حضرت عبداللہ بن عمر رضی اللہ عنہ سے روایت ہے کہ رسول اللہ صلی اللہ علیہ وسلم نے بھول کر دو رکعتوں پر سلام پھیر دیا۔ ایک آدمی جسے ذوالیدین کہتے تھے، اس نے عرض کیا: ”اللہ کے رسول! کیا نماز کم ہوگئی ہے یا آپ بھول گئے ہیں؟“ نبی صلی اللہ علیہ وسلم نے فرمایا: ”نہ نماز کم ہوئی ہے اور نہ میں بھولا ہوں۔“ انہوں نے عرض کیا: ”اگر یہ بات ہے تو (عرض یہ ہے کہ) آپ نے دو ہی رکعتیں پڑھی ہیں۔“ نبی صلی اللہ علیہ وسلم نے فرمایا: ”کیا جس طرح ذوالیدین کہتا ہے (ویسے ہی ہوا ہے؟)“ صحابہ رضی اللہ عنہم نے کہا: ”جی ہاں۔“ تب نبی صلی اللہ علیہ وسلم نے آگے بڑھ کر دو رکعتیں پڑھائیں، پھر سلام پھیرا، پھر سہو کے دو سجدے کیے۔ [سنن ابن ماجه/كتاب إقامة الصلاة والسنة/حدیث: 1213]

حضرت ابوہریرہ رضی اللہ عنہ سے روایت ہے، انہوں نے فرمایا: ”اللہ کے رسول صلی اللہ علیہ وسلم نے ہمیں پچھلے وقت کی ایک نماز (ظہر یا عصر کی) دو رکعتیں پڑھا کر سلام پھیر دیا۔ مسجد میں ایک لکڑی تھی (غالباً ستون ہوگا) نبی صلی اللہ علیہ وسلم اس سے ٹیک لگا کر تشریف رکھا کرتے تھے، پھر (سلام پھیرنے کے بعد) نبی صلی اللہ علیہ وسلم اٹھ کر اس لکڑی کی طرف چلے۔ جن افراد کو (جانے کی) جلدی تھی وہ یہ کہتے ہوئے چل دیے: ”نماز کم ہو گئی ہے۔“ حاضرین میں حضرت ابوبکر اور حضرت عمر رضی اللہ عنہما بھی موجود تھے۔ وہ آپ صلی اللہ علیہ وسلم سے کچھ عرض کرنے سے ڈرے (کہ نبی صلی اللہ علیہ وسلم کو ناگوار نہ گزرے)۔ لوگوں میں ایک لمبے ہاتھوں والے صاحب بھی تھے، جو ذوالیدین کے نام سے معروف تھے۔ انہوں نے عرض کیا: ”اے اللہ کے رسول! کیا نماز کم کر دی گئی ہے یا آپ سے بھول ہو گئی؟“ رسول اللہ صلی اللہ علیہ وسلم نے فرمایا: ”نہ نماز کم کی گئی ہے اور نہ میں بھولا ہوں۔“ انہوں نے عرض کیا: ”آپ نے دو ہی رکعتیں پڑھی ہیں۔“ نبی صلی اللہ علیہ وسلم نے فرمایا: ”کیا (ایسے ہی ہوا ہے) جس طرح ذوالیدین کہتا ہے؟“ صحابہ رضی اللہ عنہم نے کہا: ”جی ہاں۔“ تب رسول اللہ صلی اللہ علیہ وسلم نے اٹھ کر دو رکعتیں پڑھیں، پھر سلام پھیرا، پھر دو سجدے کیے، پھر سلام پھیرا۔“ [سنن ابن ماجه/كتاب إقامة الصلاة والسنة/حدیث: 1214]

حضرت عمران بن حصین رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم نے عصر کی تین رکعتیں پڑھ کر سلام پھیر دیا، پھر اٹھ کر حجرے میں تشریف لے گئے۔ ایک لمبے ہاتھوں والے صاحب، خرباق رضی اللہ عنہ نے (باہر سے) آواز دی: ”اے اللہ کے رسول صلی اللہ علیہ وسلم ! کیا نماز کم ہوگئی ہے؟“ آپ غصے کی کیفیت میں چادر گھسیٹتے ہوئے باہر تشریف لائے اور (حاضرین سے معاملہ) دریافت کیا، آپ کو اس کی خبر دی گئی تو نبی صلی اللہ علیہ وسلم نے جو رکعت (غلطی سے) چھوڑ دی تھی وہ پڑھائی، پھر سلام پھیرا، پھر دو سجدے کیے، پھر سلام پھیرا۔“ [سنن ابن ماجه/كتاب إقامة الصلاة والسنة/حدیث: 1215]