سیدنا عمران بن حصین رضی اللہ عنہ سے مروی ہے کہ ایک عورت نبی کریم صلی اللہ علیہ وسلم کی خدمت میں آئی، ابان کی روایت میں ہے کہ وہ قبیلہ جہینہ سے تھی۔ اس نے کہا: ”میں نے زنا کیا ہے اور حمل سے ہوں۔“ تو رسول اللہ صلی اللہ علیہ وسلم نے اس کے ولی کو طلب کیا اور اس سے فرمایا: ”اس کے ساتھ اچھا سلوک کرنا اور جب بچے کی ولادت ہو جائے تو اس (عورت) کو لے آنا۔“ چنانچہ جب بچے کی ولادت ہو گئی تو وہ اسے لے آیا، تو نبی کریم صلی اللہ علیہ وسلم نے حکم دیا اور اس پر اس کے کپڑے سخت کر کے باندھ دیے گئے، پھر آپ صلی اللہ علیہ وسلم نے اس کے متعلق حکم دیا اور اسے رجم کر دیا گیا۔ پھر آپ صلی اللہ علیہ وسلم نے انہیں حکم دیا تو انہوں نے اس پر نماز (جنازہ) پڑھی۔ سیدنا عمر رضی اللہ عنہ نے کہا: ”اے اللہ کے رسول! آپ اس پر نماز پڑھ رہے ہیں حالانکہ اس نے زنا کیا ہے؟“ آپ صلی اللہ علیہ وسلم نے فرمایا: ”قسم اس ذات کی جس کے ہاتھ میں میری جان ہے! اس نے ایسی توبہ کی ہے کہ اگر اسے اہل مدینہ کے ستر آدمیوں میں تقسیم کر دیں تو انہیں بھی کافی ہو جائے، اور کیا بھلا تم نے اس سے بڑھ کر بھی کوئی دیکھا ہے کہ اس نے اپنی جان قربان کر دی ہے؟“ ابان سے ”کپڑے سخت کر کے باندھنے“ کی بات مروی نہیں ہے۔ [سنن ابي داود/كِتَاب الْحُدُودِ/حدیث: 4440]

جناب اوزاعی رحمہ اللہ سے مروی ہے، انہوں نے کہا: ”اس پر اس کے کپڑے سخت کر کے باندھے گئے۔“ [سنن ابي داود/كِتَاب الْحُدُودِ/حدیث: 4441]

جناب عبداللہ بن بریدہ اپنے والد سیدنا بریدہ رضی اللہ عنہ سے روایت کرتے ہیں کہ بنوغامد کی ایک عورت نبی کریم صلی اللہ علیہ وسلم کے پاس آئی اور کہنے لگی: ”میں نے بدکاری کی ہے۔“ آپ صلی اللہ علیہ وسلم نے فرمایا: ”واپس چلی جا۔“ تو وہ لوٹ گئی۔ پھر جب اگلا دن ہوا تو وہ آپ صلی اللہ علیہ وسلم کے پاس آ گئی اور بولی: ”شاید آپ مجھے اسی طرح لوٹا دینا چاہتے ہیں جس طرح آپ نے ماعز بن مالک کو واپس کیا تھا۔ اللہ کی قسم! میں حاملہ ہوں (یعنی زنا سے)۔“ آپ صلی اللہ علیہ وسلم نے اس سے فرمایا: ”جا واپس چلی جا۔“ تو وہ لوٹ گئی۔ پھر جب اگلا دن ہوا تو وہ پھر آپ صلی اللہ علیہ وسلم کی خدمت میں آ گئی تو آپ صلی اللہ علیہ وسلم نے اس سے فرمایا: ”واپس چلی جا حتیٰ کہ تیرے بچے کی ولادت ہو جائے۔“ تو وہ واپس لوٹ گئی۔ جب بچہ پیدا ہوا تو وہ بچے کو لے کر آ گئی اور کہنے لگی: ”یہ رہا وہ، اس کو میں نے جنم دیا ہے۔“ آپ صلی اللہ علیہ وسلم نے اس سے فرمایا: ”واپس جا اور اس کو دودھ پلا حتیٰ کہ تو اس کا دودھ چھڑا دے۔“ وہ پھر اسے لے کر آئی جب کہ اس نے اس کا دودھ چھڑا دیا تھا، بچے کے ہاتھ میں کوئی چیز تھی جسے وہ کھا رہا تھا۔ آپ صلی اللہ علیہ وسلم نے بچے کے متعلق حکم دیا جو مسلمانوں میں سے ایک آدمی کے حوالے کر دیا گیا اور آپ صلی اللہ علیہ وسلم نے اس عورت کے متعلق حکم دیا تو اس کے لیے گڑھا کھودا گیا اور حکم دیا تو اسے رجم کر دیا گیا۔ اور سیدنا خالد رضی اللہ عنہ ان لوگوں میں تھے جو اسے پتھر مار رہے تھے۔ انہوں نے اس کو ایک پتھر مارا تو اس سے خون کا ایک قطرہ ان کے رخسار پر جا لگا، اس کی وجہ سے انہوں نے اس کو برا بھلا کہا تو نبی کریم صلی اللہ علیہ وسلم نے ان سے فرمایا: ”خالد! ذرا ٹھہرو (اس کو برا بھلا مت کہو) قسم اس ذات کی جس کے ہاتھ میں میری جان ہے! اس نے اس قدر توبہ کی ہے کہ اگر کوئی ظالم بھتا لینے والا بھی اس قدر توبہ کرتا تو بخش دیا جاتا۔“ اور آپ صلی اللہ علیہ وسلم نے اس کے متعلق حکم دیا، چنانچہ اس پر نمازِ جنازہ پڑھی گئی اور پھر اسے دفن بھی کیا گیا۔ [سنن ابي داود/كِتَاب الْحُدُودِ/حدیث: 4442]

