جناب یزید بن نعیم بن ہزال اپنے والد سے روایت کرتے ہیں کہ سیدنا ماعز بن مالک رضی اللہ عنہ یتیم لڑکا تھا اور میرے والد کی سرپرستی میں تھا۔ پھر وہ قبیلے کی ایک لڑکی کے ساتھ زنا کر بیٹھا۔ تو میرے والد نے اس سے کہا: ”رسول اللہ صلی اللہ علیہ وسلم کے پاس جاؤ اور جو کچھ تم نے کیا ہے اس کی انہیں خبر دو، شاید وہ تیرے لیے استغفار کریں۔“ اور اس سے ان کا مقصد صرف یہی امید تھی کہ اسے کوئی راہ مل جائے۔ چنانچہ وہ حاضر ہوا اور کہا: ”اے اللہ کے رسول! میں نے زنا کیا ہے، لہٰذا اللہ کی کتاب کا حکم مجھ پر نافذ فرما دیجیے۔“ رسول اللہ صلی اللہ علیہ وسلم نے اس سے رخ پھیر لیا۔ اس نے پھر کہا: ”اے اللہ کے رسول! میں نے زنا کیا ہے، مجھ پر اللہ کی کتاب کا حکم نافذ فرما دیجیے۔“ آپ صلی اللہ علیہ وسلم نے اس سے رخ پھیر لیا۔ تو اس نے (تیسری بار) پھر کہا: ”اے اللہ کے رسول! میں نے زنا کیا ہے۔ مجھ پر اللہ کی کتاب کا حکم نافذ کر دیجیے۔“ حتیٰ کہ اس نے چار بار اس طرح کہا تو نبی کریم صلی اللہ علیہ وسلم نے فرمایا: ”تو نے چار بار یہ بات کہی ہے، تو نے کس کے ساتھ کیا ہے؟“ کہا: ”فلاں لڑکی کے ساتھ۔“ آپ صلی اللہ علیہ وسلم نے پوچھا: ”تو اس کے ساتھ اکٹھے لیٹا ہے؟“ کہا: ”ہاں۔“ آپ صلی اللہ علیہ وسلم نے پوچھا: ”تو اس کے ساتھ چمٹا ہے؟“ کہا: ”ہاں۔“ آپ صلی اللہ علیہ وسلم نے پوچھا: ”تو نے اس کے ساتھ جماع کیا ہے؟“ کہا: ”ہاں۔“ چنانچہ آپ صلی اللہ علیہ وسلم نے اس کو سنگسار کرنے کا حکم دیا۔ چنانچہ اس کو حرہ کی طرف لے جایا گیا۔ جب اسے پتھر مارے گئے اور اس نے پتھروں کی چوٹ محسوس کی تو برداشت نہ کر پایا اور بھاگ کھڑا ہوا۔ تو سیدنا عبداللہ بن انیس رضی اللہ عنہ نے اس کو پا لیا، جبکہ دیگر ساتھی تھک گئے تھے۔ تو سیدنا عبداللہ رضی اللہ عنہ نے اس کو اونٹ کا پایا نکال مارا اور اسے قتل کر دیا، پھر نبی کریم صلی اللہ علیہ وسلم کے پاس آ کر یہ سب بیان کیا تو آپ صلی اللہ علیہ وسلم نے فرمایا: ”تم نے اس کو چھوڑ کیوں نہ دیا، شاید وہ توبہ کر لیتا اور اللہ اس کی توبہ قبول فرما لیتا۔“ [سنن ابي داود/كِتَاب الْحُدُودِ/حدیث: 4419]

