سیدہ ام کرز رضی اللہ عنہا بیان کرتی ہیں کہ میں نے رسول اللہ صلی اللہ علیہ وسلم سے سنا آپ صلی اللہ علیہ وسلم فرماتے تھے: ”لڑکے کی طرف سے دو بکریاں برابر برابر (ایک جیسی) اور لڑکی کی طرف سے ایک بکری ہے۔“ امام ابوداؤد رحمہ اللہ فرماتے ہیں: میں نے امام احمد رحمہ اللہ سے سنا، کہتے تھے کہ «مُكَافِئَتَانِ» کے معنی ہیں کہ ”دونوں بکریاں برابر برابر ہوں یا قریب قریب ہوں۔“ [سنن ابي داود/كِتَاب الضَّحَايَا/حدیث: 2834]

سیدہ ام کرز رضی اللہ عنہا بیان کرتی ہیں کہ میں نے نبی کریم صلی اللہ علیہ وسلم سے سنا، آپ صلی اللہ علیہ وسلم فرماتے تھے: ”پرندوں کو اپنے گھونسلوں میں رہنے دو (انہیں اچھا یا برا شگون لینے کے لیے نہ اڑاؤ)۔“ کہتی ہیں: اور میں نے آپ صلی اللہ علیہ وسلم سے سنا ہے، آپ صلی اللہ علیہ وسلم فرماتے تھے: ”لڑکے کی طرف سے دو بکریاں ہوں اور لڑکی کی طرف سے ایک بکری، اور کوئی حرج نہیں کہ دونوں مذکر ہوں یا دونوں مؤنث۔“ [سنن ابي داود/كِتَاب الضَّحَايَا/حدیث: 2835]

سیدہ ام کرز رضی اللہ عنہا بیان کرتی ہیں کہ رسول اللہ صلی اللہ علیہ وسلم نے فرمایا: ”لڑکے کی طرف سے دو بکریاں ہیں ہم مثل (ایک جیسی) اور لڑکی کی طرف سے ایک بکری ہے۔“ امام ابوداؤد رحمہ اللہ فرماتے ہیں: ”صحیح حدیث یہی ہے جبکہ سفیان کی حدیث وہم ہے۔“ [سنن ابي داود/كِتَاب الضَّحَايَا/حدیث: 2836]

سیدنا سمرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”ہر بچہ اپنے عقیقے کے ساتھ گروی ہوتا ہے۔ (لہٰذا) ساتویں دن اس کی طرف سے جانور ذبح کیا جائے، سر منڈایا جائے اور اس پر خون لگایا جائے۔“ قتادہ رحمہ اللہ سے جب یہ پوچھا جاتا کہ خون کس طرح لگایا جائے تو وہ کہتے: ”جب جانور ذبح کیا جا رہا ہو تو اس کے چند بال لے کر اس کی (کٹنے والی) رگوں کے آگے کر دو اور بچے کی چندیا پر رکھ دیے جائیں حتیٰ کہ وہ (تازہ تازہ خون) اس کے سر پر دھاگے کی مانند بہنے لگے۔ پھر اس کا سر دھویا جائے اور بال مونڈ دیے جائیں۔“ امام ابوداؤد رحمہ اللہ فرماتے ہیں کہ «وَيُدَمَّىٰ» ”خون لگانے والی بات“ ہمام کا وہم ہے۔ امام ابوداؤد رحمہ اللہ فرماتے ہیں کہ اس جملے میں ہمام کی مخالفت کی گئی ہے۔ دیگر لوگ «وَيُسَمَّىٰ» ”بچے کا نام رکھا جائے“ روایت کرتے ہیں، مگر ہمام نے اس لفظ کو «وَيُدَمَّىٰ» کہہ دیا۔ امام ابوداؤد رحمہ اللہ کہتے ہیں: ”یہ قابل عمل بھی نہیں ہے۔“ [سنن ابي داود/كِتَاب الضَّحَايَا/حدیث: 2837]

