سیدنا ابوعبدالرحمن سلمی بیان کرتے ہیں: آپ فرماتے ہیں: مدائن سے ایک فرسخ کے فاصلے پر ہم نے پڑاؤ ڈالا، جب جمعہ آیا تو ہم جمعہ پڑھنے آئے، سیدنا حذیفہ رضی اللہ عنہ نے خطبہ دیا، اور فرمایا: اللہ تعالیٰ ارشاد فرماتا ہے {اقْتَرَبَتِ السَّاعَةُ وَانْشَقَّ الْقَمَرُ} [القمر: 1] ” پاس آئی قیامت اور شق ہو گیا چاند “ خبردار بے شک قیامت قریب ہے، خبردار، چاند دو ٹکڑے ہو چکا، خبردار! دنیا جدائی کے بالکل قریب ہے، خبردار! آج دوڑ ہے اور کل اس میں سبقت ہو گی۔ میں نے سیدنا ابی سے کہا: کیا لوگ کل سبقت حاصل کریں گے؟ آپ نے فرمایا: اے میرے پیارے بیٹے، تم نادان ہو، اس سے مراد یہ ہے کہ آج عمل کا دن ہے اور کل اعمال کی جزاء ملے گی، جب اگلا جمعہ آیا تو ہم پھر جمعہ کے لیے حاضر ہوئے، سیدنا حذیفہ رضی اللہ عنہ نے خطبہ دیتے ہوئے فرمایا کہ اللہ تعالیٰ ارشاد فرماتا ہے خبردار! دنیا جدائی کے قریب ہے، خبردار، آج مضمار ہے اور کل سباق ہے۔ خبردار انتہاء، دوزخ ہے۔ اور سبقت حاصل کرنے والا وہ ہے جو جنت کی جانب سبقت کر گیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 9015]

سیدنا ابوسعید خدری رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: مٹی، انسان کا سب کچھ کھا جائے گی سوائے ” عجب الذنب “ کے۔ عرض کیا گیا: یا رسول اللہ صلی اللہ علیہ وسلم وہ کیا چیز ہے؟ آپ صلی اللہ علیہ وسلم نے فرمایا: رائی کے دانے کے برابر ایک ہڈی ہے، اسی سے لوگوں کو دوبارہ پیدا کیا جائے گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 9016]

سیدنا ابوقلابہ فرماتے ہیں: قاریوں کی ایک جماعت سیدنا ابوذر رضی اللہ عنہ کے پاس حاضر ہوئی، اس وقت ان کے پاس ایک سیاہ فام خاتون تھی، اس نے قطوانیہ برقعہ اوڑھ رکھا تھا، اس کے اوپر نہ مجاسد (زعفران یا عصفر کے رنگ) کا اثر تھا اور نہ اس پر خلوق (زعفرانی خوشبو) کا اثر تھا، سیدنا ابوذر رضی اللہ عنہ نے فرمایا: تم جانتے ہو کہ یہ خاتون کیا کہہ رہی ہے؟ یہ کہہ رہی ہے کہ میں عراق میں آؤں، اگر میں عراق میں گیا تو لوگ کہیں گے کہ یہ رسول اللہ صلی اللہ علیہ وسلم کے صحابی ہیں، پھر ہمارے پاس بہت ساری دنیا آئے گی، اور میرے دوست ابوالقاسم صلی اللہ علیہ وسلم نے مجھ سے یہ عہد لیا تھا کہ پل صراط پھسلنے والی جگہ ہے اور ہمارے بوجھوں میں خرابیاں ہیں، شاید کہ ہم اس سے نجات پا جائیں۔ ٭٭ اگر ابوقلابہ نے سیدنا ابوذر غفاری رضی اللہ عنہ سے سماع کیا ہے تو یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 9017]

سیدنا عبداللہ ابن ابی ملیکہ فرماتے ہیں: ایک آدمی نے سیدنا عبداللہ بن عباس رضی اللہ عنہما سے اللہ تعالیٰ کے اس ارشاد {وَإِنَّ يَوْمًا عِنْدَ رَبِّكَ كَأَلْفِ سَنَةٍ مِمَّا تَعُدُّونَ} [الحج: 47] ”بے شک تمہارے رب کے یہاں ایک دن ایسا ہے جیسے تم لوگوں کی گنتی میں ہزار برس “ کے بارے میں پوچھا: سیدنا عبداللہ نے پوچھا کہ تم کون ہو؟ اس نے اپنا تعارف کروایا، سیدنا عبداللہ بن عباس رضی اللہ عنہما نے کہا: وہ کون سا دن ہے جو پچاس ہزار سال کا ہو گا؟ اس آدمی نے کہا: اللہ تعالیٰ آپ پر رحمت کرے میں تو آپ سے پوچھ رہا ہوں، آپ مجھے بتایئے، (آپ الٹا مجھ ہی سے پوچھنے لگ گئے ہیں) سیدنا عبداللہ بن عباس رضی اللہ عنہما نے فرمایا: دو دنوں کا ذکر اللہ تعالیٰ نے قرآن پاک میں فرمایا ہے، اللہ ہی بہتر جانتا ہے کہ ان دونوں میں سے کون سا دن ہے، آپ رضی اللہ عنہما نے کتاب اللہ کے بارے میں بغیر علم کے کچھ کہنا مناسب نہ سمجھا۔ ٭٭ یہ حدیث امام بخاری رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 9018]