حسن بن محمد بن علی بن ابوطالب رحمہ اللہ نے کہا کہ رسول اللہ صلی اللہ علیہ وسلم کا فرمان: ”تم نے اس کو چھوڑ کیوں نہ دیا۔“ مجھ کو قبیلہ اسلم کے کئی لوگوں نے بیان کیا جنہیں میں جھوٹ سے متہم نہیں سمجھتا، انہوں نے کہا کہ میرے لیے یہ حدیث واضح نہ تھی، چنانچہ میں سیدنا جابر بن عبداللہ رضی اللہ عنہ کے پاس حاضر ہوا اور ان سے کہا: ”قبیلہ اسلم کے لوگ یہ بیان کرتے ہیں کہ رسول اللہ صلی اللہ علیہ وسلم نے (ماعز کو رجم کرنے والے) لوگوں سے کہا، جب انہوں نے آپ صلی اللہ علیہ وسلم کو بتایا کہ ماعز کو جب پتھر لگے تو وہ ان کی چوٹ برداشت نہ کر سکا تو آپ صلی اللہ علیہ وسلم نے فرمایا: ”تم نے اس کو چھوڑ کیوں نہ دیا۔“ میں یہ حدیث سمجھ نہیں سکا ہوں۔“ تو سیدنا جابر رضی اللہ عنہ نے کہا: ”اے بھتیجے! میں اس حدیث کے متعلق سب لوگوں سے بڑھ کر جانتا ہوں، میں ان لوگوں میں شامل تھا جنہوں نے اس کو رجم کیا تھا، جب ہم اس کو لے کر نکلے اور اسے پتھر مارے اور اسے پتھروں کی چوٹ پڑی تو وہ چیخ اٹھا: ”اے قوم! مجھے رسول اللہ صلی اللہ علیہ وسلم کے پاس واپس لے چلو، میری قوم نے مجھے مروا ڈالا ہے، انہوں نے مجھے میری جان کے متعلق دھوکا دیا ہے، انہوں نے مجھ سے کہا تھا کہ رسول اللہ صلی اللہ علیہ وسلم تجھے قتل نہیں کریں گے۔“ مگر ہم اس سے پیچھے نہ ہٹے حتیٰ کہ اسے مار ڈالا، پھر جب ہم رسول اللہ صلی اللہ علیہ وسلم کی خدمت میں پہنچے اور آپ صلی اللہ علیہ وسلم کو اس کی خبر دی تو آپ صلی اللہ علیہ وسلم نے فرمایا: ”تم نے اسے چھوڑ کیوں نہ دیا اور اسے میرے پاس کیوں نہ لے آئے۔“ (غرض یہ تھی کہ) اللہ کے رسول صلی اللہ علیہ وسلم اس کو ثابت قدم رہنے کا کہتے (یعنی دنیا کا عذاب، آخرت کے مقابلے میں ہلکا اور آسان ہے)، لیکن یہ مفہوم ہو کہ آپ صلی اللہ علیہ وسلم نے حد چھوڑ دینے کی غرض سے یہ کہا ہو، ایسے نہیں ہے، چنانچہ تب میں (حسن بن محمد رحمہ اللہ) حدیث کا مطلب سمجھ سکا۔“ [سنن ابي داود/كِتَاب الْحُدُودِ/حدیث: 4420]

سیدنا ابن عباس رضی اللہ عنہ سے روایت ہے کہ ماعز بن مالک رضی اللہ عنہ نبی کریم صلی اللہ علیہ وسلم کی خدمت میں آیا اور کہا: ”بیشک میں نے زنا کیا ہے۔“ تو آپ صلی اللہ علیہ وسلم نے اس سے رخ پھیر لیا۔ اس نے کئی بار ایسے کہا اور آپ صلی اللہ علیہ وسلم اس سے اپنا منہ پھیرتے رہے۔ پھر آپ صلی اللہ علیہ وسلم نے اس کی قوم سے پوچھا: ”کیا یہ مجنون اور پاگل ہے؟“ انہوں نے کہا: ”نہیں، اس میں ایسی کوئی بات نہیں ہے۔“ آپ صلی اللہ علیہ وسلم نے اس سے پوچھا: ”کیا تو نے واقعتاً اس کے ساتھ کیا ہے؟“ اس نے کہا: ”ہاں۔“ تو آپ صلی اللہ علیہ وسلم نے اس کے متعلق حکم دیا کہ اسے رجم کر دیا جائے۔ چنانچہ اسے لے جایا گیا اور سنگسار کر دیا گیا اور آپ صلی اللہ علیہ وسلم نے اس پر نماز جنازہ نہ پڑھی۔ [سنن ابي داود/كِتَاب الْحُدُودِ/حدیث: 4421]

