ام المؤمنین حضرت عائشہ رضی اللہ عنہا سے روایت ہے کہ انہوں نے حضرت بریرہ رضی اللہ عنہا کو آزاد کیا تو رسول اللہ صلی اللہ علیہ وسلم نے انہیں اختیار دے دیا اور ان کا خاوند آزاد تھا۔ [سنن ابن ماجه/كتاب الطلاق/حدیث: 2074]

حضرت عبداللہ بن عباس رضی اللہ عنہما سے روایت ہے، انہوں نے فرمایا: ”حضرت بریرہ رضی اللہ عنہا کے شوہر غلام تھے، انہیں مغیث رضی اللہ عنہ کہتے تھے۔ (مجھے وہ منظر یاد ہے) گویا میں ان (مغیث رضی اللہ عنہ) کو دیکھ رہا ہوں کہ وہ بریرہ رضی اللہ عنہا کے پیچھے روتے پھر رہے ہیں اور ان کے رخساروں پر آنسو بہہ رہے ہیں تو نبی صلی اللہ علیہ وسلم نے حضرت عباس رضی اللہ عنہ سے فرمایا: ”اے عباس! کیا آپ کو تعجب نہیں ہوتا کہ مغیث بریرہ سے (شدید) محبت کرتا ہے اور بریرہ رضی اللہ عنہا، مغیث رضی اللہ عنہ سے (شدید) نفرت کرتی ہے؟“ (ایک بار) نبی صلی اللہ علیہ وسلم نے حضرت بریرہ رضی اللہ عنہا سے فرمایا: ”کاش! تم ان سے رجوع کر لو، آخر وہ تمہارے بچوں کے باپ ہیں۔“ انہوں نے کہا: ”اللہ کے رسول صلی اللہ علیہ وسلم ! کیا آپ مجھے حکم فرما رہے ہیں؟“ نبی صلی اللہ علیہ وسلم نے فرمایا: ”میں تو سفارش کرتا ہوں۔“ تو انہوں نے کہا: ”مجھے ان کی کوئی ضرورت نہیں۔““ [سنن ابن ماجه/كتاب الطلاق/حدیث: 2075]

حضرت عائشہ رضی اللہ عنہا سے روایت ہے، انہوں نے فرمایا: ”حضرت بریرہ رضی اللہ عنہا کی وجہ سے تین سنتیں قائم ہوئیں (اور تین شرعی مسائل معلوم ہوئے:) (ایک یہ کہ) جب وہ آزاد ہوئیں تو انہیں اختیار دیا گیا۔ اور ان کا خاوند غلام تھا۔ (دوسری یہ کہ) لوگ انہیں صدقہ دیتے تھے، وہ (اس سے کچھ) نبی صلی اللہ علیہ وسلم کو ہدیہ دے دیتی تھیں۔ نبی صلی اللہ علیہ وسلم فرماتے تھے: ”یہ اس پر صدقہ ہے، اور ہمارے لیے ہدیہ ہے۔“ (تیسری یہ کہ) نبی صلی اللہ علیہ وسلم نے فرمایا: ”ولاء اسی کا ہے جو آزاد کرے۔““ [سنن ابن ماجه/كتاب الطلاق/حدیث: 2076]

حضرت عائشہ رضی اللہ عنہا سے روایت ہے کہ حضرت بریرہ رضی اللہ عنہا کو ”تین حیض عدت گزارنے کا حکم دیا گیا۔“ [سنن ابن ماجه/كتاب الطلاق/حدیث: 2077]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ”حضرت بریرہ رضی اللہ عنہا کو اختیار دیا۔“ [سنن ابن ماجه/كتاب الطلاق/حدیث: 2078]