوَالِ/حدیث: 8948]