سیدنا جابر بن سمرہ رضی اللہ عنہ سے روایت ہے، وہ کہتے ہیں کہ جب ماعز بن مالک کو نبی کریم صلی اللہ علیہ وسلم کی خدمت میں لایا گیا تو میں نے اسے دیکھا کہ وہ چھوٹے قد کا موٹا آدمی تھا، اس پر چادر نہیں تھی۔ اس نے اپنے اوپر چار گواہیاں دیں کہ اس نے زنا کیا ہے۔ تو رسول اللہ صلی اللہ علیہ وسلم نے اس سے فرمایا: ”شاید تو نے اس کا بوسہ لیا ہوگا؟“ اس نے کہا: ”نہیں اللہ کی قسم! اس نالائق نے زنا کیا ہے۔“ چنانچہ آپ صلی اللہ علیہ وسلم نے اسے رجم کیا (یعنی حکم دیا) پھر آپ صلی اللہ علیہ وسلم نے خطبہ دیا اور فرمایا: ”خبردار! ہم جب اللہ عزوجل کی راہ (جہاد) میں نکلتے ہیں تو کوئی ان میں پیچھے رہ جاتا ہے، ایسے آواز نکالتا ہے جیسے کہ بکرا نکالتا ہے، پھر کسی عورت کو تھوڑی سی کوئی چیز دے دیتا ہے، خبردار! اگر اللہ نے مجھ کو ان میں سے کسی پر قدرت دی تو میں اسے نشانِ عبرت بنا دوں گا۔“ [سنن ابي داود/كِتَاب الْحُدُودِ/حدیث: 4422]

شعبہ نے سماک سے روایت کیا، کہا کہ ”میں نے سیدنا جابر بن سمرہ رضی اللہ عنہ سے یہ حدیث سنی، جبکہ پہلے والی حدیث زیادہ کامل ہے۔“ کہا کہ ”رسول اللہ صلی اللہ علیہ وسلم نے اس کو دوبارہ واپس کیا۔“ سماک کہتے ہیں کہ ”میں نے سعید بن جبیر کو یہ روایت بیان کی تو انہوں نے کہا کہ آپ صلی اللہ علیہ وسلم نے اس کو چار بار لوٹایا تھا۔“ [سنن ابي داود/كِتَاب الْحُدُودِ/حدیث: 4423]

شعبہ کہتے ہیں کہ میں نے جناب سماک سے پوچھا کہ «كُثْبَة» کا کیا مفہوم ہے؟ انہوں نے کہا: ”تھوڑا سا دودھ۔“ [سنن ابي داود/كِتَاب الْحُدُودِ/حدیث: 4424]

سیدنا ابن عباس رضی اللہ عنہما سے روایت ہے، انہوں نے کہا کہ رسول اللہ صلی اللہ علیہ وسلم نے ماعز بن مالک سے کہا: ”کیا جو بات مجھے تیرے متعلق پہنچی ہے وہ حق ہے؟“ انہوں نے کہا: ”آپ صلی اللہ علیہ وسلم کو میرے متعلق کیا خبر پہنچی ہے؟“ آپ صلی اللہ علیہ وسلم نے فرمایا: ”مجھے معلوم ہوا ہے کہ تم بنو فلاں کی لڑکی کے ساتھ زنا کر بیٹھے ہو؟“ انہوں نے کہا: ”ہاں“، چنانچہ اس نے چار گواہیاں دیں۔ پھر آپ صلی اللہ علیہ وسلم نے اس کے متعلق حکم دیا تو اسے رجم کر دیا گیا۔ [سنن ابي داود/كِتَاب الْحُدُودِ/حدیث: 4425]

سیدنا ابن عباس رضی اللہ عنہ سے مروی ہے، انہوں نے کہا کہ سیدنا ماعز بن مالک رضی اللہ عنہ نبی کریم صلی اللہ علیہ وسلم کی خدمت میں آئے اور انہوں نے زنا کا اعتراف کیا، دو بار، تو آپ صلی اللہ علیہ وسلم نے ان کو واپس بھیج دیا۔ وہ پھر آئے اور زنا کرنے کا دو بار اعتراف کیا، تب آپ صلی اللہ علیہ وسلم نے فرمایا: ”تو نے اپنے اوپر چار بار شہادت دی ہے۔ اسے لے جاؤ اور رجم کر دو۔“ [سنن ابي داود/كِتَاب الْحُدُودِ/حدیث: 4426]

