سیدنا سمرہ بن جندب رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: کچھ دوزخی ایسے ہوں گے جن کو ٹخنوں تک آگ جلا چکی ہو گی، کچھ کو گھٹنوں تک اور کچھ کو کمر تک اور بعض کو گردن تک جلا چکی ہو گی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 8955]

سیدنا سدی بیان کرتے ہیں کہ میں نے سیدنا مرہ سے قرآن کریم کی اس آیت کے بارے میں پوچھا {وَإِنْ مِنْكُمْ إِلَّا وَارِدُهَا} [مريم: 71] ” اور تم میں کوئی ایسا نہیں جس کا گزر دوزخ پر نہ ہو “ تو انہوں نے مجھے بتایا کہ سیدنا عبداللہ بن مسعود رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: لوگوں کو دوزخ پر لایا جائے گا، پھر ان کو ان کے اعمال کے مطابق اس میں سے گزارا جائے گا، ان میں سے کچھ تو بجلی کی چمک کی طرح گزر جائیں گے، کچھ تیز ہوا کی مانند، کچھ تیز گھوڑے کی طرح، کچھ کجاوے میں سوار کی طرح، کچھ تیز دوڑ کر اور کچھ پیدل چل کر گزریں گے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ شعبہ نے اسماعیل السدی کے حوالے سے یہ حدیث نقل کی ہے۔ [المستدرك على الصحيحين/كِتَابُ: الْأَهْوَالِ/حدیث: 8956]

شعبہ، سدی سے مرہ کے حوالے سے روایت کرتے ہیں کہ سیدنا عبداللہ نے {وَإِنْ مِنْكُمْ إِلَّا وَارِدُهَا} [مريم: 71] ” اور تم میں کوئی ایسا نہیں جس کا گزر دوزخ پر نہ ہو “ کے بارے میں فرمایا: لوگ پل صراط پر آئیں گے، پھر اپنے اپنے اعمال کے مطابق اس پر سے گزر جائیں گے۔ [المستدرك على الصحيحين/كِتَابُ: الْأَهْوَالِ/حدیث: 8957]

شعبہ نے سدی کے واسطے سے مرہ سے روایت كیا ہے كہ سیدنا عبداللہ نے {وَإِنْ مِنْكُمْ إِلَّا وَارِدُهَا} [مريم: 71] ” اور تم میں کوئی ایسا نہیں جس کا گزر دوزخ پر نہ ہو “ کے بارے میں فرمایا ہے کہ لوگ پل صراط پر آئیں گے پھر اس پر سے اپنے اپنے اعمال کے مطابق گزریں گے۔ عبدالرحمن بن مہدی کہتے ہیں: میں نے شعبہ کو اسرائیل کے واسطے سے، پھر سدی کے واسطے سے، پھر مرہ سے، اور پھر سیدنا عبداللہ کے واسطے سے مرفوعاً نبی اکرم صلی اللہ علیہ وسلم کے حوالے سے بیان کیا ہے۔ لیکن میں نے اس کو جان بوجھ کر چھوڑ دیا ہے۔ [المستدرك على الصحيحين/كِتَابُ: الْأَهْوَالِ/حدیث: 8958]

عبدالرحمن بن شیبہ فرماتے ہیں: یہاں پر ورود کے بارے میں اختلاف ہے، کچھ لوگ کہتے ہیں: مومن دوزخ میں داخل نہیں ہو گا اور کچھ کہتے ہیں کہ سب داخل ہوں گے، پھر اللہ تعالیٰ ان میں سے متقین کو نجات دے دے گا۔ میں نے ان سے کہا: اس بابت بصرہ میں بھی ہمارا اختلاف ہوا تھا، کچھ لوگوں نے کہا تھا کہ مومن دوزخ میں داخل نہیں ہوں گے اور کچھ کا نظریہ تھا کہ سب داخل ہوں گے، پھر اللہ تعالیٰ ان میں سے متقین کو نکال لے گا، پھر انہوں نے اپنی انگلیاں اپنے کانوں کو لگائیں اور فرمایا: اگر میں نے رسول اللہ سے یہ نہ سنا ہو تو یہ میرے یہ کان بہرے ہو جائیں، رسول اللہ نے فرمایا: ورود سے مراد دخول ہے۔ کوئی نیک و بد نہیں بچے گا، سب کو اس میں داخل کیا جائے گا، البتہ وہ آگ مومن پر سلامتی والی ٹھنڈی ہو جائے گی، جیسا کہ سیدنا ابراہیم علیہ السلام پر ہوئی تھی۔ حتی کہ دوزخ اپنے آگ کے ٹھنڈا ہونے کی وجہ سے چیخ و پکار کر رہی ہو گی، پھر اللہ تعالیٰ متقین کو اس میں سے نجات دے گا اور ظالموں کو اس میں جلتا رہنے دے گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 8959]

