سیدنا ابو سعید خدری رضی اللہ عنہ سے روایت ہے، انہوں نے کہا کہ ایک بار رسول اللہ صلی اللہ علیہ وسلم کچھ تقسیم کر رہے تھے کہ ایک آدمی آیا اور آپ صلی اللہ علیہ وسلم کے اوپر جھک گیا، تو آپ صلی اللہ علیہ وسلم نے اپنی کھجور کی لاٹھی سے جو آپ کے پاس تھی اسے کچوکا دیا، پس اس سے اس کا چہرہ زخمی ہو گیا۔ تو رسول اللہ صلی اللہ علیہ وسلم نے اس سے فرمایا: ”آؤ اور اپنا بدلہ لے لو۔“ اس نے جواب دیا: ”اے اللہ کے رسول! میں نے معاف کیا۔“ [سنن ابي داود/كِتَاب الدِّيَاتِ/حدیث: 4536]

جناب ابوفراس (ربیع بن زیاد بن انس حارثی) سے روایت ہے، وہ کہتے ہیں کہ سیدنا عمر بن خطاب رضی اللہ عنہ نے ہمیں خطبہ دیا اور کہا: ”میں اپنے عمال اس لیے نہیں بھیجتا کہ تمہارے جسموں پر ماریں یا تمہارے مال تم سے چھین لیں۔ اگر کسی کے ساتھ ایسا ہو تو اسے چاہیے کہ اپنا مقدمہ میرے پاس لائے تاکہ میں اس سے قصاص لوں۔“ تو سیدنا عمرو بن العاص رضی اللہ عنہ نے کہا: ”اگر کسی نے اپنی رعایا میں سے کسی کی تادیب کی ہو (اسے سزا دی ہو) تو کیا آپ اس کا بدلہ لیں گے؟“ فرمایا: ”ہاں، قسم اس ذات کی جس کے ہاتھ میں میری جان ہے! میں اس سے بدلہ لوں گا۔ میں نے رسول اللہ صلی اللہ علیہ وسلم کو دیکھا ہے کہ وہ اپنی ذات سے بدلہ دلواتے تھے۔“ [سنن ابي داود/كِتَاب الدِّيَاتِ/حدیث: 4537]