زہیر رحمہ اللہ کہتے ہیں کہ جابر رحمہ اللہ نے کہا: میرے پاس پچاس ہزار احادیث ایسی ہیں کہ میں نے ان میں سے کوئی حدیث نہیں سنائی۔ پھر ایک دن ایک حدیث بیان کی اور کہا: یہ ان ہی پچاس ہزار میں سے ہے۔ [صحيح مسلم/مقدمة/حدیث: 56]

سلام بن ابی مطیع رحمہ اللہ کہتے ہیں: میں نے جابر جعفی کو یہ کہتے ہوئے سنا: ”میرے پاس نبی اکرم صلی اللہ علیہ وسلم کی پچاس ہزار احادیث ہیں۔“ [صحيح مسلم/مقدمة/حدیث: 57]

سفیان رحمہ اللہ کہتے ہیں: میں نے ایک آدمی سے سنا، اس نے جابر سے اللہ تعالیٰ کے اس فرمان ﴿فَلَنْ أَبْرَحَ الْأَرْضَ حَتَّىٰ يَأْذَنَ لِي أَبِي أَوْ يَحْكُمَ اللَّهُ لِي ۖ وَهُوَ خَيْرُ الْحَاكِمِينَ﴾ [سورة يوسف: 80] کا معنی پوچھا: ”میں تو اس سر زمین سے کبھی نہ جاؤں گا حتیٰ کہ میرا باپ مجھے اجازت دے، یا اللہ میرے حق میں فیصلہ فرما دے اور وہی سب سے بہتر فیصلہ کرنے والا ہے۔“ تو جابر نے کہا: ”اس کی حقیقت یا اس کا مصداق ابھی تک ظاہر نہیں ہوا۔“ سفیان رحمہ اللہ کہتے ہیں: ”اس نے جھوٹ بولا ہے (کیونکہ اس واقعہ کا تعلق تو حضرت یوسف علیہ السلام کے بھائی کے ساتھ ہے)“ ہم نے سفیان رحمہ اللہ سے پوچھا: یہ کہنے سے اس کا مقصد کیا تھا؟ تو انہوں نے کہا: ”رافضیوں کا عقیدہ ہے کہ حضرت علی رضی اللہ عنہ بادل میں ہیں، ہم ان کی اولاد میں سے کسی کے ساتھ نہیں نکلیں گے، یہاں تک کہ آسمان سے ایک منادی کرنے والا آواز دے گا، یعنی: حضرت علی رضی اللہ عنہ آواز دیں گے: فلاں کے ساتھ نکلو (اس کے ساتھ ہم نکلیں گے)۔“ سفیان رحمہ اللہ کہتے ہیں: اس آیت کی حقیقت یا مصداق یہی ہے، اور اس نے جھوٹ بولا ہے، ”یہ آیت تو حضرت یوسف علیہ السلام کے بھائیوں کے بارے میں ہے (یہ بات ان کے بڑے بھائی نے کہی تھی، جس کی تفصیل اور پس منظر قرآن مجید میں موجود ہے)۔“ [صحيح مسلم/مقدمة/حدیث: 58]

سفیان رحمہ اللہ کہتے ہیں: میں نے جابر کو تقریباً تیس ہزار احادیث بیان کرتے سنا، اور میں اتنی اتنی دولت لے کر بھی ان میں سے کسی ایک کو بیان کرنا حلال نہیں سمجھتا (کیونکہ وہ سب موضوع اور جعلی ہیں)۔ ابو غسان محمد بن عمرو رازی رحمہ اللہ کہتے ہیں: میں نے جریر بن عبدالحمید رحمہ اللہ سے پوچھا: آپ حارث بن حصیرہ رحمہ اللہ کو ملے ہیں؟ انہوں نے کہا: ہاں! وہ بوڑھا ہے، بہت خاموش (چپ چپ) رہتا ہے، ایک انتہائی ناگوار عقیدے پر اصرار کرتا ہے، یعنی رجعت پر ایمان رکھتا ہے۔ [صحيح مسلم/مقدمة/حدیث: 59]

