حضرت ابو ہریرہ رضی اللہ عنہ سے روایت ہے کہ ایک سیاہ فام خاتون مسجد کی صفائی کیا کرتی تھیں، وہ رسول اللہ صلی اللہ علیہ وسلم کو نظر نہ آئیں تو چند دن بعد آپ صلی اللہ علیہ وسلم نے ان کے متعلق دریافت فرمایا۔ آپ صلی اللہ علیہ وسلم کو بتایا گیا کہ وہ فوت ہو گئی ہیں۔ آپ صلی اللہ علیہ وسلم نے فرمایا: ”تم نے مجھے اطلاع کیوں نہ دی؟“ پھر نبی صلی اللہ علیہ وسلم ان کی قبر پر تشریف لے گئے اور نماز جنازہ ادا کی۔ [سنن ابن ماجه/كتاب الجنائز/حدیث: 1527]

حضرت زید بن ثابت رضی اللہ عنہ کے بڑے بھائی حضرت یزید بن ثابت رضی اللہ عنہ سے روایت ہے، انہوں نے فرمایا: ہم لوگ نبی صلی اللہ علیہ وسلم کے ساتھ باہر گئے جب آپ صلی اللہ علیہ وسلم بقیع (کے قبرستان) میں پہنچے تو آپ کو ایک نئی قبر نظر آئی، نبی صلی اللہ علیہ وسلم نے اس کے بارے میں دریافت فرمایا۔ صحابہ رضی اللہ عنہم نے کہا: ”فلاں خاتون ہے (یہ ان کی قبر ہے)۔“ آپ صلی اللہ علیہ وسلم نے اسے پہچان لیا، فرمایا: ”تم نے مجھے اس کی (وفات کی) اطلاع کیوں نہ دی؟“ انہوں نے کہا: ”آپ دوپہر کو آرام فرما رہے تھے اور آپ روزے سے تھے، تو ہمیں یہ بات اچھی نہ لگی کہ آپ کو تکلیف دیں۔“ آپ صلی اللہ علیہ وسلم نے فرمایا: ”یوں نہ کیا کرو۔ مجھے (تم سے دوبارہ ایسے عمل کی) ہرگز خبر نہ ملے۔ جب تک میں تمہارے درمیان (زندہ) موجود ہوں۔ تم میں سے جو کوئی بھی فوت ہو، مجھے ضرور اطلاع کیا کرو کیونکہ میری دعا ان کے لیے رحمت کا باعث ہے۔“ پھر آپ صلی اللہ علیہ وسلم قبر پر تشریف لے گئے ہم نے آپ کے پیچھے صف بنالی اور آپ صلی اللہ علیہ وسلم نے اس پر چار تکبیریں کہیں۔ [سنن ابن ماجه/كتاب الجنائز/حدیث: 1528]

حضرت عبداللہ بن عامر رحمۃ اللہ علیہ اپنے والد عامر بن ربیعہ رضی اللہ عنہ سے روایت کرتے ہیں، انہوں نے فرمایا: ”ایک سیاہ فام خاتون کی وفات ہوگئی، نبی صلی اللہ علیہ وسلم کو اس کی اطلاع نہ دی گئی۔ (بعد میں) آپ صلی اللہ علیہ وسلم کو اس (کی وفات) کا علم ہوا تو فرمایا: ”تم نے مجھے اس کی وفات کی اطلاع کیوں نہ دی؟“ پھر آپ صلی اللہ علیہ وسلم نے صحابہ کرام رضی اللہ عنہم سے فرمایا: ”اس (کی نماز جنازہ) کے لیے صفیں بناؤ۔“ تب آپ صلی اللہ علیہ وسلم نے اس کا جنازہ پڑھا۔“ [سنن ابن ماجه/كتاب الجنائز/حدیث: 1529]

حضرت عبداللہ بن عباس رضی اللہ عنہما سے روایت ہے، انہوں نے فرمایا: ”ایک آدمی فوت ہو گیا، (وفات سے پہلے بیماری کے ایام میں) رسول اللہ صلی اللہ علیہ وسلم اس کی عیادت کیا کرتے تھے۔ صحابہ کرام رضی اللہ عنہم نے اسے رات ہی کو دفن کر دیا، جب صبح ہوئی تو انہوں نے رسول اللہ صلی اللہ علیہ وسلم کو بتایا۔ آپ صلی اللہ علیہ وسلم نے فرمایا: ”مجھے خبر کرنے میں تمہیں کیا مانع تھا؟“ انہوں نے کہا: ”رات کا وقت تھا اور اندھیرا بھی تھا تو ہم نے آپ صلی اللہ علیہ وسلم کو تکلیف دینا پسند نہ کیا۔“ آپ صلی اللہ علیہ وسلم نے اس شخص کی قبر پر جا کر نمازِ جنازہ ادا کی۔“ [سنن ابن ماجه/كتاب الجنائز/حدیث: 1530]

حضرت انس رضی اللہ عنہ سے روایت ہے کہ نبی صلی اللہ علیہ وسلم نے ”ایک قبر پر میت کی تدفین کے بعد نمازِ جنازہ پڑھی۔“ [سنن ابن ماجه/كتاب الجنائز/حدیث: 1531]

حضرت سلیمان بن بریدہ رحمہ اللہ اپنے والد بریدہ بن حصیب رضی اللہ عنہ سے روایت کرتے ہیں، انہوں نے فرمایا: ”نبی صلی اللہ علیہ وسلم نے ایک میت کا جنازہ اس کے دفن کیے جانے کے بعد ادا کیا۔“ [سنن ابن ماجه/كتاب الجنائز/حدیث: 1532]

حضرت ابو سعید رضی اللہ عنہ سے روایت ہے کہ ایک سیاہ فام خاتون مسجد میں جھاڑو دیا کرتی تھی۔ ایک رات وہ فوت ہوگئی۔ صبح کو رسول اللہ صلی اللہ علیہ وسلم کو اس کی وفات کی اطلاع دی گئی۔ آپ صلی اللہ علیہ وسلم نے فرمایا: ”تم نے مجھے (اس وقت) کیوں نہ اس کی وفات کی اطلاع دی؟“ پھر آپ صلی اللہ علیہ وسلم صحابہ کرام رضی اللہ عنہم کو ساتھ لے کر نکلے اور اس کی قبر پر جا کھڑے ہوئے۔ رسول اللہ صلی اللہ علیہ وسلم نے اور آپ کے پیچھے تمام لوگوں نے اس پر (نماز جنازہ کی) تکبیریں کہیں اور اس کے لیے دعائیں کیں (نماز جنازہ پڑھی) پھر واپس آگئے۔ [سنن ابن ماجه/كتاب الجنائز/حدیث: 1533]