سیدنا عبداللہ بن مسعود رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اے عورتو! صدقہ دیا کرو، اگرچہ اپنے زیورات میں سے ہی دینا پڑے، کیونکہ تم زیادہ تعداد میں دوزخ میں جاؤ گی، ایک عورت (یہ عورت، علاقے کی بڑی عورتوں میں سے نہیں تھی) نے کہا: یا رسول اللہ صلی اللہ علیہ وسلم کیا وجہ ہے، ہم زیادہ تعداد میں دوزخ میں کیوں جائیں گی؟ آپ صلی اللہ علیہ وسلم نے فرمایا: اس لئے کہ تم بہت زیادہ لعن طعن کرتی ہو، اور شوہر کی نافرمانی کرتی ہو، اور تمہاری عقل بھی ناقص ہے اور تمہارا دین بھی ناقص ہے، اور تم سے زیادہ مرد کی عقل خراب کرنے والا کوئی نہیں ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ تاہم جریر نے منصور سے، انہوں نے اعمش سے روایت کیا ہے اور اس میں کچھ الفاظ کا اضافہ بھی ہے۔ [المستدرك على الصحيحين/كِتَابُ: الْأَهْوَالِ/حدیث: 8997]

8998 - سیدنا عبداللہ بن مسعود (رضی اللہ عنہ) سے روایت ہے کہ رسول اللہ صلی اللہ علیہ وسلم نے فرمایا: "اے عورتوں کی جماعت! صدقہ کیا کرو خواہ اپنے زیورات ہی میں سے کیوں نہ ہو، کیونکہ قیامت کے دن جہنم والوں میں تمہاری اکثریت ہوگی"۔ [المستدرك على الصحيحين/كِتَابُ: الْأَهْوَالِ/حدیث: 8998]

8999 - سیدہ زینب (رضی اللہ عنہا) بیان کرتی ہیں کہ: رسول اللہ صلی اللہ علیہ وسلم نے ہمیں خطبہ دیتے ہوئے فرمایا: "اے عورتوں کی جماعت! صدقہ کیا کرو خواہ اپنے زیورات ہی میں سے کیوں نہ ہو، کیونکہ قیامت کے دن جہنم والوں میں تمہاری اکثریت ہوگی"۔ وہ (زینب) کہتی ہیں: عبداللہ (بن مسعود رضی اللہ عنہ) ایک تنگ دست آدمی تھے، اور رسول اللہ صلی اللہ علیہ وسلم کی شخصیت بہت پررعب تھی، چنانچہ میں نے ان (اپنے شوہر) سے کہا: "آپ میرے لیے رسول اللہ صلی اللہ علیہ وسلم سے پوچھیں کہ کیا میرا اپنے شوہر اور اپنی آغوش میں پرورش پانے والے یتیموں پر خرچ کرنا صدقہ شمار ہوگا؟" ابو العباس کہتے ہیں: پھر انہوں نے (مکمل) حدیث ذکر کی (جس میں اس کے جائز ہونے کا ذکر ہے)۔ [المستدرك على الصحيحين/كِتَابُ: الْأَهْوَالِ/حدیث: 8999]

سیدہ زینب رضی اللہ عنہا فرماتی ہیں: ایک مرتبہ رسول اللہ صلی اللہ علیہ وسلم نے ہمیں خطبہ دیتے ہوئے ارشاد فرمایا: اے عورتو! تم صدقہ دیا کرو، اگرچہ اپنے زیورات میں سے ہی دے دیا کرو، کیونکہ جہنمیوں میں اکثریت تمہاری ہے۔ آپ فرماتی ہیں: سیدنا عبداللہ تنگ دست تھے، میں نے ان سے کہا: آپ میرے لئے رسول اللہ صلی اللہ علیہ وسلم سے پوچھیں: کیا میرے لئے یہ صدقہ کافی ہے کہ میں اپنے شوہر کی دیکھ بھال کرتی ہوں اور میری پرورش میں کچھ یتیم بچے ہیں، میں ان کے کھانے پینے کا انتظام کرتی ہوں؟ میں نے کہا: مجھ پر رسول اللہ صلی اللہ علیہ وسلم کی ہیبت طاری ہو جاتی ہے، (اس لئے میں نہیں جا سکتا) تو خود چلی جا اور جا کر پوچھ لے، آپ فرماتی ہیں: میں خود ہی حضور صلی اللہ علیہ وسلم کی بارگاہ میں چلی گئی، جب میں دروازے پر پہنچی تو ایک انصاری خاتون وہاں پر موجود تھی اس کا مسئلہ بھی میرے ساتھ ملتا جلتا تھا، آپ فرماتی ہیں: پھر سیدنا بلال باہر تشریف لائے، ہم نے ان سے کہا: آپ حضور صلی اللہ علیہ وسلم سے ہمارا یہ مسئلہ پوچھ کر ہمیں بتا دیں کہ ہم اپنے شوہر پر اور اپنی پرورش میں یتیموں پر جو خرچہ کرتی ہیں، کیا ہمارے لئے وہ صدقہ کافی ہے؟ سیدنا بلال رضی اللہ عنہ نے رسول اللہ صلی اللہ علیہ وسلم کی بارگاہ میں حاضر ہو کر عرض کی: یا رسول اللہ صلی اللہ علیہ وسلم دروازے پر زینب آئی ہے؟ آپ صلی اللہ علیہ وسلم نے پوچھا: کون سی زینب؟ انہوں نے بتایا کہ عبداللہ کی زوجہ زینب اور ایک زینب نامی انصاری خاتون ہیں، وہ آپ سے پوچھنے آئی ہیں کہ ہم اپنے شوہروں پر اور اپنی گود میں یتیم بچوں پر جو خرچہ کرتی ہیں، کیا وہ ہمارے لئے کافی ہے؟ یہ پوچھ کر سیدنا بلال رضی اللہ عنہ باہر تشریف لائے اور ہمیں بتایا کہ رسول اللہ صلی اللہ علیہ وسلم نے ارشاد فرمایا: ان کے لئے اس عمل میں دگنا اجر ہے، قرابت کا ثواب بھی ہے اور صدقے کا ثواب بھی ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ لیکن انہوں نے اس کو اس اسناد کے ہمراہ نقل نہیں کیا۔ تا ہم صرف امام مسلم رحمۃ اللہ علیہ نے بہت اختصار کے ساتھ اس کو نقل كیا ہے۔ [المستدرك على الصحيحين/كِتَابُ: الْأَهْوَالِ/حدیث: 8999M]