حماد بن زید رحمہ اللہ کہتے ہیں: ایوب رحمہ اللہ نے ایک دن ایک آدمی کا تذکرہ کیا، چنانچہ کہا: اس کی زبان درست نہیں ہے، (یعنی: جھوٹا ہے۔) ایک اور آدمی کا تذکرہ کیا، تو کہا: وہ تحریر میں اضافہ کرتا ہے، (یعنی حدیث میں اضافہ کرتا ہے۔) [صحيح مسلم/مقدمة/حدیث: 60]

حماد بن زید رحمہ اللہ کہتے ہیں: ایوب رحمہ اللہ نے کہا: میرا ایک پڑوسی ہے، پھر اس کے فضائل اور خوبیاں بیان کیں، اور اگر وہ میرے سامنے دو کھجوروں کے بارے میں گواہی دے تو میں اس کی گواہی کو معتبر قرار نہیں دوں گا (کیونکہ وہ جھوٹا ہے)۔ [صحيح مسلم/مقدمة/حدیث: 61]

معمر رحمہ اللہ کہتے ہیں: میں نے ایوب رحمہ اللہ کو کسی کی غیبت کرتے نہیں دیکھا سوائے عبدالکریم یعنی ابو امیہ کے، کیونکہ ایوب رحمہ اللہ نے ان کا تذکرہ کرنے کے بعد کہا: اللہ ان پر رحم فرمائے! وہ ثقہ نہیں تھا، اس نے مجھ سے عکرمہ رحمہ اللہ کی ایک حدیث دریافت کی، پھر کہنے لگا: میں نے عکرمہ رحمہ اللہ سے سنا ہے۔ [صحيح مسلم/مقدمة/حدیث: 62]

ہمام رحمہ اللہ کہتے ہیں: ہمارے پاس ابو داؤد اعمیٰ آیا اور کہنے لگا: ہمیں براء اور زید بن ارقم رضی اللہ عنہما نے حدیث سنائی۔ چنانچہ اس واقعے کا تذکرہ ہم نے قتادہ رحمہ اللہ سے کیا، تو انہوں نے کہا: جھوٹ بولتا ہے، اس نے کسی صحابی سے نہیں سنا۔ یہ تو مانگت (سوالی) تھا۔ تباہ کن طاعون کے وقت لوگوں کے سامنے بھیک مانگنے کے لیے ہاتھ پھیلاتا تھا۔ [صحيح مسلم/مقدمة/حدیث: 63]

ہمام رحمہ اللہ کہتے ہیں: ابو داؤد اعمیٰ، قتادہ رحمہ اللہ کے ہاں آیا، پھر جب وہ چلا گیا تو حاضرین نے کہا: اس کا دعویٰ ہے کہ میں اٹھارہ بدری صحابیوں سے ملا ہوں، تو قتادہ رحمہ اللہ نے کہا: یہ تو طاعون سے پہلے مانگتا تھا، ان احادیث سے اس کو کچھ دلچسپی یا واسطہ نہ تھا اور نہ ان کے بارے میں گفتگو کرتا تھا۔ اللہ کی قسم! ہمیں حسن بصری رحمہ اللہ نے کسی بدری صحابی سے براہِ راست سن کر حدیث نہیں سنائی اور نہ ہی سعید بن المسیب رحمہ اللہ نے ہمیں کسی بدری سے روبرو سن کر حدیث سنائی، سوائے حضرت سعد بن مالک رضی اللہ عنہ کے۔ [صحيح مسلم/مقدمة/حدیث: 64]

رقبہ رحمہ اللہ کہتے ہیں: ابو جعفر ہاشمی مدنی حق اور سچی باتوں کو احادیث بنا کر نبی اکرم صلی اللہ علیہ وسلم سے بیان کرتا تھا، جبکہ وہ احادیث نبوی نہیں ہیں۔ [صحيح مسلم/مقدمة/حدیث: 65]