سیدنا عبداللہ بن عمر رضی اللہ عنہ سے روایت ہے کہ نبی کریم صلی اللہ علیہ وسلم ایک انصاری کے پاس سے گزرے جب کہ وہ اپنے بھائی کو حیاء کے بارے میں وعظ کر رہا تھا، تو رسول اللہ صلی اللہ علیہ وسلم نے فرمایا: ”اسے چھوڑ دو، بلاشبہ حیاء ایمان سے ہے۔“ [سنن ابي داود/كِتَاب الْأَدَبِ/حدیث: 4795]

سیدنا ابوقتادہ رضی اللہ عنہ بیان کرتے ہیں کہ ہم سیدنا عمران بن حصین رضی اللہ عنہ کے ساتھ تھے جبکہ وہاں بشیر بن کعب بھی تھے (با کے ضمہ کے ساتھ)، سیدنا عمران بن حصین رضی اللہ عنہ نے حدیث بیان کی، رسول اللہ صلی اللہ علیہ وسلم نے فرمایا: ”حیاء سراسر خیر ہے۔“ بشیر بن کعب نے کہا: ”ہمیں کئی کتابوں میں ملتا ہے کہ بعض حیاء اطمینان اور وقار کی وجہ سے ہوتی ہے اور بعض حیاء کمزوری اور بزدلی کی وجہ سے ہوتی ہے۔“ تو سیدنا عمران رضی اللہ عنہ نے حدیثِ رسول دوبارہ دہرائی اور پھر بشیر نے بھی اپنی بات دہرا دی۔ راوی بیان کرتے ہیں کہ سیدنا عمران رضی اللہ عنہ اس قدر غصے میں آ گئے کہ ان کی آنکھیں سرخ ہو گئیں اور بولے: ”میں تجھے رسول اللہ صلی اللہ علیہ وسلم کی حدیث سنا رہا ہوں اور تو مجھے اپنی کتابوں سے بتائے جا رہا ہے۔“ ہم نے کہا: ”اے ابونجید! بس کیجیے، بس کیجیے (اسے یہ تنبیہ کافی ہے)۔“ [سنن ابي داود/كِتَاب الْأَدَبِ/حدیث: 4796]

سیدنا ابومسعود رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے فرمایا: ”گزشتہ انبیاء کی تعلیمات میں سے جو بات لوگوں کے پاس محفوظ رہی ہے وہ یہی ہے کہ جب حیا نہ رہے تو جو جی چاہے کر۔“ امام ابوداؤد رحمہ اللہ سے پوچھا گیا: ”کیا قعنبی کے پاس شعبہ کے واسطے سے اس حدیث کے سوا کوئی اور حدیث بھی ہے؟“ انہوں نے فرمایا: ”نہیں۔“ [سنن ابي داود/كِتَاب الْأَدَبِ/حدیث: 4797]