ابن ابی بکرہ اپنے والد رضی اللہ عنہ سے روایت کرتے ہیں کہ نبی کریم صلی اللہ علیہ وسلم نے ایک عورت کو رجم کیا تو اس کے لیے سینے تک گڑھا کھودا گیا۔ امام ابوداؤد رحمہ اللہ کہتے ہیں: ”مجھے یہ حدیث ایک آدمی نے سمجھائی۔“ (وہ عثمان سے کماحقہ نہیں سمجھ سکے تھے)۔ امام ابوداؤد رحمہ اللہ نے (مزید) کہا کہ غسانی نے کہا: ”جہینہ، غامد اور بارق تینوں ایک ہی قبیلے (کے نام) ہیں۔“ [سنن ابي داود/كِتَاب الْحُدُودِ/حدیث: 4443]

زکریا بن سلیم نے اپنی سند سے مذکورہ بالا حدیث کی مانند روایت کیا اور مزید کہا پھر (نبی کریم صلی اللہ علیہ وسلم نے) اسے ایک کنکری ماری جیسے کہ چنا ہو اور فرمایا: ”مارو لیکن چہرہ بچاؤ۔“ جب وہ ٹھنڈی ہو گئی تو اس کو گڑھے سے نکالا اور اس پر نماز (جنازہ) پڑھی اور اس کی توبہ میں اس طرح بیان کیا، جیسے کہ سیدنا بریدہ رضی اللہ عنہ کی حدیث (4442) میں ہے۔ [سنن ابي داود/كِتَاب الْحُدُودِ/حدیث: 4444]

سیدنا ابوہریرہ اور زید بن خالد جہنی رضی اللہ عنہما بیان کرتے ہیں کہ دو آدمی رسول اللہ صلی اللہ علیہ وسلم کی خدمت میں اپنا جھگڑا لے کر آئے۔ ایک نے کہا: ”اے اللہ کے رسول! ہم میں اللہ کی کتاب کے مطابق فیصلہ کر دیں“۔ اور دوسرے نے کہا، اور وہ اس سے بڑھ کر سمجھدار تھا: ”ہاں اے اللہ کے رسول! ہم میں اللہ کی کتاب کے مطابق فیصلہ فرما دیں اور مجھے اجازت دیں کہ بات کروں“۔ آپ صلی اللہ علیہ وسلم نے فرمایا: ”کہو“۔ اس نے کہا: ”میرا بیٹا اس شخص کے ہاں نوکر تھا، «عَسِيف» کے معنی ہیں ”نوکر، مزدور“، تو اس نے اس کی بیوی کے ساتھ زنا کیا۔ لوگوں نے مجھے بتایا کہ میرے بیٹے پر رجم ہے، میں نے اس کی طرف سے سو بکریاں اور اپنی ایک لونڈی فدیہ دی ہے۔ پھر میں نے اہل علم سے معلوم کیا تو انہوں نے مجھے بتایا کہ میرے بیٹے پر سو کوڑے اور ایک سال کے لیے شہر بدری ہے اور سنگساری اس کی بیوی پر ہے“۔ تو رسول اللہ صلی اللہ علیہ وسلم نے فرمایا: ”قسم اس ذات کی جس کے ہاتھ میں میری جان ہے! میں تم میں اللہ تعالیٰ کی کتاب کے مطابق فیصلہ کروں گا۔ تیری بکریاں اور تیری لونڈی تجھے واپس ہوں گی“۔ اور آپ صلی اللہ علیہ وسلم نے اس کے لڑکے کو سو کوڑے لگائے اور ایک سال کے لیے شہر بدر کر دیا اور انیس اسلمی رضی اللہ عنہ کو فرمایا کہ ”دوسرے کی بیوی کے پاس جائے، اگر وہ اعتراف کر لے تو اس کو سنگسار کر دے“، چنانچہ اس نے اعتراف کر لیا تو انہوں نے اس کو سنگسار کر دیا۔ [سنن ابي داود/كِتَاب الْحُدُودِ/حدیث: 4445]