یونس بن عبید رحمہ اللہ کہتے ہیں: عمرو بن عبید (معتزلی) حدیث میں جھوٹ بولتا تھا۔ [صحيح مسلم/مقدمة/حدیث: 66]

معاذ بن معاذ رحمہ اللہ کہتے ہیں: میں نے عوف بن ابی جمیلہ رحمہ اللہ سے پوچھا: عمرو بن عبید ہمیں حسن بصری رحمہ اللہ سے یہ حدیث بیان کرتا ہے کہ رسول اللہ صلی اللہ علیہ وسلم نے فرمایا: ”جو شخص ہم پر ہتھیار اٹھائے، وہ ہم میں سے نہیں ہے۔“ عوف رحمہ اللہ نے قسم اٹھا کر کہا: عمرو جھوٹا ہے، لیکن اس کا مقصد یہ ہے کہ اس حدیث سے اپنے خبیث نظریے کو تقویت پہنچائے، اور اس کو ثابت کرے۔ ( «حَوَزَ» کا معنی ہے ”جمع کرنا، اکٹھا کرنا“)۔ [صحيح مسلم/مقدمة/حدیث: 67]

حماد بن زید رحمہ اللہ کہتے ہیں: ایک آدمی ہمیشہ ایوب رحمہ اللہ کے ساتھ رہتا اور ان سے حدیث سنتا تھا۔ چنانچہ ایوب رحمہ اللہ نے اسے گم پایا (تو ساتھیوں سے پوچھا) تو حاضرینِ مجلس نے کہا: اے ابوبکر! وہ تو عمرو بن عبید کے ساتھ چپک گیا ہے، یعنی اس کا ہم نشین بن گیا ہے، ہمیں علم ہوا ہے۔ حماد رحمہ اللہ کہتے ہیں کہ ایک دن میں صبح سویرے ایوب رحمہ اللہ کے ساتھ بازار کی طرف جا رہا تھا تو سامنے سے وہ شخص آگیا، چنانچہ ایوب رحمہ اللہ نے اسے سلام کیا اور حال احوال پوچھا، پھر ایوب رحمہ اللہ نے اس سے کہا: مجھ تک یہ بات پہنچی ہے کہ تو اس آدمی کا ہم نشین ہو گیا ہے؟ حماد رحمہ اللہ کہتے ہیں: ایوب رحمہ اللہ نے عمرو کا نام لیا، اس نے کہا: ہاں اے ابوبکر! کیونکہ وہ ہمیں عجیب و غریب باتیں سناتا ہے۔ ایوب رحمہ اللہ نے اس سے کہا: انہی عجائب سے تو ہم بھاگتے یا ڈرتے ہیں۔ (کیونکہ ان غرائب کو احادیث بتانا جھوٹ ہے، اور اگر یہ آراء یا اقوال ہیں تو بدعت ہیں۔) [صحيح مسلم/مقدمة/حدیث: 68]

حماد بن زید رحمہ اللہ کہتے ہیں: ایوب رحمہ اللہ کو بتایا گیا کہ عمرو بن عبید، حسن بصری رحمہ اللہ سے نقل کرتا ہے کہ نبیذ سے نشہ آنے پر نشئی کو حد (کوڑے) نہیں لگائیں گے، تو انہوں نے کہا: اس نے جھوٹ بولا ہے، میں نے خود حضرت حسن رحمہ اللہ کو یہ کہتے سنا ہے کہ نبیذ سے نشہ آنے پر نشئی کو حد لگائی جائے گی۔ [صحيح مسلم/مقدمة/حدیث: 69]

سلام بن مطیع رحمہ اللہ کہتے ہیں: ایوب رحمہ اللہ کو پتا چلا کہ میں عمرو کے پاس جاتا ہوں، تو ایک دن وہ میری طرف متوجہ ہو کر کہنے لگے: ”بتاؤ! ایک شخص کے دین پر تمہیں اعتماد نہیں ہے، اس پر حدیث کے سلسلے میں کیسے اعتماد کرو گے؟ یعنی: اس کی حدیث پر اعتماد نہیں ہو سکتا۔“ [صحيح مسلم/مقدمة/حدیث: 70]

ابو موسیٰ رحمہ اللہ کہتے ہیں: بدعتی (معتزلی، قدری) ہونے سے پہلے عمرو بن عبید نے ہمیں احادیث سنائیں۔ [صحيح مسلم/مقدمة/حدیث: 71]