سیدنا ابن عباس رضی اللہ عنہ سے روایت ہے کہ نبی کریم صلی اللہ علیہ وسلم نے ماعز بن مالک سے کہا: ”شاید تو نے بوسہ لیا ہوگا، یا چٹکی بھری ہوگی یا (ویسے ہی) دیکھا ہوگا۔“ اس نے کہا: ”نہیں۔“ آپ صلی اللہ علیہ وسلم نے فرمایا: ”کیا بھلا تو نے اس سے فی الواقع جماع کیا ہے؟“ اس نے کہا: ”ہاں۔“ تب آپ صلی اللہ علیہ وسلم نے اس کو رجم کرنے کا حکم دیا۔ موسیٰ (موسیٰ بن اسماعیل) کی روایت میں ابن عباس رضی اللہ عنہ کا واسطہ مذکور نہیں اور یہ لفظ وہب کے ہیں۔ [سنن ابي داود/كِتَاب الْحُدُودِ/حدیث: 4427]

سیدنا ابوہریرہ رضی اللہ عنہ نے بیان کیا کہ (ماعز اسلمی) اسلمی رضی اللہ عنہ، اللہ کے نبی صلی اللہ علیہ وسلم کی خدمت میں حاضر ہوا اور اپنے متعلق گواہی دی کہ وہ ایک عورت کے ساتھ زنا کر بیٹھا، یہ گواہی اس نے اپنے خلاف چار مرتبہ دی۔ ہر بار نبی کریم صلی اللہ علیہ وسلم اس سے اپنا منہ پھیر لیتے تھے۔ پھر وہ پانچویں بار سامنے ہوا تو آپ صلی اللہ علیہ وسلم نے اس سے پوچھا: ”کیا تو نے فی الواقع اس کے ساتھ جماع کیا ہے؟“ اس نے کہا: ”ہاں۔“ آپ صلی اللہ علیہ وسلم نے پوچھا: ”حتیٰ کہ تیرا ذکر اس کی فرج میں غائب ہو گیا تھا؟“ اس نے کہا: ”ہاں۔“ آپ صلی اللہ علیہ وسلم نے فرمایا: ”کیا بھلا جس طرح سلائی سرمے دانی میں غائب ہو جاتی ہے اور ڈول کی رسی کنویں میں چلی جاتی ہے؟“ اس نے کہا: ”ہاں۔“ آپ صلی اللہ علیہ وسلم نے پھر پوچھا: ”کیا بھلا جانتے بھی ہو کہ زنا کیا ہوتا ہے؟“ اس نے کہا: ”ہاں، میں اس سے حرام کام کر بیٹھا ہوں جیسے کہ شوہر اپنی بیوی سے حلال کرتا ہے۔“ آپ صلی اللہ علیہ وسلم نے فرمایا: ”تو اپنی اس بات سے کیا چاہتا ہے؟“ اس نے کہا: ”میں چاہتا ہوں کہ آپ مجھے پاک کر دیں۔“ تب آپ صلی اللہ علیہ وسلم نے حکم دیا تو اسے رجم کیا گیا۔ پھر آپ صلی اللہ علیہ وسلم نے اپنے صحابہ رضی اللہ عنہم میں سے دو آدمیوں کو سنا کہ ایک دوسرے سے کہہ رہا تھا: ”اس کو دیکھو کہ اللہ نے اس پر پردہ ڈالا تھا، مگر اس کے نفس نے اس کو نہیں چھوڑا حتیٰ کہ پتھروں سے مارا گیا جیسے کہ کتے کو مارا جاتا ہے“، تو آپ صلی اللہ علیہ وسلم ان سے خاموش رہے۔ پھر آپ صلی اللہ علیہ وسلم کچھ دیر چلتے رہے حتیٰ کہ ایک مردہ گدھے کے پاس سے گزرے جس کی ٹانگیں اوپر کو اٹھی ہوئی تھیں، آپ صلی اللہ علیہ وسلم نے فرمایا: ”فلاں اور فلاں کہاں ہیں؟“ انہوں نے کہا: ”ہم یہ رہے، اے اللہ کے رسول!“ آپ صلی اللہ علیہ وسلم نے فرمایا: ”اترو اور اس مردار گدھے کا گوشت کھاؤ۔“ انہوں نے کہا: ”اے اللہ کے نبی! بھلا یہ بھی کوئی کھاتا ہے؟“ آپ صلی اللہ علیہ وسلم نے فرمایا: ”ابھی جو تم نے اپنے بھائی کی عزت پامال کی ہے، وہ اس کے کھانے سے بدتر ہے۔ قسم اس ذات کی جس کے ہاتھ میں میری جان ہے وہ اس وقت جنت کی نہروں میں غوطے کھا رہا ہے۔“ [سنن ابي داود/كِتَاب الْحُدُودِ/حدیث: 4428]