مرہ ہمدانی بیان کرتے ہیں کہ سیدنا عبداللہ بن مسعود رضی اللہ عنہ سے اللہ تعالیٰ کے ارشاد {وَإِنْ مِنْكُمْ إِلَّا وَارِدُهَا} [مريم: 71] ” اور تم میں کوئی ایسا نہیں جس کا گزر دوزخ پر نہ ہو “ کے بارے میں پوچھا گیا تو انہوں نے فرمایا وَإِنْ مِنْكُمْ إِلَّا دَاخِلُهَا كَانَ عَلَى رَبِّكَ حَتْمًا مَقْضِيًّا ثُمَّ يُنَجِّي اللَّهُ الَّذِينَ اتَّقَوْا وَيَذَرُ الظَّالِمِينَ فِيهَا جِثِيًّا ” اور تم میں کوئی ایسا نہیں جس کا گزر دوزخ پر نہ ہو تمہارے رب کے ذمہ پر یہ ضرور ٹھہری ہوئی بات ہے پھر ہم ڈر والوں کو بچا لیں گے۔ اور ظالموں کو اس میں چھوڑ دیں گے گھٹنوں کے بل کے“ مطلب یہ کہ اس آیت میں ” واردہا “ کا مطلب ”داخلہا “ ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 8960]

سیدنا ابوسعید خدری رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: قیامت کے دن آدمی اپنے باپ کا ہاتھ پکڑے گا، لیکن آگ اس کا ہاتھ چھڑوا دے گی، وہ بندہ اس کو جنت میں لے جانا چاہتا ہو گا، پھر ایک ندا دینے والا کہے گا: جنت میں کوئی مشرک داخل نہیں ہو سکتا۔ خبردار! اللہ تعالیٰ نے جنت ہر مشرک پر حرام فرما دی ہے۔ وہ اللہ تعالیٰ کو آوازیں دے گا، تو اس کی شکل بگاڑ دی جائے گی اور اس سے بدبو پھوٹنے لگ جائے گی تو وہ اپنے باپ کو چھوڑ دے گا۔ صحابہ کرام اس سے یہ سمجھا كرتے تھے كہ یہ بات سیدنا ابراہیم علیہ السلام کے بارے میں كہی گئی ہے۔ لیکن رسول اللہ صلی اللہ علیہ وسلم نے بھی اس كی مزید كوئی تشریح نہیں فرمائی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ كے معیار کے مطابق صحیح ہے لیکن شیخین رحمۃ اللہ علیہما نے اس كو نقل نہیں كیا۔ [المستدرك على الصحيحين/كِتَابُ: الْأَهْوَالِ/حدیث: 8961]

سیدنا قیس بن ابی حازم بیان كرتے ہیں كہ سیدنا عبداللہ بن رواحہ رضی اللہ عنہ روئے اور ان كی زوجہ بھی رونے لگ گئی، عبداللہ بن رواحہ رضی اللہ عنہ نے پوچھا: تم كیوں رو رہی ہو؟ انہوں نے كہا: آپ كو روتے ہوئے دیكھ كر میں بھی رو پڑی۔ آپ نے فرمایا: مجھے یہ تو بتا دیا گیا ہے كہ میں دوزخ میں داخل ہوں گا، لیکن یہ نہیں بتایا گیا كہ میں نكل بھی پاؤں گا یا نہیں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ كے معیار کے مطابق صحیح ہے لیکن شیخین رحمۃ اللہ علیہما نے اس كو نقل نہیں كیا۔ [المستدرك على الصحيحين/كِتَابُ: الْأَهْوَالِ/حدیث: 8962]