معاذ عنبری رحمہ اللہ کہتے ہیں: میں نے قاضیِ واسط ابو شیبہ کے بارے میں شعبہ رحمہ اللہ کو خط لکھ کر پوچھا، انہوں نے مجھے جواب لکھ کر بھیجا: اس سے کوئی حدیث نہ لکھو اور میرا خط چاک کر دو۔ (تاکہ وہ اس خط کے سبب مجھے نشانہ نہ بنائے۔) [صحيح مسلم/مقدمة/حدیث: 72]

عفان رحمہ اللہ کہتے ہیں: میں نے حماد بن سلمہ رحمہ اللہ کو صالح مری رحمہ اللہ کی ثابت رحمہ اللہ سے ایک حدیث سنائی، تو انہوں نے کہا: ”وہ جھوٹا ہے۔“ اور میں نے ہمام رحمہ اللہ کو صالح مری کی ایک حدیث سنائی، تو انہوں نے بھی کہا: ”اس نے جھوٹ بولا ہے۔“ [صحيح مسلم/مقدمة/حدیث: 73]

ابو داؤد رحمہ اللہ کہتے ہیں کہ مجھے شعبہ رحمہ اللہ نے کہا: ”تم جریر بن حازم رحمہ اللہ کے پاس جاؤ اور ان سے کہو: آپ کے لیے حسن بن عمارہ سے روایت بیان کرنا جائز نہیں ہے، کیونکہ وہ جھوٹ بولتا ہے۔“ ابو داؤد رحمہ اللہ کہتے ہیں کہ میں نے شعبہ رحمہ اللہ سے پوچھا: یہ کیسے ہے؟ (آپ کو کیسے پتہ چلا ہے) انہوں نے جواب دیا: ”حسن نے ہمیں حکم رحمہ اللہ سے چند احادیث سنائیں، جن کی مجھے کوئی اصل یا بنیاد نہیں ملی۔“ میں نے کہا: وہ کون سی حدیثیں ہیں؟ شعبہ رحمہ اللہ نے کہا: ”میں نے حکم سے سوال کیا کہ کیا نبی کریم صلی اللہ علیہ وسلم نے احد کے شہداء کی نمازِ جنازہ پڑھی ہے؟ حکم نے کہا: نہیں پڑھی۔“ جبکہ حسن بن عمارہ، ابن عباس رضی اللہ عنہما کی حدیث بیان کرتا ہے کہ نبی اکرم صلی اللہ علیہ وسلم نے ان کی نمازِ جنازہ پڑھی اور ان کو دفن کیا۔ میں نے حکم سے دریافت کیا: آپ کا زنا کی اولاد کے بارے میں کیا نظریہ ہے؟ انہوں نے کہا: ان کی نمازِ جنازہ پڑھی جائے۔ میں نے پوچھا: کس کی روایت ہے؟ انہوں نے کہا: حسن بصری رحمہ اللہ سے روایت ہے۔ جبکہ حسن بن عمارہ محدثین رحمہ اللہ کے نزدیک بالاتفاق ضعیف ہے، اور حسن بن عمارہ یہ روایت حکم رحمہ اللہ کی سند سے علی رضی اللہ عنہ سے بیان کرتا ہے۔ [صحيح مسلم/مقدمة/حدیث: 74]

حسن حلوانی رحمہ اللہ کہتے ہیں، میں نے یزید بن ہارون رحمہ اللہ سے سنا، انہوں نے زیاد بن میمون کا ذکر کر کے کہا: میں نے قسم اٹھائی ہے کہ میں اس سے اور خالد بن محدوج سے کوئی روایت بیان نہیں کروں گا، کیونکہ میں زیاد بن میمون کو ملا، اور اس سے ایک حدیث کے بارے میں پوچھا، تو اس نے مجھے وہ بکر مزنی رحمہ اللہ سے سنائی، پھر میں نے اس کی طرف دوبارہ رجوع کیا، تو اس نے مجھے وہ مورق سے سنا دی، پھر میں اسے سہ بارہ ملا تو اس نے مجھے وہ حسن رحمہ اللہ سے سنا دی، اور یزید بن ہارون رحمہ اللہ ان دونوں (زیاد، خالد) کو جھوٹا قرار دیتے تھے۔ حلوانی رحمہ اللہ کہتے ہیں: میں نے عبدالصمد رحمہ اللہ کے پاس زیاد بن میمون کا ذکر کیا، تو انہوں نے کہا: وہ جھوٹا ہے۔ [صحيح مسلم/مقدمة/حدیث: 75]