سیدنا عمرو بن شرید اپنے والد رضی اللہ عنہ سے روایت کرتے ہیں کہ رسول اللہ صلی اللہ علیہ وسلم نے فرمایا: ”مالدار کا قرض کی ادائیگی میں ٹال مٹول سے کام لینا اس کی بے عزتی اور سزا کو حلال کر دیتا ہے۔“ ابن مبارک رحمہ اللہ نے کہا: ”اس کی بے عزتی کو حلال کر دیتا ہے۔ یعنی اس کے ساتھ سختی سے پیش آیا جائے۔ اور اس کو سزا دینا حلال ہے۔ یعنی اسے قید کیا جا سکتا ہے۔“ [سنن ابي داود/كِتَاب الْأَقْضِيَةِ/حدیث: 3628]

ہرماس بن حبیب ایک دیہاتی آدمی تھا، وہ اپنے والد سے، وہ ان کے دادا سے روایت کرتا ہے کہ میں اپنے ایک مقروض کو نبی کریم صلی اللہ علیہ وسلم کے پاس لایا تو آپ صلی اللہ علیہ وسلم نے مجھے فرمایا: ”اس کے ساتھ چمٹا رہ۔“ پھر آپ صلی اللہ علیہ وسلم نے مجھے فرمایا: ”اے بنو تمیم کے بھائی! تو اپنے قیدی کے ساتھ کیا کرنا چاہتا ہے؟“ [سنن ابي داود/كِتَاب الْأَقْضِيَةِ/حدیث: 3629]

جناب بہز بن حکیم اپنے والد سے، وہ ان کے دادا (معاویہ بن حیدہ قشیری رضی اللہ عنہ) سے روایت کرتے ہیں کہ ”نبی کریم صلی اللہ علیہ وسلم نے ایک آدمی کو تہمت (شبہ) میں قید کیا تھا۔“ [سنن ابي داود/كِتَاب الْأَقْضِيَةِ/حدیث: 3630]

جناب بہز بن حکیم اپنے والد سے، وہ ان کے دادا (سیدنا معاویہ بن حیدہ قشیری رضی اللہ عنہ) سے روایت کرتے ہیں کہ ابن قدامہ نے کہا: معاویہ رضی اللہ عنہ کا بھائی یا چچا، اور مؤمل (مؤمل ابن ہشام) نے کہا: بیشک وہ (معاویہ) نبی کریم صلی اللہ علیہ وسلم کے روبرو کھڑا ہوا جبکہ آپ صلی اللہ علیہ وسلم خطبہ ارشاد فرما رہے تھے۔ اس نے کہا: ”میرے ہمسایوں کو کس بنا پر پکڑا گیا ہے؟“ آپ صلی اللہ علیہ وسلم نے اس سے دو بار اعراض فرمایا۔ پھر معاویہ نے کچھ کہا تو نبی کریم صلی اللہ علیہ وسلم نے فرمایا: ”اس کے ہمسایوں کو رہا کر دو۔“ مؤمل نے اپنی روایت میں ”خطبہ دینے کا“ ذکر نہیں کیا۔ [سنن ابي داود/كِتَاب الْأَقْضِيَةِ/حدیث: 3631]