حضرت عمران بن حصین رضی اللہ عنہ سے روایت ہے کہ ”ایک آدمی کے چھ غلام تھے، اس کا ان کے علاوہ اور کوئی مال نہیں تھا، اس نے وفات کے وقت ان سب کو آزاد کر دیا۔ رسول اللہ صلی اللہ علیہ وسلم نے ان کے (تین) حصے کیے، پھر دو غلاموں کو آزاد کر دیا اور چار غلاموں کو رہنے دیا۔“ [سنن ابن ماجه/كتاب الأحكام/حدیث: 2345]

حضرت ابوہریرہ رضی اللہ عنہ سے روایت ہے، انہوں نے فرمایا: ”ایک سودے میں دو آدمیوں کا جھگڑا ہو گیا۔ ان میں سے کسی کے پاس ثبوت نہیں تھا (گواہی وغیرہ یا کوئی اور قرینہ) تو رسول اللہ صلی اللہ علیہ وسلم نے انہیں حکم دیا کہ قرعہ ڈال کر قسم کھا لیں، خواہ انہیں (قسم کھانا) پسند ہو یا ناپسند ہو۔“ [سنن ابن ماجه/كتاب الأحكام/حدیث: 2346]

حضرت عائشہ رضی اللہ عنہا سے روایت ہے کہ ”رسول اللہ صلی اللہ علیہ وسلم جب کسی سفر میں تشریف لے جاتے تو اپنی ازواج مطہرات (رضی اللہ عنہن) میں قرعہ ڈالتے۔“ [سنن ابن ماجه/كتاب الأحكام/حدیث: 2347]

حضرت زید بن ارقم رضی اللہ عنہ سے روایت ہے، انہوں نے فرمایا: ”حضرت علی رضی اللہ عنہ یمن میں تھے تو ان کی خدمت میں تین مرد حاضر کیے گئے جنہوں نے ایک عورت سے ایک ہی طہر میں جماع کیا تھا۔ (اب اس عورت کے بچے کے بارے میں جھگڑا ہو گیا تھا) حضرت علی رضی اللہ عنہ نے دو آدمیوں سے پوچھا: ”کیا تم دونوں اس (تیسرے) شخص کے حق میں بچے کا اقرار کرتے ہو؟“ ان دونوں نے کہا: ”نہیں۔“ پھر دو آدمیوں (دوسرے اور تیسرے) سے فرمایا: ”کیا تم تسلیم کرتے ہو کہ بچہ اس (پہلے) کا ہے؟“ انہوں نے کہا: ”نہیں۔“ (اسی طرح تیسرے اور پہلے کو مخاطب کر کے پوچھا) حضرت علی رضی اللہ عنہ جب بھی (کوئی سے) دو سے سوال کرتے: ”کیا تم تسلیم کرتے ہو کہ بچہ اس (تیسرے ساتھی) کا ہے؟“ تو دونوں کہتے: ”نہیں۔“ چنانچہ آپ نے ان (تینوں) کے درمیان قرعہ ڈالا اور جس کے نام کا قرعہ نکلا بچہ اسی کا قرار دے دیا اور اس کے ذمے دو تہائی دیت ڈال دی۔ یہ واقعہ رسول اللہ صلی اللہ علیہ وسلم کی خدمت میں عرض کیا گیا تو رسول اللہ صلی اللہ علیہ وسلم کھل کر ہنسے حتی کہ آپ کی ڈاڑھیں ظاہر ہو گئیں۔“ [سنن ابن ماجه/كتاب الأحكام/حدیث: 2348]