سیدنا سمرہ بن جندب رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”ہر بچہ اپنے عقیقہ کے ساتھ گروی ہوتا ہے۔ (لہٰذا) ساتویں دن اس کی طرف سے جانور ذبح کیا جائے، اس کا سر مونڈا جائے اور نام رکھا جائے۔“ امام ابوداؤد رحمہ اللہ فرماتے ہیں: ”لفظ «يُسَمَّىٰ» صحیح تر ہے۔ سلام بن ابی مطیع نے قتادہ سے اور ایاس بن دغفل اور اشعث نے بواسطہ حسن لفظ «وَيُسَمَّىٰ» روایت کیا ہے اور اشعث نے حسن سے، انہوں نے نبی کریم صلی اللہ علیہ وسلم سے یہی لفظ «وَيُسَمَّىٰ» بیان کیا ہے۔“ [سنن ابي داود/كِتَاب الضَّحَايَا/حدیث: 2838]

سیدنا سلمان بن عامر ضبی رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”لڑکے کے لیے عقیقہ لازمی ہے، لہٰذا اس کی طرف سے خون بہاؤ اور اس کی میل کچیل دور کرو۔“ [سنن ابي داود/كِتَاب الضَّحَايَا/حدیث: 2839]

جناب حسن بصری رحمہ اللہ بیان کرتے تھے کہ ” «إِمَاطَةُ الْأَذَى» (میل کچیل دور کرنے) سے مراد بچے کا سر مونڈنا ہے۔“ [سنن ابي داود/كِتَاب الضَّحَايَا/حدیث: 2840]

سیدنا ابن عباس رضی اللہ عنہما سے مروی ہے کہ رسول اللہ صلی اللہ علیہ وسلم نے ”سیدنا حسن اور حسین رضی اللہ عنہما کے عقیقہ میں ایک ایک مینڈھا ذبح کیا تھا۔“ [سنن ابي داود/كِتَاب الضَّحَايَا/حدیث: 2841]

عمرو بن شعیب اپنے والد سے اور میرا خیال ہے کہ وہ اپنے دادا رضی اللہ عنہ سے روایت کرتے ہیں کہ انہوں نے کہا: نبی کریم صلی اللہ علیہ وسلم سے عقیقہ کے بارے میں پوچھا گیا تو آپ نے فرمایا: ”اللہ ذوالجلال «عُقُوق» کو پسند نہیں فرماتا۔“ گویا آپ نے (عقیقہ کا) نام پسند نہیں فرمایا (کیونکہ عقیقہ اور عقوق کا مادہ ایک ہے)۔ آپ صلی اللہ علیہ وسلم نے فرمایا: ”جس کے ہاں بچے کی ولادت ہو اور وہ اس کی طرف سے صدقہ اور قربانی کرنا چاہتا ہو تو کرے، لڑکے کی طرف سے دو بکریاں برابر برابر اور لڑکی کی طرف سے ایک بکری۔“ آپ صلی اللہ علیہ وسلم سے «فَرَع» کے متعلق پوچھا گیا، تو آپ صلی اللہ علیہ وسلم نے فرمایا: ” «فَرَع» بھی حق ہے اور چاہیے کہ اس (نوزائیدہ) جانور کو چھوڑ دو، حتیٰ کہ جب وہ ایک سال کا یا دو سال کا خوب تنومند ہو جائے تو کسی بیوہ کو دے دو یا جہاد فی سبیل اللہ میں (سواری کے لیے) دے دو، یہ بہتر ہے اس سے کہ تم اسے ذبح کر ڈالو جبکہ اس کا گوشت اس کے بالوں ہی سے لگا ہوا ہو، اور اپنے برتن کو تم اوندھا کر ڈالو اور اپنی اونٹنی کو بے قرار اور بے چین کر چھوڑو۔“ [سنن ابي داود/كِتَاب الضَّحَايَا/حدیث: 2842]

جناب عبداللہ بن بریدہ کہتے ہیں: ”میں نے اپنے والد سیدنا بریدہ رضی اللہ عنہ سے سنا، وہ بیان کرتے تھے کہ: ”دور جاہلیت میں جب ہم میں سے کسی کے ہاں بچے کی ولادت ہوتی تو وہ ایک بکری ذبح کرتا اور اس کا خون بچے کے سر پر چپڑ دیتا تھا اور جب سے اللہ نے ہمیں اسلام کی نعمت سے نوازا ہے تو ہم ایک بکری ذبح کرتے ہیں، بچے کا سر مونڈتے ہیں اور اس کے سر پر زعفران مل دیتے ہیں۔“” [سنن ابي داود/كِتَاب الضَّحَايَا/حدیث: 2843]